بىر بۇرادەرگە

كەۋسەر

ئابدۇللا ياقۇپ

تۇتۇپ ئەمەل -ھوقۇقنى ئاي بولدۇڭمۇ بۇرادەر ،
پۇل-مال يىغىپ ھارامدىن باي بولدۇڭمۇ بۇرادەر .

مىياڭلايىتتىڭ تۈنۈگۈن ، خۇددى ئاۋاق مۈشۈكتەك ،
بۈگۈن تازا ئويناقلاپ باي بولدۇڭمۇ بۇرادەر .

چىقار چاندا ئۆگزىگە يۆلەپ قويغان كىم سېنى ،
يۆلىگەنلەر چاڭقىسا چاي بولدۇڭمۇ بۇرادەر .

ئۆتكەن كۈنۈڭ ئەستە يوق ، ئۆزۈڭ ئەمدى پەستە يوق ،
يولدا ماڭساڭ غادىيىپ ، ۋاي بولدۇڭمۇ بۇرادەر .

قەلبىڭ توندەك قارىيىپ كەتكەن زېھنىڭ تارىيىپ ،
خازان قىلىپ بېغىڭنى ساي بولدۇڭمۇ بۇرادەر .

تۆكۈپ ئابروي-يۈزۈڭنى ، گۇمران قىلىپ ئۆزۈڭنى ،
ھېچنېمىگە ئەرزىمەس لاي بولدۇڭمۇ بۇرادەر .

مەنبە-تەڭرىتاغ

alahidin

كەۋسەر،  ئۇستاز شائىر ئابدۇللا ياقۇپنىڭ بۇ شېئىرىنى مۇنبەرگە يوللىغىنىڭىز ياخشى بوپتۇ. ئەسكەرتمىڭىزگە قارىغاندا،  بۇ شېئىرنى «تەڭرىتاغ» تورىدىن ئالغان ئوخشايسىز(تور ياكى ژورنال ئىكەنلىكىنى ئېنىق ئەسكەرتمەپسىز). بىراق، ئەسلىدىكى يوللىغۇچىنىڭ سەھۋەنلىكىۇ ياكى سىزنىڭ سەھۋەنلىكىڭىزمۇ،  بۇ ماڭا نامەلۇم، «بۈگۈن تازا ئويناقلاپ باي بولدۇڭمۇ بۇرادەر .» دېگەن مىسرادىكى «باي» دېگەن سۆز ئەسلى«تاي» بولۇشى كېرەك. ئۇنداق بولمىغاندا، شېئىردا قاپىيە تەكرارلىقى يۈز بېرىپ قالىدۇ. شۇنىڭغا ئىشەنچىم كامىلكى، ئابدۇللا ياقۇپ بۇنداق سەھۋەنلىكنى بىلمەيدىغانلاردىن ئەمەس. دېمەكچىمەنكى، باشقىلارنىڭ ئەسەرلىرىنى مۇنبەرلەرگە يوللىغاندا چوقۇم ئەسلى ئەسەرگە سادىق بولۇش كېرەك. بۇ بىر ئەقەللىي ئىلىم ئىستىلىدۇر.

admin

ھەقىقەتەن ياخشى يېزىلغان شىئېر ئىكەن. بۈگۈن يۇقىرى مەرتىۋىگە ئىگە بۇلىۋاپلا ئۆتكەن كۈنىنى ئۇنتۇپ قالغانلارنى ئۆتكۈر تىللار بىلەن قامىچىلىنىپتۇ. مۇشۇنداق ياخشى شىئېرنى كۈرۈشكە مۇيەسسەر قىلغىنىڭىزغا كۆپ رەھمەت!

阿卜杜艾尼

ھەقىقەتەن ياخشى يېزىلغان شېئىر ئىكەن. سىزنىڭ يوللاپ قويغىنىڭىغىزغا ئاپىرىن.

كەۋسەر

ياخشى باھايىڭلارغا تەشەككۈر ئەزىزلەر ...