سۇ قەدرى ( شېئىر )

كەۋسەر

سۇ قەدرى ( شېئىر )


تامچە سۇغا تەلمۈرۈپ گىياھ ،
قاغجىرىدى ، قۇرىدى -يۈتتى .
تەشنا زېمىن يېرىلدى ئىڭراپ ،
تاغلار ئاشقان كەلكۈننى كۈتتى .

دەل-دەرەخلەر سۈكۈتكە چۆمگەن ،
ياپرىقىغا قونمىغان بىر قۇش .
ئەسكى تامدا ، جىگدە شېخىدا ،
ئەنسىز ئۈندە سايرايدۇ ھوقۇش .

غەرب تەرەپ قاراڭغۇ شۇنچە ،
ھۇۋۇلدايدۇ ئالجىغان قۇيۇن .
ئادەملەرنىڭ كۆڭلى پەرىشان ،
قۇرۇغدىلىپ ھەشەمەت سورۇن .

سۇ ھاياتلىق مەنبەسى جاننىڭ ،
ئوزۇقىدۇر يىلىك ۋە قاننىڭ .
غاپىللىقتا ئۆتكەن ھاياتتا ،
قەدرى بولماس ئاۋات كۈنلەرنىڭ .

نەزىرىنى تاشلاپ باياۋان ،
چۆل-جەزىرە قىلماقچى يۇرتنى .
يېشىللىققا پۈرگەنگەن دىيار ،
باشلىماقچى قوينىغا ھۇتنى .

دۇنيا ئۇلۇغ ، ئىنسانلار ئۇلۇغ ،
بار ئۈمىدتە كۆكلەر تەبىئەت .
ئەلمساقتىن يۈكسېلىپ كەلگەن ،
بەرپا بولۇپ ئىناق جەمىئەت .

ئاداشقاندۇر بەلكى بىر پىرقە ،
ھەق يولىدىن ۋە دەستۇرىدىن .
غەپلەت ئىچرە مۈگدەكلەر بېسىپ ،
ئامەت قاچقان ئوڭ ۋە سولىدىن .

يىتەر بەزى يادىمغا توپان ،
نوھ قەۋمىنى باسقان شۇ قىيان .
ئۇندا دەھشەت بالايىئاپەت ،
بەخش ئەتكەن بارچىغا ھىجران .

ئەركەكلىكتىن چەتنىگەنسېرى ،
يوقىلىدۇ ئىنساپ دىيانەت .
لۇت قەۋمىدەك بەچچىلەر ئېشىپ ،
تاشلار سوقۇپ كېلىدۇ ئاپەت .

قايتىپ كەلگىن يىراق كەتمىگىن ،
ئىلكىمىزگە ئەي قىممەت پۇرسەت .
نېىسپ ئەيلە بۇلاق سۈيىدىن ،
تاپاي مەنمۇ شېرىن بىر لەززەت .

بەلكى قايتىپ ئادىمىيلىككە ،
يىڭىباشتىن چۈشەي تۇغۇلۇپ .
تەشنا دىلغا بېرىپ تەسەللى  ،
دەريالاردا ئاقاي سۇ بۇلۇپ .

كەۋسەر يازمىسى

ئامان

بۇ شېئىرىڭىز تېخىمۇ ياخشى چىقىپتۇ، بۇ شېئىردا تەبىئەت بىلەن ئادەم، سۇ بىلەن ئادىمىلىك خىسلەت ئوتتۇرىسىدىكى مۇناسىۋەتلەرنى پەلىسەپە نوختىسىدىن چىقىپ، ناھايىتى ئوبدان يۇرۇتۇپ بېرىپسىز. رەخمەت سىزگە، قەلىمىڭىز تېخىمۇ بەرىكەتلىك بولغاي.