شېئىر ، شۆھرەت ۋە مەن

كەۋسەر

مۇھەممەتجان راشىدىن


قەلەمنى ئالغىنىم يوق شۆھرەت ئۈچۈن ،
يۈكسەكلىك تالاشمايمەن ھېچكىمدىنمۇ .
مۇرادىم-ئەلنىڭ مەندىن مەمنۇنلۇقى ،
ئەپسۇسلار ئاڭلىغىم يوق ھېچ دىلدىنمۇ .

قولۇمدا شائىر لوتۇن تۇتقان قەلەم ،
ئىزىدىن ماڭدىم مەنمۇ نەۋائىينىڭ .
مەنزىلىم-شۆھرەت دېسەم قالمامدىمەن
مەن ئوخشاپ دەل ئۆزىگە سەۋدايىنىڭ .

شەيتاندۇر دوستى شۆھرەتپەرەسلىكنىڭ ،
ئۈندىمەس كۆڭلۈم مېنى شۇ ئىللەتكە .
ئەقلىنى نام-ئاتاققا بەرگەنلەرنىڭ ،
قەلبىنى ئوخشىتىمەن بىر زۇلمەتكە .

سايەمگە قاراپ ماڭسام كوچىلاردا ،
كۈلىدۇ بىلمىگەنلەر سەۋەبىنى .
غادىيىپ قالدىممۇ ، دەپ ئەنسىرەيمەن ،
شۇ تەشۋىش ئەگىپ يۈرەر ھەردەم مېنى .

ياراشماس تاغلارغىمۇ تەكەببۇرلۇق ،
ئاسمان بار ئۇنىڭدىنمۇ چۈنكى ئېگىز .
قانچىكى پەستە بولسا شائىر كۆڭلى ،
ئەل ئۇنى كۆرىدىكەن شۇنچە ئەزىز .

ئېسىلسۇن ئېسىلغانلار ئېگىز شاخقا ،
زەررىچە تارلىقىم يوق ئەزبىرايى .
ۋە لېكىن مەن يادىڭغا سېلىپ قوياي ،
پەستىدۇر يۈكسەكلىكنىڭ ئەسلى جايى .

مەيدەڭنى كېرىۋالما ، مىسرالىرىم ،
بىر قۇلنىڭ ئاۋازى سەن خەلق ئۈچۈن .
ئەگىپ ئۆت يولدا شۆھرەتپەرەسلەردىن ،
دوسىت بولما ھەمدە شۇنداق قەلب ئۈچۈن .

ئاڭلارمەن ماختاشلارنى مەنمۇ ، ئەمما
كىيمەيمەن زەر تونىنى ماختىنىشنىڭ .
پاك يولى-قەلەمدىنمۇ پەسرەك يۈرۈش
مەن ئۈچۈن رەزىللىكتىن ساقلىنىشنىڭ .

ئاشقىنىم راستتۇر ، بەلكى بىرەر قىردىن ،
تاغ ئاشتىم دېسەم ، ئۆلەي كۇپۇرلۇقتىن .
چىن شائىر چىقار ئىكەن شۆھرەت ئەمەس ،
ئەل بەرگەن رىزقى ئۈچۈن شۈكۈرلۈكتىن .

ھەسەتنىڭ ئوچىقىغا ئوت قالىغان ،
ياراشماس ماڭا ئۇنداق قىتىغىرلىق .
ئۆرلىسۇن ، كامال تاپسۇن ھەركىم دەيمەن ،
تۇتمايمەن شۇ قەلبىمنى قىلچە سىرلىق .

نەپ بىلەن ئۆلچىمەيمەن ئادەملەرنى ،
ئۆلچەيمەن پەزىلەتنىڭ قېلىپىدا .
ياخشىلار بىزار بولغان مەلئۇنلارنىڭ ،
ئەجىلى شېئىرىمنىڭ قىلىچىدا .

مىنمەيمەن ماختىنىشنىڭ تۇلپارىغا ،
قۇرلارغا قىستۇرمايمەن مەنمەنلىكنى .
كۈيلىرىم ئادەت قىلۇر ئابرۇي ئەمەس ،
خەلقىمنىڭ يۈرىكىگە ھەمدەملىكنى .

قەلەمنى ئالغىنىم يوق شۆھرەت ئۈچۈن ،
يۈكسەكلىك تالاشمايمەن ھېچكىمدىنمۇ .
مۇرادىم-ئەلنىڭ مەندىن مەمنۇنلۇقى ،
ئەپسۇسلار ئاڭلىغىم يوق ھېچكىمدىنمۇ .


ئانا تاغلار دىن ئېلىندى .

زەپەر

مۇھەممەت جان راشىدىنننىڭ شىئېرلىرىنىمۇ ناخشىچىلار ناخشا تىكىس قىلىپ ئۇقۇۋاتىدىغۇ دەيمەن . قەلىمى بەك وتكۈردە ئۇ شائىرنىڭ .