بىزنىڭ پۇل
ئالاھىدىن ئابدۇرېشىت
بىزنىڭ پۇل(1)
ھالاللىقتا باھاسى يوق بىزنىڭ پۇل،
مىننىتى يوق-تاماسى يوق بىزنىڭ پۇل.
مۇئەللىم خەق يۇۋاش شۇنداق ئەزەلدىن،
تۇتۇۋالسا داۋاسى يوق بىزنىڭ پۇل.
پۇلى يوقنى پۇللۇق قىلىپ تۇرىدۇ،
يولى يوقنى يوللۇق قىلىپ تۇرىدۇ،
قولى يوقنى قوللۇق قىلىپ تۇرىدۇ،
كىم خەجلىسە بالاسى يوق بىزنىڭ پۇل.
بىرلىرىنى باشلىق قىلىپ قويىدۇ،
توپىنىنى ئاشلىق قىلىپ قويىدۇ،
خېنىمىغا قاشلىق قىلىپ قويىدۇ،
بۇلىۋالسا خاتاسى يوق، بىزنىڭ پۇل.
تۈگىمەيدۇ «ئىئانە» دەپ تۇتقانغا،
ئاي توشقىچە كۈندە ئەلەم يۇتقانغا،
پۇت سۇنىمىز قاراپ يەنە يوتقانغا،
تۇرماس بىركۈن قازاسى يوق بىزنىڭ پۇل.
شەھەرنىمۇ بىزنىڭ پۇلغا قۇرىدۇ ،
قۇرىدۇ-يۇ دەرھال بۇزۇپ تۇرىدۇ،
بۇنى دېسەك، ئويلاڭ كىممۇ سورىدۇ؟
قوغدايدىغان ھەقداسى يوق بىزنىڭ پۇل.
نامراتلارنى بىزنىڭ پۇلغا يۆلەيدۇ،
ئەللەي ئېتىپ ئۇخلىتىدۇ، بۆلەيدۇ،
بۇ بەدەلنى ئاھ، مۇئەللىم تۆلەيدۇ،
سېلىقلارغا ساداسى يوق بىزنىڭ پۇل.
باي قىلىمىز دېھقاننى دەپ باغ قىلىپ،
شۇ باغلاردا بۇلبۇل ئەمەس زاغ قىلىپ،
باغنى بۇزۇپ يۈرەكلەرنى داغ قىلىپ،
يۈتەر شۇنداق ئىزناسى يوق بىزنىڭ پۇل.
ئېلىپ قوغۇن-تاۋۇزنىمۇ باراڭغا،
مول ھوسۇلدىن چۈشەر تېخى پاراڭغا،
ھوقۇق بەرسە خەلق شۇنداق ساراڭغا،
نېمە قىلسا جازاسى يوق بىزنىڭ پۇل.
تېڭىپ ساتار بەزى چامغۇر، زەدەكنى،
ھەممە يەرنى قوناق تېرىپ مەدەكنى،
كىم تاپمايدۇ مۇئەللىمدەك «بەگەك»نى؟
كىرمەيدىغان كاماسى يوق بىزنىڭ پۇل.
ئايدىن-ئايغا بىرەر تىيىن قالمايدۇ،
سەۋەپ ئۇنى يالماۋۇزلار يالمايدۇ،
مۇئەللىم، ئۇ يەنە غەۋغا سالمايدۇ،
دەيدۇ تېخى جاپاسى يوق بىزنىڭ پۇل.
پۇل بولمىسا قورساققا نان بولمىسا،
نان بولمىسا پۇت–قولدا جان بولمىسا،
يا مۇئەللىم رەڭگىدە قان بولمىسا،
ئىشلىگەنگە ۋاپاسى يوق بىزنىڭ پۇل.
ئەللىك ياشتا ئۆي پۈتمىسە ئۆي تۇتسا،
(بىردان ئالسا باشقىلارغا چوقۇتسا)،
قان ساتامدۇ بالىلارنى ئوقۇتسا؟
قېنى دېسەڭ، گۇۋاسى يوق بىزنىڭ پۇل.
قالسا ئەگەر بىرەر تىيىن قېتىلىپ،
مىڭ قېتىمدا پۇرسەت ئاندا يېتىلىپ،
بۇلاڭچىلار كېلەر شۇئان ئېتىلىپ،
كەلمەيدىكەن غەۋغاسى يوق بىزنىڭ پۇل.
ئەۋەتسىمۇ ھۆججەت بىلەن مەركەزدىن،
ئۆسمەيدىكەن قۇتۇلالماي مەرەزدىن،
ھۆججەتلەرنى تېپىپ چىقساق ئەۋرەزدىن،
داۋرىڭى كۆپ، ئىجراسى يوق بىزنىڭ پۇل!
بىزنىڭ پۇل(2)
دەخلىسىزدى قانۇندا-سىياسەتتە بىزنىڭ پۇل،
ھالال ئىدى، ئۈستۈندى ئىناۋەتتە بىزنىڭ پۇل،
(بىزنىڭ بولغاچ قان-تەرھەم شىجائەتتە بىزنىڭ پۇل),
قالدى بۇلاڭ-تالاڭدا، نادامەتتە بىزنىڭ پۇل.
