بالا دەردى

كەۋسەر

بالا دەردى

بالادەردى بەك يامان ئىكەن ،
مىڭ جاپادا باققىنىڭ بىلەن .
چوڭايسىمۇ گەر يەنە بالاڭ،
ئوت سۈيىدە ئاققىنىڭ بىلەن .

توۋا دەيمەن بۇ بالىلارنىڭ ،
ئادەم بولماي يۈرۈپ كەتكىنىنى .
خاتىرجەملىك بەرمەي بىر ئۆمۈر ،
يۈرەك باغرىم خۇن ئەتكىنىنى .

نەچچە سۆزلەپ تەربىيە بەرسەم ،
« ماقۇل » دەپلا تۇرغىنى تۇرغان .
چاغلاپ ئۆزى دائىم ئاشۇنداق ،
كۆڭلۈمگە « مۇش » ئۇرغىنى ئۇرغان .

«-ۋاي ئاتا ، مەن تۈرمىگە چۈشتۈم ،
خەجلەپ كۆپ پۇل قۇتقۇزۇڭ مېنى.
يورۇق دۇنيا ئەسلى ياخشىكەن،
بالىڭىزنىڭ قىينالدى جېنى ».

مۇشۇ سۆزنى دىگەن نەچچە رەت ،
توۋا قىلغان ئىچكەن ۋە قەسەم .
تەكرارلىنىپ كەتتى جىنايەت ،
ناپاكلىقتىن يانمىدى قەدەم .

بالا دەردى قېرىتىپ مېنى ،
يۈرىكىمگە دەرت ئەلەم سالدى .
سايە تاشلار ئەزرائىل بەزى ،
كۆزلىرىممۇ كۈرۈشتىن قالدى .

ئەي -،جان بالام  ئىچىڭ ئاغرىسۇن ،
مەندەك ئاجىز قېرى داداڭغا .
تەن ۋۇجۇدۇم يىگىلەپ كەتتى ،
تەشنا بولدۇم سېنىڭ قاراڭغا .

كۆڭلۈمنى قىل تىنىچ خاتىرجەم ،
ياشانغاندا يېمەي مەنمۇ غەم .
قاقشىتىپلا ئۆتسەڭ مېنى سەن ،
يانار كېيىن ساڭا بىر مەرتەم .

نەسىھەتكە سالمىساڭ قۇلاق،
ئۆلتۈرۈپلا تۈگەتكىن مېنى .
كەلسە قانداق خىيالىڭغا ئىش ،
قىل ھېچكىممۇ توسمايدۇ سېنى .

كەۋسەر يازمىسى

ئامان

ياخشى يېزىپسىز بۇرادەر، ئاتا-ئانىلار بالىلارنىڭ غېمىدە نىمىلەرنى قىلمايدۇ دەيسىز؟! بۇنى پەقەت ئاتا- ئانا بولغان ۋاختىمىزدا ھىس قىلىپ يېتەلەيمىز، ئەپسۇس ئۇ چاغدا تولىمۇ كېچىكىدىكەنمىز.
رەخمەت، مۇشۇنداق لىرىك شېئىرلىرىڭىز ئۈزۈلۈپ قالمىغاي!

ئاينۇر

بەك ياخشى يېزىپسىز قەلىمىڭىزگە بارىكاللا