غالجىر ئىتلارنى داۋالاش ئېلانى
(فېليەتون)
ئالاھىدىن ئابدۇرىشىت بۆلۈمىمىز بىرەر داۋالاش ئاپپاراتىغا قاراشلىق بۆلۈم ئەمەس. يەنى، xx دوختۇرخانىسىنىڭ ئىچكى كېسەللىكلەر بۆلۈمى، تاشقى كېسەللىكلەر بۆلۈمى، ئاياللار كېسەللىكلىرى بۆلۈمى دېگەندەك بىرەر بۆلۈم ئەمەس ياكى ھايۋاناتلار دوختۇرخانىسىنىڭ بىرەر بۆلۈمىمۇ ئەمەس، پەقەت ئادەتتىكى بىر ئوتتۇرا مەكتەپنىڭ ئىلمىي بۆلۈمى. بىزنىڭ بۇ داۋالاش ئېلانىنى بېرىشىمىزدىكى مۇددىئايىمىز «قېرىلارنى داۋالاپ ياشارتىمىز، ئۆلۈكنى داۋالاپ ساقايتىمىز» دېگەندەك بىمەنە سەپسەتىلەر بىلەن ئاۋامنى ئالداپ چۆنتەك توملاش بولماستىن، مەكتەپلەردىكى غالجىر ئىتلاردىن غالجىرلىق كېسىلىنى يۇقتۇرۇۋالغان، بارا-بارا تۆت پۇتلۇق غالجىر ئىتنىڭ نەق ئۆزىگە ئايلىنىپ قالغان بىر قىسىم غالجىر ئادىمىي ئىتلارنى ئەڭ ئاددىي رېتسىپ بىلەن ھېچقانداق داۋالاش راسخوتى چىقىم قىلماي تېزدىن داۋالاپ ساقايتىپ، مەكتەپلەرنىڭ ئىناق بولغان ئادەم تەربىيىلەش مۇھىتىنى بەرپا قىلىشىغا خالىسانە ياردەم بېرىشتىن ئىبارەت.
ئەلۋەتتە،«مەكتەپ ئىلمىي بۆلۈمى قانداقسىگە غالجىر ئىتلارنىڭ غالجىرلىق كېسىلىنى داۋالايدىغان ئورۇن بولۇپ قالىدۇ؟» دەپ سورىشىڭىز تۇرغان گەپ. سىزنىڭچە، مەكتەپ ئىلمىي بۆلۈمى غالجىر ئىتلارنىڭ غالجىرلىق كېسىلى تۈگۈل كەپسىز بالىلارنىڭ كەپسىزلىك كېسىلىنىمۇ داۋالاپ بولالمايدۇ، شۇنداقمۇ؟ بىراق، بەزى ئىشلار ھەرگىز سىز ئويلىغاندەك ئاددى بولمايدۇ.
تۆت پۇتلۇق غالجىر ئىت بولسىغۇ كاشكى، مانا ھېلىقى «كاپ-كاپ» ماركىلىق ئىككى پۇتلۇق غالجىر ئادىمىي ئىتنى قانداق قىلىپ «خوش-خوش» ماركىلىق تۆت پۇتلۇق ئىتقا ئايلاندۇرغانلىقىمىزنى بىلسىڭىز ئاندىن بىزگە ئاپىرىن ئوقۇماي تۇرالمايسىز.
