سەھرا سونېتلىرى
ئالاھىدىن ئابدۇرېشىت
1
تۇپرىقىڭ ھىدى بار نەپەسلىرىمدە،
سۆيگۈمدە ئېچىلار ھەرتال گىياھىڭ.
جىلۋەڭ بار چوغلۇقۇم، نەركەسلىرىمدە،
كۈيۈمدە پارلايدۇ ئانا سىماھىڭ.
نەپىسىم بار تۇپرىقىڭ، ھاۋالىرىڭدا،
قەلبىمدۇر بىپايان گۈزەل قۇچىقىڭ.
قېنىمنىڭ ئۆركىشى دالالىرىڭدا،
جىسمىمدا ئاقىدۇ دەريا، بۇلىقىڭ.
بوشلۇقسەن ساماۋىي خىياللىرىمدا،
نۇرلاردەك ئەبەدىي چاقنىدىم سەندە.
سەن قۇياش ئىستەك ھەم ۋىساللىرىمدا،
ئېھ، سەھرا، مەن سەندە، سەن ھەم بار مەندە.
مەن سېنى قەلبىمگە قىلىمەن تەققاس،
سۆيۈملۈك ۋەتەن سەن پەقەت ماڭا خاس!
2
ئۇپۇققا سىزىلار گۈزەل بىر سۈرەت
سەھرانىڭ سەھىرى سائەت سەككىزدە.
مەن ئۇنى ياقتۇرۇپ كۆرىمەن قەۋەت،
بوشلۇقتا-قۇياشتىن تۇرۇپ ئېگىزدە.
ئۇندا بار ئوغۇز روھ تەپچىرىگەن تەن،
پاك-ساددا سۆيگۈنىڭ قىبلىگاھى ھەم.
ئۇندا بار ۋەتتەننىڭ يۈرىكى، ۋەتەن،
ھاياتلىق ئىستىكى ئاڭا بولغان جەم.
ئۇندا بار قەلبىمدىن ئۇچقان بوز تورغاي،
كۈي كۈيلەر سەھەرنىڭ قۇچاقلىرىدا.
ئاڭلىنار بىر كۈيلا-«سەھرا» دەپ تىنماي،
دالالار، ئورمانلار، بۇلاقلىرىدا.
قەلبىمگە سىزىمەن ئەشۇ سۈرەتنى،
بالقىتىپ بىغۇبار، چىن مۇھەببەتنى!
3
ئەللەي كۈيى دولقۇنلايدۇ بۇلاقتىن،
ئەللەيلەيدۇ گويا قۇشلار ناۋاسى.
يۈرىكىمدە شۇ بىر كۈي بار ئۇزاقتىن،
ئانا سەھرا ئەللەيلەرنىڭ دۇنياسى.
ئەللەي ئېتىپ كېلەر ئىپار شاماللار،
تەۋرىنىمەن مۇھەببەتلىك قۇچاقتا.
ئەللەيلەيدۇ مېنى سەبىي خىياللار،
ئەللەي كۈيى ياڭرار ساددا قوشاقتا.
ئەللەي كۈيى قىز-يىگىتنىڭ كۈلكىسى،
ئەللەي ماڭا قەلبتىكى سادالار.
ئەللەيلەردە چاقنار روھىم جىلۋىسى،
ئەللەيلەيدۇ مېنى كۈيچى دالالار.
ئانا سەھرا، قۇچىقىڭدا بوۋاقمەن،
ئانا مېھرى-ۋىسالىڭغا مۇشتاقمەن!
4
قەلبىمدىكى سۆيۈملۈك شېئىرىم،
يادلاپ قالدى بوز تورغاي سېنى.
دالالارغا چېتىلدى رىشتىم،
ئېلىپ قالدى بوز تورغاي مېنى.
سەن قەلبىمدىن تۆكۈلگەن قاچان،
دالالارنىڭ ئېتەكلىرىگە؟
بوز تورغايچۈن يېيىلدى ئاسمان،
قونۇپ قەلبىم گىرۋەكلىرىگە.
شىۋىرلايمەن مەن ساڭا ئۇزاق،
سەن قەلبىمنىڭ ياڭراق ساداسى.
كۈيلەر سېنى بوز تورغاي ھەرۋاق،
سەن سەھرانىڭ كۈيى-ناۋاسى.
قۇشلارغا ھەم يادلىتاي سېنى،
بوز تورغايدەك ياڭرىتاي سېنى!
1998-يىلى،1-ئاينىڭ 15-كۈنى، يېڭىسار.
«شىنجاڭ گېزىتى» نىڭ 1998-يىلى، 2-ئاينىڭ 28-كۈنىدىكى سانىدا ئېلان قىلىنغان. بۇ يازمىنى ئاخىرىدا alahidin تەھرىرلىگەن. ۋاقتى 2012-8-16 20:13
| 
قىزغىنلىق
تىللا
تۆھپە
شۆھرەت
يوللىغان ۋاقتى 2012-8-16 20:02:45
يوللىغان ۋاقتى 2012-8-16 22:15:20
يوللىغان ۋاقتى 2012-8-16 22:19:20
