كالتە كۇرسكالتە كۇرس
ئالاھىدىن ئابدۇرېشىت
«خوشخەۋەر» دەپ كۈندە بىر ۋاراقلىرىڭ بار كالتە كۇرس، بارمىساق بولمايدىغان باغاقلىرىڭ بار كالتە كۇرس، بىز«ئەپەندى»خەقكە كۆپ چاقچاقلىرىڭ بار كالتەكۇرس، بىزدىكى چۆنتەككە زەپ ئامراقلىرىڭ بار كالتە كۇرس، ئەسلى مەندەك كالتەپەم-ئاخماقلىرىڭ بار كالتە كۇرس.
بارۇ-يوق شۇ ئالتە كۈنلۈك مۆھلىتىڭدىن ئايلىناي، داغدۇغاڭدىن-دەبدەبەڭدىن، شۆﻫرىتىڭدىن ئايلىناي، كۈندە يۈزخىل لېكسىيەڭدىن-سۆﻫبىتىڭدىن ئايلىناي، يەنە مىڭ خىل سېلىقىڭدىن، كۈلپىتىڭدىن ئايلىناي، پۇل تېپىشقا ﻫەيۋە ﻫەم قىلتاقلىرىڭ باركالتە كۇرس.
بىرسى«ئۇنۋان كۇرسى»دەيدۇ قولىمىزغا خەت بېرىپ، بىر تالاي پۇلنى ئېلىپ ئاتچوتى يوق ﻫۆججەت بېرىپ، ئالتە كۈنلۈك كۇرستا باشقا ئالتە ئايلىق دەرت بېرىپ، كېچىسى ئۇخلاشقا بىزگە بىمالال رۇخسەت بېرىپ، بىر چىرايلىق ئاتىقىڭ-قالپاقلىرىڭ بار كالتە كۇرس.
بىرسى«قوش تىل» كۇرسى دەيدۇ، قېرىساڭمۇ يوق ئامال، كۆرسىتىپ سەۋەپ، ئىچىڭنى سىرىساڭمۇ يوق ئامال، رەت قىلىپ مەكتەپتە غەۋغا تېرىساڭمۇ يوق ئامال، ئۆلمىسەڭلا، مۇردىلاردەك چىرىساڭمۇ يوق ئامال، بەزى «ئۇنداق»، بەزىدە «مۇنداق»لىرىڭ بار كالتە كۇرس.
ئۆيىمىز تۇرسا ياتاققا، بار يەنە يوتقانغا پۇل، پارتىدا، ئۈستەلدە تۆت كۈن ئولتۇرۇپ قوپقانغا پۇل، كۈندە ھاجەتخانىغا تۆت-بەش قېتىم چاپقانغا پۇل، «ﻫەق يىغىش ﻫەققى» تېخى بۇ كۇرسقا نام تاپقانغا پۇل، سۆزلىسەك كۆپ سەتچىلىك-شالتاقلىرىڭ بار كالتە كۇرس.
بىرلىرى بىر كېچىدە تۈزگەن «كىتاب» نى ساتىدۇ، سورىساڭ باﻫاسىنى ساق بىرگە ئوننى قاتىدۇ، ئالمىساڭ قەﻫرى بىلەن نەق سېنى چەنلەپ ئاتىدۇ، بىر قېتىملىق «ئىمتىﻬان»غا تەقدىرىڭنى چاتىدۇ، تەلۋىلەرنىڭ قولىدا توقماقلىرىڭ بار كالتە كۇرس.
يوق ئامال بىزدە ساڭا قاتناشمىساق سەپراس بولۇپ، سودىلاشقانلار ئۈچۈن گوياكى قۇلغا خاس بولۇپ، سېتىلىپ كەتتۇق، خوجايىن كەتتى بەك ئىپلاس بولۇپ، قايتىمىز مۇنبەرگە مىڭ تاغنى يۈدۈپ تىمتاس بولۇپ، پىلسىراتتىن ياسىغان پەشتاقلىرىڭ بار كالتە كۇرس.
بولدىلا، ئەزۋەيلىمەيلى تۈگىسۇن پۇلنىڭ گېپى، پۇل ئۈچۈن باسقان قەدەم-ئەشۇ تۇيۇق يولنىڭ گېپى، بار خالايىققا قەلەم تۇتقان مۇنۇ قولنىڭ گېپى: يوقمۇ بىزگە دەم ئېلىشنىڭ-تىنغۇدەك چولنىڭ گېپى؟!! گۈل ئەمەس، شۇتاپ ماڭا يانتاقلىرىڭ بار كالتە كۇرس.
بىلمىدۇق تەتىل دېگەن ئۆتمۈشكە ئايلاندى نىچۈن؟ شەنبە يوق، يەكشەنبە يوق، «ئەپەندى» جايلاندى نىچۈن؟ بار ئىكەن قانداق گۇناھ،«ئەپەندى» پايلاندى نىچۈن؟ ھە دېسە كۇرسانىت بولۇپ«ئەپەندى» سايلاندى نىچۈن؟؟ يەنە سورىساق بىلىمىز، دوزاقلىرىڭ بار كالتە كۇرس.
بۇ يازمىنى ئاخىرىدا alahidin تەھرىرلىگەن. ۋاقتى 2012-8-13 00:35
|