مېنىڭ شېئىرىيەت مىزانىم

كەۋسەر

مېنىڭ شېئىرىيەت مىزانىم  

سۆيگىنىم شېئىر ،بۇ كەسپى ئىشتىياقتىن كەچمىدىم.  
كۆيگۈنۈم ئارۇز ۋەزىن شۇ ئوت پىراقتىن كەچمىدىم.  
باغۇ بوستانلارنى كەزدىم<<پائىلاتۇن>>غا مىنىپ،  
<<بەھرە>>لەردىن بەھرىلەنگەندە تۇراقتىن كەچمىدىم.  
بولسا رەختىڭ تون كىيەمسەن ياكى كەمزۇل ئىختىيار.  
نۇسخا تاللاش بىر شەكىل،مەزمۇن پۇراقتىن كەچمىدىم.  
<<يېڭىلىق>> دەپ چاپتى خەقلەر <<كونا>> ياقماي كۆڭلىگە،  
ئىزدىدى ئۆرنەك بۆلەك قىتئە -يىراقتىن، كەچمىدىم.  
ئېيتتى: بەش يۈز يىلدىن ئاشتى بىر كېلىپتا بۇ نەزىم،  
كۆچمىسەك بولمايدۇ قىڭغىر ئولتۇراقتىن كەچمىدىم.  
مۇش كۆتۈردى تەلۋە داۋراڭ ،تارتتتى تىغ ئىنكارچىلىق،  
چىقمىدى ئىنكارغا لايىق ئوق ياراغدىن ،كەچمىدىم.  
<<يا ئېچىشسۇن،يا قىچىشسۇن،بولمىسا ئۇ شىئىر ئەمەس!>>  
دەپ نەۋائى پەرلىگەن بۇ شام چىراغدىن كەچمىدىم.  

ئىككى ئاپەت بەك يامان  

ئىككى ئاپەت بەك يامان-زالىم بىرى<<ئالىم>> بىرى،  
زالىمى ئەرىكنى بوغار،ۋاھ،<<ئالىمى>> روھنىڭ كىرى.  
ئىككىسى گەر ھەمتاۋاق،يوق يۇرتتا شاتلىقتىن ئەسەر،  
كۈلكە يىتكەي،باغنى چۈمكەر<<ئىت -مۈشۈك>>نىڭ خىر-خىرى.  
ئالىمىىدىن پەتىۋا بار،زالىمىدىن مۇش تېپىك،  
كۆر،بۇ ھالدا كۆپ جاھاننىڭ يامغۇرىدىن گۈلدۈرى.  
زۇلمى زالىم خۇددى خۇسرەۋ بار بىساتى ھەيۋە ،دوق،  
ساختا ئالىم گەپچى -نەپچى -نەقلا مەستان كەمپىرى.  
بىرىنىڭ كۈچ قەھرى -پاي چەك،نە ئامالىڭ ئالمىساڭ،  
بىرىنىڭ مىكرى جازانە ئەھلىنىڭ تەشۋىق دىرى.  
ئاۋۇ<<چۈشتە چىقتى ئاي!>>دەر،ماۋۇ يۇلتۇزنى چاتار،  
كەشىپ، كارامەت دەر يورۇقتا،ئاينى كۆرگەنلىك سىرى،  
گەر تىلەك شۇ:دىل ئازادە بەختىيار،ئەركىن ياشاش،  
تاڭغا ياق مەڭزىڭنى ھەق بولسۇن مۇرادىڭ دىلبىرى.  
يۇل چىمەندىن خار تىكەننى ،بەلكى قول پەنجەڭ قانار،  
ئەمما ھالى ۋاي تىكەنلىك بولسا گۈلشەن تەقدىرى،  
روزى ،سەن سۆزلە مۇدام بۇ ئىككى ئاپەتتىن قوشاق،  
پەيلى زالىم،ساختا ئالىمدىن خەلق يۈرسۇن نېرى!  

