باھالاش ئۆمىكىنى قارشى ئېلىش نۇتقى
ئالاھىدىن ئابدۇرېشىت
خىزمەتلەرنى تەكشۈرۈپ كېلىڭ كۈندە ئىمكان بار،
سىزنى كۈندە كەلسە دەپ بىزدە ئارزۇ-ئارمان بار،
كېلىڭ، نەدە بىز ئۈچۈن سىزدەك ئەزىز مېھمان بار؟
قىزغىن قارشى ئالىمىز، چاۋاكمۇبار، دەرمان بار،
ئىش توختۇتۇپ كۈتىمىز، سىزدە ئالى پەرمان بار.
كۈن چۈش بولدى، باھالاش-تەكشۈرۈشتىن خەۋەر يوق،
توۋا، ئەجەپ كۈن بولدى، خۇشاللىقتىن ئەسەر يوق،
دوكلات قىلىش-تەكشۈرۈش-تەتقىقاتقا مۇنبەر يوق،
خىزمەتلەرگە يېتەكچى، سىزدەك قابىل رەھبەر يوق،
ئالدىڭىزغا بېرىشقا يوللار يىراق، داۋان بار.
يولىڭىزغا پايانداز سالدۇق تاۋار-ئەتلەستە،
ھەر تەرەپتىن ياڭرايدۇ ئالقىش سادا بەس-بەستە،
ياش-گۈدەكلەر سالامدا، تۇتۇپ چوغلۇق گۈلدەستە،
كۆرۈنمەيدۇ قارىڭىز بىراق، بىزنىڭ دىل خەستە،
كەلمەسمۇ دەپ ئاھ، سىزنى بۈگۈن شۈبھى-گۈمان بار.
كۆزلىرىمىز تۆت بولدى، قۇلقىمىز شەپىدە،
مىڭلاپ مېھمان ئەپ كېلىڭ ھېچ بولمىسا ھەپتىدە،
خىزمەتتە دەپ بىلىمىز، ئويناڭ تويدا-پەتىدە،
تەكشۈرۈشنىڭ داۋامى باردۇر تالاي ئەتىدە،
ئىشەنچىمىز كامىلدۇر، سىزدە يۈكسەك نىشان بار.
ئىشخانىدا ئولتۇرساق بۇيرۇق دېگەن ئاقمايدۇ،
سىزگە يەنە پايدا-نەپ، راھەت كۈلۈپ باقمايدۇ،
چۈشمىسىڭىز تۆۋەنگە ئىش چوڭلارغا ياقمايدۇ،
چۈشتىڭىزمۇ بولدى بەس، كىم سىزگە گۈل تاقمايدۇ؟
تاغنى تالقان قىلىسىز، چۆللەردە باغ-بوستان بار.
تەكشۈرۈشكە ئات قويۇپ بىلىپ كېلىڭ ئۆزىڭىز،
خىجىل بولماڭ ھەرگىزمۇ، قىزارمىسۇن يۈزىڭىز،
خىزمەت ئىشلەش نە ھاجەت گەركۆرمىسە كۆزىڭىز،
بىزنى ئالغا باشلايدۇ دانا باھا-سۆزىڭىز،
پەقەت سىزلا بولسىڭىز بىزگە پۈرسەت-دەۋران بار.
تەكشۈرىسىز مودىلنى بارماي يېزا، قىشلاققا،
سىزنى باشلاپ كۈتىمىز ئاۋات شەھەر-ئايماققا،
«تەكشۈرۈش»دەپ يازىمىز دوكلاتنىمۇ ئاتاققا،
شان-شەرەپنى ئالىمىز چىقىپ بىللە پەشتاققا،
ئاستىمىزدا يەر گۇۋاھ، ئۈستىمىزدەئاسمان بار...