نەق گەپنىڭ ئۆزىگە كەلسەك، مەكتىپىمىزدە قاۋاپ توختىمايدىغان بىر غالجىر ئىت مېجەزلىك ئوقۇتقۇچى، توغرىسى بىر ئىككى پۇتلۇق غالجىر ئادىمىي ئىت بولىدىغان. بۇ غالجىر ئىت مەكتەپ رەھبەرلىرىنى كۆرگەنلا يەردە تالاپ، ئۇچرىغانلا ئادەمگە شالىنى چېچىپ قاۋاپ تۇرىدىغان. دائىم ۋايساپ، ھال دادلاپ ئۆزىنىڭ قۇلدەك رىيازىتىنى، باشقىلارنىڭ شاھتەك ھالاۋىتىنى كۆپتۈرۈپ سۆزلەپ، مەكتەپ مەسئۇللىرىنى چىشلەپ-تالاپ تىتماكاتاڭ قىلىۋېتىدىغان. ئورۇنلاشتۇرۇلغان ھەرقانداق چوڭ-كىچىك ئىشلاردىن ئېۋەن تېپىپ، قاۋاپ-قاۋاپ ھالىدىن كېتىدىغان. ياشتا، ھۆرمەتتە چوڭ، ئۇستاز يوللۇق ئوقۇتقۇچىلارنىمۇ مەنپەئەتنى دەپ «پوش» دېمەيدىغان. بۆلۈمىمىزنىڭ بۇرۇنقى ئەزالىرىنى بولسا «ئاقچى دوغا، كۆكچى يۇنداپۇرۇش» دەپ، مەكتەپ مەسئۇللىرىغا سالام قىلغانلارنىمۇ پاچاقتىن تالاپ سازايى دېگۈزىدىغان. ئۇ، بىرەر يۈزدىن ئارتۇق ئوقۇتقۇچىغا يىلدا بىر قېتىم تەقسىم بولىدىغان مۇنەۋۋەرلىك سانىنى تالىشىپ ياۋۇزلارچە قاۋاپ، تالاپ مەكتەپنى بېشىغا كىيىپ، ئاخىرى جىنسىغا ماس بولمىغان «مۇنەۋۋەرگۈل» ماركىسىغا تالاي قېتىم ئىگە بولغان. ئۇنۋانغا كەلگەندە تېخىمۇ غالجىرلىشىپ، سەپنىڭ قۇيرۇقىدا تۇرۇپ، يالاقداشلىرى بىلەن سوكۇلداپ يۈرۈپ، يەنە مەكتەپ مەسئۇللىرىغا ھەيۋە قىلىپ، جان يەردىن ئېلىپ، مۇددەتتىن بۇرۇن ئالىي ئۇنۋاننىمۇ ئېلىپ بولغان.
بۇ غالجىر ئىت بىرنەچچە نۆۋەتلىك مەكتەپ رەھبەرلىك كوللېكتىپىنى ئەنە شۇ غالجىرلىقى بىلەن ھەيۋە قىلىپ تالاپ قورقۇتۇپ كەلگەن.
ئۇ، بۇ رەزىل غالجىرلىق كېسىلىنى مەكتەپكە يامرىتىپ، تېخمۇ چوڭ ھەيۋە كۆرسەتمەكچى بولۇۋىدى، يېڭى رەھبەرلىك كوللېكتىپىنىڭ ئەقلى چېچىدىن ئانچە بەك قىسقا كەلمىدى بولغاي، توپلىغان تەجرىبە-ساۋاقلىرى بويىچە ئۇنى ئىلمىي بۆلۈمىمىزگە ئەزالىققا يۆتكەپ، ئوقۇتقۇچىلارنىڭ كۈندۈلۈك يوقلىمىسىنى قىلىش، قوليازما ماتېرىياللارنى تەكشۈرۈپ خۇلاسە قىلىش، ئايلىق سىناپ تەكشۈرۈش خىزمىتىنى خۇلاسىلەش دېگەندەك ۋەزىپىلەرگە قويۇۋىدى، ئاخىرى ئىشەنگۈسىز بىر مۆجىزە يۈز بەردى: بۇ ئادىمىي ئىتنىڭ ئىككى پۇتى ئاستا-ئاستا تۆت پۇتقا ئايلىنىپ، غالجىر ئىككى پۇتلۇق