يوللىغاندا خامچوتنى مائاشنى ساق يوللايسەن،
بىرگە ئوننى قاتىسەن، ھۆكۈمەتنى گوللايسەن،
مۇئەللىمنى ئاغزىڭدا، قەغەزدىلا قوللايسەن،
چۆنتىكىڭنى توملايدۇ خىيانەتتە بىزنىڭ پۇل.
ئارقىسىغا سۆرەيسەن، «ئۆستۈر» دېسە پەرماندا،
چارە ئىزدەپ تاپقىچە بۆلۈشۈشكە پىنھاندا،
تولغۇشىسەن مۇئەللىم يالجىپ قالسا ئارماندا،
ئىگىسىنى تاپار مىڭ رىيازەتتە بىزنىڭ پۇل.
بىرگە مىڭنى تۇتىسەن يوچۇق تاپساڭ تۇتۇشقا،
پەرماندارنىڭ مەيلىنى بىزنىڭ پۇلدا ئۇتۇشقا،
قويماي ھەرگىز ئەتىگە، پۇرسەت ئىزدەپ يۇتۇشقا،
كەلگەن بىلەن بىزنىڭدەك قىياپەتتە بىزنىڭ پۇل.
ئاجىزلارغا-يوقسۇلغا مېھرىمىز لىق يۈرەك بار،
پۇل يەنە قان بېرىمىز، بىزدە شۇنداق تىلەك بار،
ئەپسۇس، تەگمەس، ئارىدا بىزگە«لازىم، كېرەك» بار،
ئالقىنىدا ھاتەمنىڭ ساخاۋەتتە بىزنىڭ پۇل.
بىر تىيىنغا تىك تۇرار دەيدۇ بىزنى ئۇقماسلار،
توڭگۇز بىلەن نەسىلداش، ئىلىم-ھېكمەت يۇقماسلار،
نېمە دېسە دېسۇن، ئۇ شۇم ئېغىزلار-ئىپلاسلار،
قويار بەزى بىزلەرنى ھاقارەتتە بىزنىڭ پۇل.
قازىنىدا خەخلەرنىڭ مۇئەللىمنىڭ ئېشى يوق،
ياڭاق ئالسا، چاققىلى سايدا پۇلسىز تېشى يوق،
كىيىم-كېچەك ئۆزىدىن، پوسمىلارغا بېشى يوق،
ئالتۇن ئۆزى پاكلىقتا-دىيانەتتە بىزنىڭ پۇل.
زۇكامدىسا دوختۇرغا پۇل تۆلەيدۇ ھەمياندىن،
خامان ئالماس سېنىڭدەك تۆت كۈن يېتىپ ئاسماندىن،
مۇئەللىمگە پۇل دەيدۇ يىڭنە چېغى ھەرياندىن،
بىرنى ئىككى قىلالماس تاپاۋەتتە بىزنىڭ پۇل.
دوغ پۇلىنى سېنىڭدەك تۆلەتمەيدۇ بىرىگە،
ھاراق ئىچىپ بىكارغا يۆلەتمەيدۇ بىرىگە،
بۆشۈكۈمنى تەۋرەت دەپ بۆلەتمەيدۇ بىرىگە،
بىزنىڭ ئەمەس سېنىڭدۇر، زىياپەتتە بىزنىڭ پۇل.
پۇل كېتىدۇ كېسەككە كوۋۇك قىلساق كەپتەرگە ،
بىزگە بىكار ئۆي نەدە ئىمزا قويساق دەپتەرگە؟
پۇلغا گاداي بولساقمۇ خوجايىن بىز دەرتلەرگە،
تۇرالمايدۇ بانكىدا-ئامانەتتە بىزنىڭ پۇل.
يۇقىرىغا ھال ئېيتساق، چوماقچىڭ بار، سوتلايدۇ،
قۇرۇپ قاخشال بولساقمۇ غولىمىزنى چوتلايدۇ،
شەربەت سېنىڭ، مۇئەللىم شۇڭا زەھەر ئوتلايدۇ،
بىزنىڭ بولار قاچان ھەق-ئادالەتتە بىزنىڭ پۇل؟
نېمە قىلساڭ ھەق دېدۇق، چۈنكى، ئەمەل-تەختىڭ بار،
تەختىڭ بولغاچ ئەشۇنداق نەخ ھارامدىن بەختىڭ بار،
نومۇسۇڭ يوق، ۋە لېكىن «خەلق» دېگەن ئەھدىڭ بار،
ئالار ھامان گېلىڭدىن قىيامەتتە بىزنىڭ پۇل!
مۇئەللىمنىڭ ھالىنى بايان قىلدىم، ئاڭلاپ قوي،
تېخى مىڭدىن بىرىنى ئايان قىلدىم ئاڭلاپ قوي،
ئۆزۈم بىلىپ تۇرىمەن، يامان قىلدىم، ئاڭلاپ قوي،
«سوۋغاتلىققا ئاز مەن» دەپ خىجالەتتە بىزنىڭ پۇل!... بۇ يازمىنى ئاخىرىدا ئامان تەھرىرلىگەن. ۋاقتى 2012-8-9 20:34
| 
قىزغىنلىق
تىللا
تۆھپە
شۆھرەت
يوللىغان ۋاقتى 2012-8-9 19:50:54
يوللىغان ۋاقتى 2012-8-9 20:22:16
يوللىغان ۋاقتى 2012-8-9 20:41:02
يوللىغان ۋاقتى 2012-8-10 07:51:22