مەنبەسى:روزى سايىتنىڭ يېڭى نەشىر قىلىنغان <<ئانا تىلىم زەر تىلىم>> ناملىق تاللانغان شېئىرلار توپلىمى.  

كەۋسەر

كېسىۋەتمە ئۆرۈم چېچىڭنى
روزى سايىت
  
( ئۇيغۇر  قىزلىرىغا  ئىلتىجا )  

ئۇيغۇر قىزى، چېھرىڭدىن نۇر تارايدۇ  
گۈزەللىكىڭ ئاشىقلارغا يارايدۇ  
يۈزۈڭنى ئاي، كۆزۈڭنى كۈن مارايدۇ
ھەممە ساڭا ھەۋەسلىنىپ قارايدۇ  
كەسمە ئاشۇ ئۇزۇن ئۆرۈم چېچىڭنى.  

بەستى- بويۇڭ  ئوخشايدۇ ئۇز ئارچىغا
لېۋىڭ غۇنچە، قاڭشىرىڭ تۈز ناچىغا
چېچىڭ بىلسەڭ ، جان بېغىشلار بارچىغا  
يات ھەۋەستە قول ئۇزارتما قايچىغا
كەسمە ئاشۇ ئوزۇن ئۆرۈم چېچىڭنى.  

ئەركىگە قوي، چېچىڭ بەلدە سويلىسۇن  
شەيدا كۆزلەر قاراپ- قاراپ تويمىسۇن
تاڭ سەلكىنى ئۇنى تاراپ ئوينىسۇن
كۆز تەگمىسۇن، بىزنى دەرتتە قويمىسۇن  
كەسمە ئاشۇ ئۇزۇن ئۆرۈم چېچىڭنى.  

چاچ ئەمەس ئۇ، باشتىكى تاج- زىننىتىڭ  
ئۇ غۇرۇرۇڭ، ئەسلىي قەدىر – قىممىتىڭ  
ئو بايلىقىڭ، چېۋەرلىكىڭ، ھىممىتىڭ
ئاسرا ئۇنى، پەخىرلەنسۇن مىللىتىڭ  
كەسمە ئاشۇ ئۇزۇن ئۆرۈم چېچىڭنى.  
   
يارىشىملىق، بەلەن چاچقا قەست قىلما
ئۇنى كېسىپ قىممىتىنى پەس قىلما  
يىگىتلەرنى مەيۈس، خامۇش- مەست قىلما  
مودا قوغلاپ ئالتۇننى خار – خەس قىلما
كەسمە ئاشۇ ئۇزۇن ئۆرۈم چېچىڭنى.  
   
باغقا قارا، چاتقالمۇ بار، رەنا بار
ئەلگە قارا، غاپىلمۇ بار، دانا بار  
چاچقۇ شەكىل، شەكىلدىمۇ مەنا بار  
ئېيت قەيەردە سەندەك زىبا، بەرنا بار؟  
كەسمە بەرنا، ئۇزۇن ئۆرۈم چېچىڭنى.

كەۋسەر

روزى سايىت


ئەي گىلەم،ئېيت، قايسى بوستان ھۆسنى رۇخسارىڭچە بار؟
قايسى گۈل، گۈلشەن جۇلالىق رەڭدە بىر پارىڭچە بار؟
قاي گۈزەللىك ئالىمىنىڭ نەرى دىدارىڭچە بار؟
قايسى دىلبەرنىڭ پىراقى جىلۋە، ئوت – نارىڭچە بار؟
كەسىپ – كامالەتتە، دېگىن، كىم ئۇيغۇرۇڭ، يارىڭچە بار؟