ئىتتىن بىر تۆت پۇتلۇق مۆمىن لالما ئىتقا ئايلاندى. ئاغزى قاۋاشتىن، تالاشتىن بىردىنلا توختىدى. قارايدىغان بولسىڭىز، ئۇ ھازىر مەكتەپ رەھبەرلىرىگە قۇيرۇق شىپاڭشىتىپ كۇچۇكلىنىدىغان بولدى. مەكتەپ رەھبەرلىرى ئۇنىڭغا سۆڭەك تاشلاپ بەرسۇن-بەرمىسۇن، قۇيرۇقىنى ئىچىگە تىقىپ يۈرىدىغان، ئۇلارغا ئالىيىپ قارىمايدىغان، ھەتتا يېڭى رەھبەرلىك كوللېكتىپىنىڭ خىزمەت ئۇسۇلىنى پۇختا ئىگەللەپ، خىزمەت كۆرسىتىپ، ئۇلارنىڭ ئالدى-كەينىدە ئۇنداق-مۇنداق سۆزلەيدىغانلارنىڭ گەپ-سۆزلىرىنى قۇلۇقىنى دىڭ تۇتۇپ ئاڭلاپ، بىر ئاماللارنى قىلىپ ئۆز تىلى بىلەن غىڭشىپ، قۇيرۇق شىپاڭشىتىپ ۋاقتىدا يەتكۈزىدىغان بولدى. مۇكاپات، سىناپ تەكشۈرۈش نومۇرى ۋە ئىلمىي بۆلۈم دېگەندەك ئەۋزەل ئىش ئورنىدا نۆۋەت بىلەن ئالمىشىپ ئىشلەش ھەققىدىكى تۈگىمەس داۋالىرىمۇ جىمىپلا كەتتى، قاۋاشنىڭ ئورنىغا قۇيرۇق شىپاڭشىتىش، تالاشنىڭ ئورنىغا يالاش ئالماشتى!
قىزىقارلىقى شۇكى، بۇ ئىت تۇرۇپ-تۇرۇپ ئادەمدەك زۇۋانغا كېلىپ قالىدىغان ۋە بۇ چاغدا:
«سۆڭەك بولسا ئىت بولسام مەيلى،
ئۆز بېغىمغا چىت بولسام مەيلى.
شوراپ تۇرسام خەخنىڭ قېنىنى،
چاتراقتىكى پىت بولسام مەيلى.»
دەپ غىڭشىپ ناخشا توۋلايدىغان بولۇپ قالدى.
شۇنداق قىلىپ، ئۇنىڭ غالجىرلىق كېسىلى ساقىيىپ«خوش-خوش» ماركىلىق لالما ئىتقا ئايلانغاندىن كېيىن، مەكتەپ رەھبەرلىرىنىڭ باش ئاغرىقى ساقايدى. خىزمەتداشلارمۇ غالجىر ئىت چىشلىۋېلىش سەۋەبلىك پات-پات داۋالىنىش ئاۋارىچىلىقىدىن قۇتۇلدى.
شۇڭا، ھەرقايسى مەكتەپلەرنىڭ مەكتىپىڭلاردىكى غالجىر ئادىمىي ئىتلارنى بۆلۈمىمىزگە يوللاپ بېرىشىڭلارنى ياكى بىز بىلەن ھەمكارلىشىپ ئۇلارنى بىز يۇقۇرىدا تەمىنلىگەن رېتسىپ بويىچە داۋالاپ ساقايتىشقا تىرىشىپ كۆرۈشۈڭلارنى ئۈمىد قىلىمىز.
xx ناھىيىلىك xx ئوتتۇرا مەكتەپ ئىلمىي بۆلۈمى.
2011-يىلى، 8-ئاينىڭ 25-كۈنى، يېڭىسار.
بۇ يازمىنى ئاخىرىدا alahidin تەھرىرلىگەن. ۋاقتى 2012-8-17 01:35
| 
قىزغىنلىق
تىللا
تۆھپە
شۆھرەت
يوللىغان ۋاقتى 2012-8-17 01:28:31
يوللىغان ۋاقتى 2012-8-17 03:32:40
يوللىغان ۋاقتى 2012-8-17 06:18:02
يوللىغان ۋاقتى 2012-8-17 12:20:29
