ھايات-ئۆلۈم بوسۇغىسىدا

كەۋسەر

ھايات-ئۆلۈم بوسۇغىسىدا

كەۋسەر

بەلكىم ئۆلۈم ۋەھىمىسىنى ،
ھېس قىلىسەن قانىسا يۈرەك .
ھايات –ئۆلۈم بوسۇغىسىدا ،
ئىشقا ئاشسۇن قانداقمۇ تىلەك ؟

گويا يىلان كەبى سوزۇلغان ،
ماي يولىدا كېتىپ باراتتىم .
ماشىنىدىن ياڭرىغان ناخشا ،
زوقۇم بىلەن تىڭشاۋاتاتتىم ...

مەنزىلىمگە بېرىشقا يېتىپ ،
قالدى يەنە ئوتتۇز چاقىرىم .
سىرىتتىن شامال ئۇرۇپ تۇرىدۇ ،
تەكرارلىنىپ ئوخشاش بىر رېتىم .

سۈرئەت ئەللىك ئاتمىش ئەتراپتا ،
ئەمدى كەلدىم شېغىللىق يولغا .
شاراقشىغان تاشنىڭ ئاۋازى ،
قارىتىدۇ گاھى ئوڭ-سولغا ...

تۇيۇقسىزلا ئوڭدىكى يولدىن ،
چىقىپ كەلدى موتۇلۇق كىشى .
كۆرۈپ ئۇنى تەشۋىشكە پاتتىم ،
رولنى تارتتىم ئوڭ ئېگىلىشى ...

بىراق شۇچاغ ئۈستى موتومۇ ،
ماشىنامنىڭ كەينى چاقىغا .
تورمۇز قىلدىم بەكمۇ ئەندىكىپ ،
بىردەم چىقىپ قالدىم ياقىغا .

يارنىڭ لېۋى كەلدى بويلىشىپ ،
كونترولنى يوقاتتىم بىردىن .
كۆمتۈرۈلدى ئەمدى ماشىنام ،
ئېگىز داۋان پەسكە سىيرىلدىم .

تۆت-بەش سېكۇنت ئىچىدە مانا ،
ئەزرائىلغا سالامغا كەلدىم .
بىراق ، رىسقىم باركەن يەنىلا ،
ساق قۇتۇلدۇم بۇ چاغ ئەجەلدىن .

كۆزۈم ئاچسام ماشىنا تەتۈر ،
تۆت چاقىمۇ قاراپ ئاسمانغا .
بېشىم ئۈستى ، دومىلىدىم ھەم ،
پاناھ ئىزلەپ قاراپ ھەريانغا .

شۇ دەقىقە ۋاقىت ئىچىدە ،
ئەسكە ئالدىم تاتلىق قىزىمنى .
ھالال جۈپتۇم ۋە تۇغقانلىرىم ،
ھەم جاپاكەش ئەزىز ئانامنى .

مەن تېخىچە تۇرىمەن ھايات ،
شۈكرى دېدىم تۆكۈلدى يېشىم .
ئۇلۇغ ئىگەم ياغدۇرۇپ شەپقەت ،
ئامان قالدى بۇ ئالتۇن بېشىم ...

ۋەقە سادىر قىلغان موتوچى ،
تىترەپ تۇرار ئالدىمغا كېلىپ .
قىلمايدۇ سۆز ھەتتا بىر ئېغىز ،
تارتىدۇ ئۇھ ، ئىچىگە تىنىپ  .

ئەپۇ قىلدىم تالاشمىدىم ھېچ ،
ھەر ئىككى جان ئامان قالدى دەپ .
ئېيىتتى خەلق :« سەبرى قىلىڭلار »  ،
بولمىسا ئىش كېتىدۇ ئەدەپ ...

.
پەقەت بىرلا كېلىدۇ ھايات ،
چىقسا جېنى كېتىدۇ ئادەم .
گۈل-چېچەككە قونسا جۇت-بوران ،
ئوراپ ئالار كۈلكىنى ماتەم .

2011-يىلى 7-ئاينىڭ7-كۈنى

زەپەر

كەۋسەر ئەپەندىم بەلەن شىئىرلارنى يوللاۋاتىسىزغۇ . مۇنبىرىمىزگە  يەنە بىر شائىردىن بىرسى قۇشۇلاپ مۇنبىرىمىزنىڭ  تەرەققىياتى ئۈچۈن بىر كىشلىك ھەسسىڭىزنى قۇشۇپ كىلىۋاتىسىز ، مەن مۇنبەر نامىدىن سىزگە ئالىي ئىھتىرام بىلدۈرمەن. رەخمەت سىزگە