مــۇبــارەك
ئالاھىدىن ئابدۇرېشىت
قوشنام، يېڭى ئۆيۈڭنى ئېلىۋاپسەن، مۇبارەك،
سۇپىسىغا كىگىزمۇ سېلىۋاپسەن، مۇبارەك،
بىر كېچىدە يۆتكىلىپ كېلىۋاپسەن، مۇبارەك،
بىر كۈن ئۆتمەي «پەتە» مۇ قىلىۋاپسەن، مۇبارەك،
چىللاپ مېھمان، ناغرا-ساز چېلىۋاپسەن، مۇبارەك.
ھەپتە بولغان باغىقىڭ يەتمىگەنتى قوللارغا،
كۆچمىگەنتىڭ ئۆيدىنمۇ، مېڭىپ باشقا يوللارغا،
چۈشكەن چېغى ھاجىتىڭ ئەمدى بىزنىڭ «دوللار» غا،
سەن ئۈچۈنلا پۇل تاپقان قوشنىلارغا-گوللارغا،
تەشنالىقنى ئاخىرى بىلىۋاپسەن، مۇبارەك.
باركەن ئەجەپ جان قوشنام، تاقىتىڭمۇ-سەۋرەڭمۇ،
«پەتە» سىنى ئۆيۈڭنىڭ كۆرۈۋالسۇن نەۋرەڭمۇ ،
ساپ ئالتۇنغا ئايلانغاي تارتقان جاپا-جەۋرەڭمۇ،
چىللار بىزنى «پەتە» گە بەلكىم سېنىڭ قەۋرەڭمۇ،
پۇل تېپىشنىڭ ئېپىنى تېپىۋاپسەن، مۇبارەك.
بارالمىغان بىز كىچىك سېنىڭ خەتمە تويۇڭغا،
قىزلىرىڭ بار، خەتمە توي كەلسىمۇ كۆپ ئويۇڭغا،
تاقار ئىدۇق بولمىسا زىبۇ-زىننەت بويۇڭغا،
ھەمدەم بولۇپ قوشنىلار ئىشلىرىڭغا-كويۇڭغا،
قولىمىزدا بېشىڭنى سىلىۋاپسەن، مۇبارەك.
بولسۇن سېنىڭ بۇ «پەتە»ڭ «پەتە» لەرنىڭ يازلىقى،
تۆت پەسىلدە ئۆي كۆچسەڭ باردۇر يەنە ئازلىقى،
چىقىپ تۇرغاي «پەتە» ڭنىڭ بىر-بىرىدىن سازلىقى،
ئايان بولسۇن قوشناڭنىڭ ئۆردەكلىكى-غازلىقى،
بىزنى خەتلەپ دەپتەرگە جىلىۋاپسەن، مۇبارەك.
خىزمىتىڭمۇ يۆتكەلگەن، ئورنۇڭ يېڭى، ئۆزۈڭمۇ،
كىم يېقىنىڭ بالدۇرراق كۆرۈپ قويسۇن كۆزۈڭمۇ،
باغاق دېگەن بۇيرۇق شۇ، ئاقامدۇ-يوق سۆزۈڭمۇ،
«پەتە» لەردە بىلىنەر باشلىقلىقىڭ-يۈزۈڭمۇ،
كۆكرىكىڭنى ئاجايىپ كېرىۋاپسەن، مۇبارەك.
تېخى سېنىڭ «ئۆي پەتە»ڭ ئونغا توشماس ساناقتا،
بارالمىدۇق «پەتە»ڭگە قونغان چېغىڭ ياتاقتا،
بارغان سەنمۇ «پەتە»گە ياش ئۇيۇتۇپ چاناقتا،
بىر ساندۇقۇڭ لىق تولغان ئەللىك سوملۇق باغاقتا،
بۈگۈن ساناپ ئۇنى سەن تېرىۋاپسەن، مۇبارەك.
قازاننىمۇ ئېسىپسەن تازا ئاينىڭ بېشىدا،
تىزىملىكنى نەخ قىلىپ داستىخاننىڭ قېشىدا،
يانچۇق تۈگۈل مائاش بار چاپانلارنىڭ پېشىدا،
خاتىرجەم بول ئېشىڭ بار مەھەللىنىڭ دېشىدا،
بىر كاپام ئاش يۈز سومغا بېرىۋاپسەن مۇبارەك! بۇ يازمىنى ئاخىرىدا زەپەر تەھرىرلىگەن. ۋاقتى 2012-8-14 00:33
| 
قىزغىنلىق
تىللا
تۆھپە
شۆھرەت
يوللىغان ۋاقتى 2012-8-14 00:04:42
يوللىغان ۋاقتى 2012-8-14 00:29:57
يوللىغان ۋاقتى 2012-8-14 04:56:57
