خوتەن

كەۋسەر

ئادىل تۇنىياز

قېيىنئاتام ئاچتى ئىشىكنى
خوتەنگە ،
كىتابۇللا كىتاب يۇلتۇزى ،
يول-يوللاردا ئادەم ۋە توپا
ياڭاق شېخىدا ئاينىڭ كەچكۈزى .

تىرىك تىرىكنىڭ ئىزى ،
تىرەك تىرەكنىڭ ئىزى.
ساي-سايلاردا ، يېشىل جايلاردا
ئۇيغۇر يىلتىزى .

مەن دەريانىڭ كۈيئوغلى ،
كۈيۈپ كۈل بولغان توغراقلار بىلەن
خوتۇنۇم دەريانىڭ قىزى .

بىر خوتەنلىك
نەزىر قىلدى تۆگە بوغۇزلاپ ،
سۇدىن سۈزۈك شەھەردە .
بىر بىچارە ماڭدى ئوغرىلاپ
پۇچۇق يارماق تۇرمىدى يەردە .

مەن خوتەننى تاللايىتتىم
تۇغۇلسام قايتا ئەگەردە ،
نەدە بولسا ئۇل كەبە ، يارەب ،
خوتەنلىكلەر تېپىپ بارار دەپ
بولمىغانمۇ كەبە خوتەندە ؟

سارغۇچ كىتابتا سارغايغان تېرە
كىيىپ يۈردۈم كۇلاھۇ جەندە .
مەن شامەشرەپ ئەمەس خالايىق
تۇپراققا تالىق باشقا بىر بەندە .

-كولاپ چىققىنىڭلار كىمنىڭ بېشى ؟
-كاللا ئەمەس چوڭ بىر قاشتېشى .

كۆرۈنمەس قول ئاچتى كىتابنى ،
كېچە
ھەر بېتىدە تۈمەنمىڭ مىسرا ،
ئوقۇپ تۈگەت ئەڭ ئاخىرىغىچە .

2005-يىل 11-ئاينىڭ 21-كۈنى

مەنبە-« دېڭىزدىكى كوچا »