مەيپۇرۇش
ئالاھىدىن ئابدۇرېشىت
مەيپۇرۇشسەن، نام-نىشان، ھۆرمەتنى ساتما مەيپۇرۇش،
قىل ھالال ئوقەت، ھارام نېمەتنى ساتما مەيپۇرۇش،
بول مۇلازىم ئەل ئۈچۈن، خىزمەتنى ساتما مەيپۇرۇش،
تاپ روناق، پۇلدار بولۇپ، ھېممەتنى ساتما مەيپۇرۇش،
ئادىمىيلىك قىممىتىڭ-خىسلەتنى ساتما مەيپۇرۇش.
قارىسام كاتتا ۋىۋىسكاڭ بار ئىكەن «مەيخانا» دەپ،
كەپتىمەن مىش-مىشنى ئىغۋا دەپ بىلىپ كۆڭلۈمدە زەپ،
ئاختۇرۇپ ھەمياننى «مەي!» دەپ مەن ساڭا قىلماستا گەپ،
بىر گۈزەل كەلدى قېشىمغا، (قالدى پۇشمان) ئالدى نەپ،
پۇلغا زورلاپ بىئەدەپ سۆھبەتنى ساتما مەيپۇرۇش.
يول توسۇپ، ئۆتكەننى ئالداپ«مەيخانا»ڭغا زورلىما،
بار نادانلار تېخى كۆپ، بەڭۋاش كۆڭۈلنى ئوۋلىما،
قاشلىرىڭنى ئوينىتىپ، قىزلارنى يانغا توۋلىما،
ئازغىنە نەپسىڭنى دەپ ئەلنىڭ يېنىنى كولىما،
ئامىتىڭ ئەلدە ھامان، بەرىكەتنى ساتما مەيپۇرۇش.
كوچىدا قالغان يېتىمە ھالىغا يەتمەك بولۇپ،
بېشىنى سىلاپ ئۇنىڭ، كۆڭلىنى خوش ئەتمەك بولۇپ،
«مەيخانا»ڭغا كەلمىسە، تۇرسا ئەگەر كەتمەك بولۇپ،
يولىنى ئەتمە ئۇنىڭ پۇت-قولىغا چەتمەك بولۇپ،
باشتىكى ئەھدىڭدە تۇر، شەپقەتنى ساتما مەيپۇرۇش.
كىرسە«مەيخانا»ڭغا كىم، يان ئۆيگە باشلاپ قويمىغىن،
دۈمبىسىنى ئۇۋۇلاپ، بېشىنى قاشلاپ قويمىغىن،
ئۆز قىزىڭدەك قىزنى مەس-پەسلەرگە تاشلاپ قويمىغىن،
قەلبىنى ئۆرتەپ ئۇنىڭ، كۆزىنى ياشلاپ قويمىغىن،
مەينى ساتساڭ سات، تېڭىپ«چۆپقەت»نى ساتما مەيپۇرۇش.
مەيخۇمارغا كۈندە قالتىس«مەي» سېتىپسەن، ئاڭلىدىم،
«مەي»گە مەينىڭ پۇلىدىن ئوننى قېتىپسەن، ئاڭلىدىم،
چىڭ بېقىپ ئىشىكنى سەن، سىرتتا يېتىپسەن، ئاڭلىدىم،
ئاقىۋەت رەسۋا بولۇپ، يىراق كېتىپسەن، ئاڭلىدىم،
يۇقتۇرۇپ نادانغا بۇ ئىللەتنى ساتما مەيپۇرۇش.
سەن ئېچىپ پىنھاندا-خالتا كوچىدا«مەيخانە»نى،
ئاڭلىماي ئەلنىڭ غەزەپ-نەپرىتىنى، چۇقانىنى،
«مەيخانا»ڭغا توپلۇدۇڭ«مەي»گە يەنە مەستانىنى،
مەي ئەمەس، ساتتىڭ تالاي قىزنىڭ غۇرۇر-ۋىجدانىنى،
قۇل بولۇپ پۇلغا نومۇس-ئىپپەتنى ساتما مەيپۇرۇش.
«مەيخانا»ڭغا دوقۇرۇپ كىرگەن كىشى ساق چىقمىغاي،
كىرسە تەنھا، «مەيخانا»ڭدىن ئاخىرى تاق چىقمىغاي،
قىز دېسە، چوكان دېسە، «خوش!»تۇر گېپىڭ، «ياق!» چىقمىغاي،
بۇلغىنىپ نامى، قارا بولغاي يۈزى-ئاق چىقمىغاي،
بىر بۇزۇق دەللال بولۇپ مىللەتنى ساتما مەيپۇرۇش! بۇ يازمىنى ئاخىرىدا alahidin تەھرىرلىگەن. ۋاقتى 2012-8-21 21:22
| 
قىزغىنلىق
تىللا
تۆھپە
شۆھرەت
يوللىغان ۋاقتى 2012-8-21 21:21:39
يوللىغان ۋاقتى 2012-8-21 22:16:32
يوللىغان ۋاقتى 2012-8-22 10:34:32
