بەر قولۇڭنى قەدىرلىك دوستۇم

كەۋسەر

بەر قولۇڭنى قەدىرلىك دوستۇم ،
ئىزگۈ تىلەك تىلىگەنلەرگە .
ھاياتىنى بېزەپ رەڭمۇرەڭ ،
ئىلمۇ-ئىرپان قىزىلگۈللەرگە .

بەكمۇ قىسقا بۇ ئۆمۈر ئەمما ،
قىممەتلىكتۇر ھەممىمىز ئۈچۈن .
يېشىلمىگەن سىرلار كەينىدىن ،
قوغلاپ يۈردۇق ئىگەللەش ئۈچۈن .

ئويلاپ كۆرسەڭ خىلمۇ-خىل دۇنيا ،
ئەڭ مۇھىمى ئادىمىي ئەخلاق .
بىر-بىرىگە بولۇپ يار-يۆلەك ،
يۈرمىگەنلەر شۇ ئۆزى ئەخمەق .

قۇربان بەرمەي ئېرىشىش يوق گەپ ،
جۈرئەت قىلماي تىرىشىشمۇ ھەم .
تالانىتنى قوشۇپ ئەجىرگە ،
شۇنداق تولۇق كۆكلىگەي ئادەم .

ئىلىم ئۆگەت ۋە يەنە ئۆگەن ،
ھېچ دىلىڭدا قالمىسۇن تۈگۈن .
بىر مىنۇتمۇ بىكار ئۆتسە گەر ،
پۇشمان كېلەر ئەتە يا ئۆگۈن .

خەلق قوينى بەئەينى دېڭىز ،
دولقۇنلىنار پەسكە ۋە ئېگىز .
ئۆز-ئۆزۈڭنى بىلەلمەي يۈرسەڭ ،
ياتار جايىڭ بولىدۇ ئېڭىز .

پەرزەنىت گويا بىباھا گۆھەر ،
شۇ گۆھەرنى ئاسرىغىن ئۆزۈڭ .
تەربىيىدە بولۇپ سەن ئۈلگە ،
ھەرىكىتىگە سېلىپتۇر كۆزۈڭ .

تاققا-تۇققۇ سۆزلىگەن بولسام ،
بى كەچۈرۈپ قويۇڭ دوسىتلىرىم .
كۈچۈم يەتمىگەن ئىش-كۈشلەرگە ،
ئىلتىجالار قىلىپ يۈرمىدىم .

مەنبە-كەۋسەر