ساختا ئېلان
ئالاھىدىن ئابدۇرېشىت
پۈتۈپ كەتتى ئاقىۋەت قۇلاق ساختا ئېلاندىن،
كۆزىمىزنى باستى ھەم چاپاق ساختا ئېلاندىن،
بېشىمىزمۇ بوپ كەتتى قاپاق ساختا ئېلاندىن،
ياشاپ كەلدۇق ئالدىنىپ ئۇزاق ساختا ئېلاندىن،
قويۇلماسمۇ بۇنىڭغا سوراق، ساختا ئېلاندىن...
راسا كۆككە ئۇچۇرۇپ ئۆتمەس ماتا-مېلىنى،
«باھاسىنى چۈشۈردۇق»دېسە بىلمەي ھىلىنى،
كۆرۈپ تۇرۇپ ياغلىسا جارچىلارنىڭ گېلىنى،
چۈشەنمىسەك ئالدامچى-رەڭۋازلارنىڭ تىلىنى،
تۇرمۇشىمىز تاپارمۇ روناق، ساختا ئېلاندىن؟
چاپلاپ ساختا ماركىنى، ئالتۇن دەيدۇ داشقالنى،
ساپ ئالتۇندا تارتۇقلاپ جارچى بىلەن ئامبالنى،
ئاڭلاپ تۇرۇپ تەپ تارتماي يۇشۇرىدۇ بۇ ھالنى،
رەم سېلىشقا چىللايدۇ بەختىمىزگە رەمبالنى،
بەرگەچ ھەتتا ئالتۇنغا بوياق، ساختا ئېلاندىن.
«ئېلىۋىلىڭ، مېلىمىز بازار تاپتى، ئاز» دەيدۇ،
چوكا مۇزنى يىسىڭىز قارا قىشتا ساز دەيدۇ،
بايرام كەلدى، ھېيىت كەلدى، باھار دەيدۇ، يازدەيدۇ،
نېمە دېسە گەپ بىرلاگەپ: ئۆز گۆرۈڭنى قاز دەيدۇ،
ياساپ گويا ئاسمانغا پەشتاق، ساختا ئېلاندىن.
تېلېۋىزورلار سۆزلەيدۇ ئون قانالدا ئون خىل گەپ،
بىرى دەيدۇ زىيانلىق، بىرى دەيدۇ پايدا-نەپ،
توۋا، ئەجەپ چىقاركەن بىر ئېغىزدىن شۇنداق گەپ،
قايناپ بەزى ئوغىمىز ئىچىمىزدە دەيمىز «خەپ!»،
بىزار بولۇپ قاقشايمىز ھەرۋاق، ساختا ئېلاندىن.
رادىيومۇ، گېزىتمۇ پۇلدار ئۈچۈن سۆزلەيدۇ،
قايرىپ قويۇپ قانۇننى پەقەت پۇلنى كۆزلەيدۇ،
پۇلنىڭ كۈچى چەكسىزدۇر، تاغ-دەريانى تۈزلەيدۇ،
دىنسىزلارمۇ «خۇدا» دەپ پۇلدىن ئۈمىد ئۈزمەيدۇ،
لەپىلدەيدۇ قوللاردا بايراق، ساختا ئېلاندىن.
«سىزلەر ئۈچۈن كىرگۈزدۇق تېخنىكا ۋە ھۈنەر»دەپ،
«بىمارلارغا شىپادۇر بىزنىڭ ئوغا-زەھەر»دەپ،
جىنسىيەتتىن سۆزلەيدۇ ھەركۈندە خوشخەۋەر دەپ،
(ئەركەكلەرگە ياسىدۇق زامانىۋىي زەكەر) دەپ...
بولدۇق ئاتا-بالىمۇ يىراق، ساختا ئېلاندىن.
كۆرۈپ ساختا ئېلاننى ھەيران بولدى بەزىلەر،
ئىشەنگەچكە ئۇنىڭغا ۋەيران بولدى بەزىلەر،
شاھتەك ياشاپ ئاخىرى چوپان بولدى بەزىلەر،
يۇرت-ماكاندىن ئايرىلىپ سەرسان بولدى بەزىلەر،
شىرىن خىيال-چۈش كۆرۈپ ئويغاق، ساختا ئېلاندىن
.
ئۇچۇر ئىدى ئەسلى ئۇ بىزلەر ئۈچۈن راست بولسا،
ئېھتىياجنى قاندۇرسا، تۇرمۇشقىمۇ ماس بولسا،
كۆرەر ئىدى، ئاڭلايتى، ئۇنى ئەما، گاس بولسا،
دەۋرىمىزگە ۋە يەنە خەلقىمىزگە خاس بولسا،
يېتەر بىزگە پايدا-نەپ قانداق، ساختا ئېلاندىن؟؟؟ بۇ يازمىنى ئاخىرىدا alahidin تەھرىرلىگەن. ۋاقتى 2012-8-26 18:54
| 
قىزغىنلىق
تىللا
تۆھپە
شۆھرەت
يوللىغان ۋاقتى 2012-8-26 18:53:15
يوللىغان ۋاقتى 2012-8-26 22:47:50