4 شېئىر
غوجىمۇھەممەد مۇھەممەد
سۆيگۈنىڭ رەسىمى يىرتىلغان يۈرەك
قاراڭغۇ ئىشىكتىن كىرگەندە قۇياش،
ۋەتەن دەپ باشلىنار كۆزۈمدىكى خەت.
يىغلايدۇ ئۆلۈك ئات كۆزىدەك غۇۋا،
سۆيگۈنىڭ رەسىمى يىرتىلغان يۈرەك.
ئەڭ مىسكىن يۇلتۇزنىڭ كۆز يېشى بىلەن
قەلبىمنى يۇيىمەن تىترەپ ئاھ، تىترەپ.
ئايدىڭدا سۇ تۇتقان قوناقلىقتىكى
بىر قىزنىڭ كۆڭلىكى يەلپۈنەر لەپ- لەپ.
ئەسلىمە ئوخشايدۇ كونا چاپانغا
مەن ئۇنى سالمايلا ئۇخلاپ قالىمەن.
كوچىدا ئۇچرىتىپ قالساڭ سەن مېنى
يۈزىنى يۇمىغان ئاشۇ بالىمەن.
قەلبىمنى سورىما...
قەلبىمنى سورىما، ئۇ بىر پۇچۇق جام،
شارابلار تۆكۈلدى گۈلنىڭ بەرگىگە.
ھاياتىم كۈن پاتقان قاراڭغۇ كىتاب،
تۆلەيمەن مەن ئۇنى سۆيگۈ قەرزىگە.
كۆڭلۈمنى سورىما، ئۇ بىر دىۋانە،
ئىشىكىڭ ئالدىدا تۇرغان نان تىلەپ.
دۇنيانى قۇچاقلاپ تۇرغان قولۇمدا
ئۆزۈمنى قۇچاقلاپ باقسام بىر نۆۋەت.
سورىما سەن مېنىڭ ھېكايەمنى ھەم،
مۇھەببەت دەردىدە خۇشال بىر ئازاب.
ئۆلۈمدىن كىينكى مەلۇم بىر كۈنى
يول ئالغان دوزاختىن جەننەتكە قاراپ!
كۈتۈش بىر سەنئەت...
كۈتۈشمۇ بىر سەنئەت كۆيۈپ، ئۆرتىنىپ
نامەلۇم دىلبەرنى ئۈنسىز- ئۈمىدسىز.
ئۇسسۇل ئويناپ، ناخشىلار توۋلاپ
شېئىرغا كىرگەندە ھەسرەتلىك بىر قىز.
ئۇپۇقنىڭ قاراڭغۇ قىرغاقلىرىدا
ئارمانلار يانغاندا پىل- پىل ۋە خىرە.
ئۈمىدمۇ بىر سەنئەت، ئۆلۈك كۆزىدە
قالغاندەك ھاياتتىن قانلىق مەنزىرە.
يۇلتۇزلار قۇياشنىڭ ئىزلىرىدۇر ھەم
ماڭغاندا كېچىدىن تاڭغا ئالدىراش،
سەنئەتتۇر ئازابتىن ياندۇرۇپ چىراغ
زۇلمەتلىك ھاياتتا نۇر چېچىپ ياشاش!
تونۇش بىر ئۆلۈمنى قالدىم ئۇچرىتىپ
تونۇش بىر ئۆلۈمنى قالدىم ئۇچرىتىپ،
تۇتتۇم مەن قولىنى، باشلىدىم ئۆيگە.
ئېلىپ ئۇ قوينىدىن يوق بىر كىتابنى،
ئوقۇدى: ھاياتنىڭ مەنىسى- ئۆلۈم! ...
تونۇش بىر ناخشىنى قالدىم ئۇچرىتىپ،
تۇتتۇم مەن قولىنى، باشلىدىم ئۆيگە.
ئېلىپ ئۇ قوينىدىن چالدى بىر سازنى:
ناخشىنىڭ مەنىسى- ياردىن ئايرىلىش!...
تونۇش بىر ئايالنى قالدىم ئۇچرىتىپ،
تۇتتۇم مەن قولىنى، باشلىدىم ئۆيگە.
دېدى ئۇ لېۋىمگە سۆيۈپ تۇرۇپ، ئاھ:
سۆيۈشنىڭ مەنىسى- ئەر بىلەن ئايال!...
تونۇش بىر تەقدىرنى قالدىم ئۇچرىتىپ
تۇتتۇم مەن قولىنى، باشلىدىم ئۆيگە.
چەكسىز دەرد- ھەسرەتتە بېشىنى ئېگىپ
دېدى ئۇ: ئادەمنىڭ مەنىسى- تەقدىر!...
تونۇش بىر شېئىرنى قالدىم ئۇچرىتىپ،
تۇتتۇم مەن قولىنى، باشلىدىم ئۆيگە.
ئالدى ئۇ قەلەمنى، يازدى بىر مىسرا:
..............................
چۈمۈلۈپ قاتمۇ- قات مەنىسىزلىككە.
ئۇچرايدۇ ھەر كۈنى تونۇش- بىلىشلەر،
تۇتۇپ مەن قولىنى، باشلايمەن ئۆيگە.
سۆزلەيدۇ مەنىسىنى زوق بىلەن ئۇلار،
تاكى قالمىغۇچە زەررىچە مەنە!...
مەنبەسى :يازغۇچىلار مۇنبىرى | 
قىزغىنلىق
تىللا
تۆھپە
شۆھرەت
يوللىغان ۋاقتى 2012-8-5 21:27:59
يوللىغان ۋاقتى 2012-8-5 21:46:53