چۈشكە قايتىش

كەۋسەر

چۈشكە قايتىش


ئادىل تۇنىياز


تاڭ يىپلىرىدا،
رۇجىكىڭنى  
ئۇلاپ قويۇپ رۇجەكلىرىمگە ،
پىچىرلىشايلى تاتلىق چۈشلەرنى .
سەن ئېيتىپ بەر چۈشۈڭنى ماڭا ،
مەن ئېيتىپ بېرەي چۈشۈمنى ساڭا .
كىم بىلىدۇ ھەر ئىككىمىزنىڭ  
ئەڭ ئاخىرقى ئوخشاش بىر چۈشى .
مەڭگۈلۈك بەخىتنىڭ  
   باشلىنىشى بۇلامدۇ تېخى ؟
يا ئازابلىق رېئاللىقنىڭ  
   مۇقەددىمىسى ؟
كېلىپ قالساڭ ئۇخلاۋاتقان چېغىمدا ،
كىرپىكىمگە ئىلىندۈرۈپ قوي ،
چوكىلدىتىپ سۆيۈشلىرىمنى !
قالدۇرۇپ كەت ،
   تامچە يېشىم ئۈستىدە ،
قەيسەرانە كۈتۈشلەرنى .
سەن چۈشىگەن چىناردا  
ئۇۋىلىسا مېنىڭ قۇشلىرىم ،
مەن چۈشىگەن گۈلزاردا  
پورەكلىسە سېنىڭ گۈللىرىڭ ،
بېغىڭدىكى سۆيۈملۈك ئالما
بېرەلەرمۇ كەچكۈزدە ماڭا
شاخ-شېخىدا ساڭگىلاپ تۇرغان  
ئالما كەبى ئوتلۇق يۈرەكنى .

ئانام تىكىپ بەرگەن شاپاق دوپپامنى  
كالا باققان يەرلەردە  
     يۈتتۈرىۋەتكەندەك ؛
ئاناڭ چىگىپ قويغان گۈل ياغلىقىڭنى ،
ئوت ئالغان ئېتىزدا ئۇنتۇپ كەتكەندەك ؛
ئۇنتالىشىمىز مۇمكىن قانچە رەت ،
بىرلا قېتىم كۆرگەن شۇ چۈشنى ؟!

بۇزۇلسىمۇ چۈشىمىز بىزنىڭ ،
دۇنيا يەنە قالار قىز پېتى .

سىغدۇرمىغاندەك  
بىر ۋاقىتتا ئاي بىلەن كۈننى ،
سىغدۇرمىسا بىزنى رېئاللىق ،
يۈر ! قولۇڭنى بەر !
قايتىپ كېتەيلى گۈزەل چۈشلەرگە .


1990-يىل 2-ئاي ، قاغىلىق .

مەرىپەت

ياخشى يېزىلغان شئېركەن