ئاسسا تامغا تامنى باغدەك گۈل جامال قىلدى بېتىڭ،
يەرگە سالسا، يەرنى قىلدى ھەم چىمەنزار قات –  قېتىڭ.
كۆمسە قۇملار ھېچ بۇزۇلماي قايتا چىقتىڭ ساق پېتىڭ،
تارقىدى ئالەمگە، « ئۇيغۇر گىلىمى » دەپ ئۇز ئېتىڭ،
ئەي گېلەم، تەۋسىپتە كىمنىڭ داڭقى ئەنزارىڭچە بار؟

ئانا دەريا قاشتېشى چايقاپ گويا « كەلكۈن » بىلەن،
« باغچى ئەدىيال » باغ ياراتتى تۆھپىكار ئەلكۈن* بىلەن،
نۇسخا « شام » ىڭ ئېيتتى « نۇر سۆيگىن باھار تەل كۈن بىلەن! »
« چاچما » نۇسخاڭ چاچتى ھوزۇر ھەر پەسىل، ھەر كۈن بەلەن،
چىقتى«پەتنۇس » قا « ئانار » ئەلۋانى:ئەزھارىڭچەبارئەزھارىڭچەبار

قاينىسا ئۈستۈڭدە بەزمە، چالسا ئۇيغۇر سازىنى،
كۈلسە رەققاسلار يېيىپ قەۋلان ئارا قول – بازىنى،
سەن ئاسان قىلدىڭ كۆڭۈللەر شادى – ياشلىق نازىنى،
كۆرمىدىڭ پەس ئەلنى، ئۈستۈن بىلمىدىڭ « شاھ، قازى » نى،
ئەي گېلەم، بۇ پەسلى خاسلىق سەندە – گۈلبار ىڭدا بار!

سەن پۈتۈرسەن يىپ تىۋىت، ئارقان ئۈرۈش...نىڭ جەمىدە،
رەڭگىۋايىڭ رەڭ تۈزەر خالۋاپ ئوغۇلنىڭ پەمىدە،
ھەم تاپار ئىسكەت سىياقىڭ قايچا، پەنجە تەمىدە،
سەن دۇكاندا، ئەمما شەكلىڭ ئۇستىكار دىل سەمىدە،
ئەي گېلەم، ئېيت، قايسى يار خالۋاپ – ئاشۇ يارىڭچە بار؟

ئۇزلۇقۇڭ ئۇيغۇر دىلىنىڭ نۇر سىيماسى – ئۇزلۇقى،
ھەر تىۋىت، چۇچاڭ قەلىب ئاسمانىنىڭ يۇلتۇزلۇقى،
گۈل، كانارەڭ تەڭرىتاغنىڭ سوۋغىسى، نورۇزلۇقى،
رەڭ– بوياقلار ئەھلى ئەجداتنىڭ سۈتى، ئوغۇزلىقى،
تەسۋىرى يۇرتنىڭ مۇجەسسەملىكتە گۈلزارىڭچە بار.

ھە، شۇڭا بارچە گۈزەللىك بەردى بىر تەرەپ، سەن بىر تەرەپ،
شۇ گۈزەللىك بەردى خالۋاپ ھىممىتىگە شان – شەرەپ،
كۆر، ساڭا مەپتۇن ئەنە ياپۇن، پەرەڭ، پارس، ئەرەب...
ئەي گېلەم، چاقنا، جۇلالاپ، بۇ ساڭا رىغبەت، تەلەپ،
بۇ تەلەپ ئاشكارا، ئەمما، سىرى ئەسرارىڭچە بار!

admin

بىرسى-بىرسىدىن ئېسىل شىئېلاركەن. زورى سايىتنىڭ شىئېرلىرنى بەكلا ياقتۇرۇپ ئوقۇيمەن. يۇقارقى شىئېرلىنى كۆرمەپتىكەنمەن. كۈرۈشكە مۇيەسسەر قىلغىنىڭىزغا كۆپ رەھمەت!

ئامان

شۇنداق ئېسىل شېئىرلاركەن، بۇ شېئىرلارنى ئوقۇش ئىمكانىيىتىگە ئىگە قىلغىنىڭىزغا كۆپ رەھمەت.