راسا ئىچىپ مەي -شاراپ، كۆڭۈل ئېچىڭ ساز بىلەن،
شورپا سالدۇق پاقلاندا، كاۋاپ قىلدۇق غاز بىلەن،
قىز-چوكانلار كۈتىدۇ يالىڭاچ تەن-ناز بىلەن،
سىزنى يولغا سالىمىز تازنى يېپىپ ماز بىلەن،
خاتالىقتىن قورقمايمىز، شاھلاردىمۇ نۇقسان بار.
تەييارلىدۇق سىز ئۈچۈن شاختىن يىرىپ مىۋىنى،
يەشىكلەرگە قاچىلاپ تۇخۇم، گۆش ۋە پىۋىنى،
ئېپ كېتەرسىز قايتاردا چالا قويماي بېرىنى،
ئالۋاڭ-ياساق يېتەركەن تويغۇزۇشقا دىۋىنى،
كۆنۈپ كەتكەن بۇيرۇققا بىزنىڭ ئىشچى-دېھقان بار.
يەپ-ئىچكەنگە تۈگىمەس داشقازاننىڭ ئېشىنى،
بېلىق تۇتساق لېيىتىپ سۈزۈك سۇنىڭ بېشىنى-
تۇيدۇرمىساق بولدىغۇ، تۆكۈپ ئەلنىڭ يېشىنى،
شۇئار توۋلاپ پاكلىق دەپ، تۇتۇپ چوڭلار پېشىنى،
بولسا جۈرئەت سىز-بىزدە يەپ-ئىچىشكە مەيدان بار..
بىزگە نېمە كېرىكى قۇرۇق ئەمەل تۇتقاننىڭ؟
سوزالمىساق پۇت-قولنى يەنەكۆرپە-يوتقاننىڭ؟
مىڭ جاپادا كۆز بوياپ ئەل رايىنى ئۇتقاننىڭ؟
يەپ-ئىچەلمەي قانغۇدەك، ئاخىر ھەسرەت يۇتقاننىڭ؟
تەكشۈرسىڭىز سىزدە ھەم بىزدە شۇنداق مىزان بار.
مەيلى چىرىك ئەمەلدار دېسە بىزنى ئۇققانلار،
چىرىكلىشەر ئۆزىمۇ ئەمەل يۇقى يۇققانلار،
تۇتالامدۇ ئەمەلنى سۆز-چۆچەكتىن قورققانلار؟
يۆلەر بىزنى يۇقىرى-تۆۋەندىكى تۇققانلار،
جانغا خەۋپ يەتسىمۇ داۋالاشقا لوقمان بار.
دېمەڭ شەنبە-يەكشەنبە، ئوچۇق سىزگە يولىمىز،
ئۆيدە كىرنى يۇيۇشقا تەگمىسىمۇ چولىمىز،
دەم ئېلىشقا رۇخسەت يوق، سىزگە ھەمراھ بولىمىز،
چاترىقىڭىز بولسىلا، تەييار بىزنىڭ قولىمىز....
«ھە-ھۇ » ئۈچۈن يارالغان بىزدە تالاي ئىنسان بار.
كەلمىسىڭىز كۈندە بىر، بىزگە ئوبدان پۈرسەت يوق،
ئەلگە سەۋەپ كۆرسىتىپ يەپ-ئىچكۈدەك نېمەت يوق،
باش تارتالماي خىزمەتتىن ئويۇن، كۈلكە-راھەت يوق،
ئەتە-ئۆگۈن دەپ يۈرمەڭ، تەكشۈرۈشكە مۆھلەت يوق،
يولىڭىزغا تۈندىمۇ ياققان ئۇلۇغ گۈلخان بار! بۇ يازمىنى ئاخىرىدا alahidin تەھرىرلىگەن. ۋاقتى 2012-8-9 17:40
| 
قىزغىنلىق
تىللا
تۆھپە
شۆھرەت
يوللىغان ۋاقتى 2012-8-9 17:40:28
يوللىغان ۋاقتى 2012-8-9 19:14:54
يوللىغان ۋاقتى 2012-8-9 21:30:47
يوللىغان ۋاقتى 2012-8-10 07:35:47
