تەشنالىق

زەپەر

ئەي نىگار ، سېنى سېغىندىم . راستىنلا بەك سېغىندىم . بارىڭدا قەدرىڭنى بىلمەپتىمەن . ئەسلى ماڭا سەن بولمىساڭ ئەسلا بولمايدىكەن . سېنىڭ نۇرلۇق چېھرىڭ ، ئىلھامبەخش سۆزلىرىڭ ...يەنە ئوماق قىلىقلىرىڭ كۆز ئالدىمغا كېلىۋېلىپ مېنى بارغانچە بىئارام قىلماقتا . ۋىسالىڭ ھىجرانى ئاتەش ئوتقا ئوخشاش تېنىمنى كۆيدۈرۈپ كۈل قىلماقتا ...


قىينار مېنى چەكسىز تەنھالىق ، 
بۆلەپ ئازاب-دەرتلىك قۇچاققا .   
شوخ ناخشىلار ئەمدى خۇشياقماس ،   
تۈندە –كۈندە پەقەت قۇلاققا .   


                                             تېلفۇنۇمدىن سايراپ ئاۋازىڭ ، :
                                             ۋۇجۇدۇمنى سالار لەرزىگە .
                                              قەلبىم تەكتى بىر مۇڭلۇق نىدا ،   
                                             ئۇچۇپ كەتتى كۆكنىڭ قەرىگە .   


ئۇزۇن بولدى ھىجران پەيتىدە ،
ئۆتتى تۈنلەر ، جۇدالىق دەملەر .
ئۈنچە-مارجان ئاقار كۆزۈمدىن ،
ماڭماس ئەسلا ئالغا قەدەملەر .
  

                                        قەلبىم تۆرى سۇلتانىدىڭ سەن ،
                                        ئەمدى بولدى بۇ جاي قۇپقۇرۇق .
                                       ۋىسالىڭنى كۈتتۈم زارىقىپ ،
                                       قاچان دىلىم قىلىسەن يورۇق ؟


بىر ساڭىلا ئېيتىمەن ئەركەم ،
سۆيگۈدىكى شېرىن سۆزۈمنى .
شوخ كۈيلەردە بىر بولساق ئەگەر ،
بىلدىم تەۋە ساڭا ئۆزۈمنى .


  
                                                        ئۇچسا شامال بېشىڭ ئۈستىدىن ،
                                                        قوشۇپ قويغىن يۈرىكىڭنىمۇ .
                                                        بىللە كەلسۇن تىنىقىڭ –ھىدىڭ ،
                                                        بىرگە بەرگىن تىلىكىڭنىمۇ .


  
بۈگۈن كېچە قاراڭغۇ ئاخشام ،
سېغىنىشنىڭ ئىلكىدە پەقەت .
ساڭا يازدىم بىر تاتلىق سالام ، *
ۋۇجۇدۇمدا بىر قۇياش ھەسرەت .   
  


                                                          سەنمۇ مېنى سېغىندىڭمۇ يار ،
                                                         شەيداسىدەك بۇلبۇلى گۈلنىڭ .
                                                         سەنسىز كۈنلەر تەمى يوق ئارمان ،
                                                          نە زۇۋانى چىقماس بۇ تىلنىڭ ...


  
غېرىب ئۆيۈم تىمتاس ۋە تەنھا ،
خاتىرەمدە سېنىڭ سۈرىتىڭ .
ھىجرانىڭدا ئۇزىسا ۋاقىت ،
ئاشار شۇنچە –شۇنچە قىممىتىڭ .




                                                   بارغۇم كېلەر شۇ تاپ قېشىڭغا ،
                                                  گويا بۈركۈت بولۇپ بۇ ئاخشام .
                                                  مۇڭلۇق كېچە ئەۋەتتىم ساڭا ،
                                                  تولۇق ئاڭلا بۇ مېنىڭ ناخشام ...


مەنبە-كېچىدىكى ئىلھام

تايلاق

ئىلھامىڭىز تۇتسا خېلى ياخشى يېزىپ قويىدىكەنسىز_ ھە! بارىكاللا،  تېرىشىڭ.