قەلب چىراغلىرى

كەۋسەر

قەلب چىراغلىرى



*** ئانا ئارزۇسى ئامانلىق ، ئاتا ئارزۇسى ئادىللىق .
*** ئانىسىز ئائىلىدە ئاش ، ئاتىسىز ئائىلىدە ئات بولماس .
*** يىلتىزى كۆپ دەرەخنىڭ نوتىسى ، بىلىمى كۆپ ئادەمنىڭ نۇتۇقى ياخشى .
*** بالاڭنىڭ بوي-بەستىنى بوينىدىن ، ئەقىل-ھوشىنى ئويىدىن بىل .
*** ياخشى پەزىلەتلىك ئادەم بىرى كۈن پاتقاندىن كېيىن ، يەنە بىرى كۈن چىقماستىن بۇرۇن باشقىلارنىڭ ئىشىكىنى قاقماس .
*** قايسى مەخلۇقنىڭ باش-ئايىقىغا چىۋىن كۆپ ئولىشىۋالغان بولسا ، شۇ مەخلۇقنىڭ رىزقى-نېسىۋىسىنىڭ تۈگەۋاتقانلىقىنىڭ ئىپادىسىدۇر .
*** ئاتا-ئاناڭنىڭ بىلىم –سەۋىيىسىنى بىلمەكچى بولساڭ ئۆز ئىسمىڭنىڭ مەنىسىنى سوراپ باق .
*** يات جىنىسلىقلارنىڭ بىر-بىرىنىڭ كۆزىگە تىكىلىپ قارىشى ئاشىقلىقنىڭ ( مۇھەببەتنىڭ ) ئىپادىسىدۇر .
*** ئالدىراڭغۇ ئادەمنىڭ يۈرىكى ، سۆرەلمە ئادەمنىڭ بۆرىكى ئىتتىك كاردىن چىقىدۇ .
*** چەۋەنداز مىنگەن ئاتنى مىنىمەن دېگەن ئادەم –بىر بولسا ئاتنى ، بىر بولسا ئۆزىنى كاردىن چىقىرىدۇ .
*** ناتونۇشتىن يول سورىما ، نامەردتىن پۇل .
*** شەھەر ئادەمنىڭ كۆزىنى ئېچىپ جىگىرىنى يىگىلىتەر ، سەھرا ئادەمنىڭ ئېغىزىنى ئېچىپ يۈرىكىنى يىگىلىتەر .
*** ئايالى ھۇرۇن ئەرنىڭ بېشى ، ئېرى ھۇرۇن ئايالنىڭ قورسىقى تولا ئاغرىيدۇ .
*** بەڭگىنىڭ كىيىمى ، دەڭچىنىڭ تېمى ساق تۇرماس .
*** بالىلىق خوتۇن كۈندۈزى ، بالىسىز خوتۇن كېچىسى غەمكىن ياشار .
*** بىر بالىنى باقماق بىر توپ پادىنى باقماقتىن قىيىن .
*** رەپىقىسى يوق ئەر ئەمەس ، رەقىبى يوق ئەر- ئەركەك .
*** لەقەمسىز يىگىت « يىگىت » ئەمەس ، لەقەملىك قىز « قىز » ئەمەس .
*** ھايۋاننىڭ قىلىقىنى قىلغان ئادەم ئەقىلسىز ، ئادەمنىڭ قىلىقىنى قىلغان ھايۋان ئەقىللىقتۇر .
*** ئانىسى پاكىزنىڭ قىلىقى تاتلىق ، ئاتىسى پاكىزنىڭ تىلى .
*** گەپنىڭ يامىنى غەيۋەت-شىكايەت قىلىش ، ئىشنىڭ يامىنى پىت-سىركە بېقىش .
*** بوۋاقنىڭ يىغلىشى ئاچلىقتىن ، بوۋاينىڭ يىغلىشى خارلىقتىن .
*** ئاتا-ئاناڭنىڭ پېشىنى سىلا ، بالىۋاقاڭنىڭ بېشىنى سىيلا .
*** بۇزۇقنىڭ كۇسىرى ، بۇدۇشقاقنىڭ كوزىرى تولا .
*** ئوغلۇڭنى ھېساب-كىتابچى ، قىزىڭنى ئىنساب-دىيانەتچى قىلىپ تەربىيلە .
*** ئىشنى چالا قىلىشقا كۆنۈك قىزنىڭ ئېشى كۆيۈك .
*** بىراۋنىڭ قەسىمىگە ئەمەس ، قەدىمىگە ئىشەن .
*** پۇتۇڭغا تىكەن كىرسە ئايغىڭدىن كۆرمەي ، كۆزۈڭدىن كۆر .
*** سېمىزنىڭ يۈرىكى ، ئورۇقنىڭ ئۆپكىسى تېز سېسىيدۇ .
*** ئىلگىرى ئازارلىشىپ قالغان ئادىمىڭ ئاش سۇنسا قوبۇل ئەتسەڭمۇ يېيىشكە ئالدىرىما ، چۈنكى ، ئۇ ئاشقا زەھەر ئارىلاشمىغان بولسىمۇ ، تۈكۈرۈك ئارىلاشقانلىقى ئېھتىمالغا ناھايىتى يېقىن .
          ئابدۇغېنى توغرۇلتېكىن

« شىنجاڭ مەدەنىيىتى » 2011-يىل 1-سانىدىن ئېلىندى .

ياشنار

سىزگە كۆپ رەھمەت........................

ئامان

شۇنداق ئېسىل دۇردانىلار ئىكەن، رەخمەت سىزگە!