ھاياتلىق پەلەمپىيى
ئاكا - ئۇكا ئىككىيلەننىڭ ئۆيى 80-قەۋەتتە ئىكەن. بىر كۈنى ئۇلار ساياھەتكە چىقىپ قايتىپ كەلگەندە، بىنادا توك توختاپ، لىفىت ئىشلىمەي قاپتۇ. شۇنىڭ بىلەن بۇ ئىككىيلەن سومكىلىرىنى يۈدۈپ پەلەمپەي بىلەن ئۆيىگە چىقماقچى بولۇپتۇ. ئۇلار 20-قەۋەتكە چىققاندا ھېرىپ قاپتۇ. ئاكىسى: «سومكىلارنى مۇشۇ قەۋەتتە قوپقويۇپ، توك كەلگەندە لىفىت بىلەن ئېلىپ چىقىپ كېتەيلى» دەپتۇ. شۇنىڭ بىلەن ئۇلار سومكىلىرىنى 20-قەۋەتكە قوپقويۇپ، داۋاملىق ئۆرلەپتۇ. ئۇلار كۈلكە-چاقچاق بىلەن 40-قەۋەتكە چىققاندا بەكلا ھېرىپتۇ. ئۇلار يەنە يېرىم مۇساپىنىڭ بارلىقىنى ئويلاپ، نېمە ئۈچۈن بىنادا توك توختايدىغانلىقى توغرىسىدىكى ئۇقتۇرۇشقا دىققەت قىلمىغانلىقىدىن رەنجىشىپ، بىر - بىرىنى ئەيىبلىشىپتۇ. ئۇلار شۇنداق رەنجىشىپ 60- قەۋەتكە چىقىپتۇ. بۇ چاغدا ئۇلارنىڭ بىر-بىرىگە تاپا-تەنە قىلىشقۇدەك ھالى قالماپتۇ. ئۇكىسى ئاكىسىغا: «بولدى بىز ئۇرۇشماي، ئاۋۋال ئۈستىگە چىقىۋالايلى» دەپتۇ. شۇنداق قىلىپ ئۇلار ئاخىرى 80-قەۋەتكە چىققاندا، ئاچقۇچنىڭ 20-قەۋەتتىكى سومكىدا قالغانلىقىنى بىلىپ، ئازىراق قىيىنچىلىقتىن قېچىپ سومكىلىرىنى يېرىم يولدا تاشلاپ قويغىنىغا ئۆكۈنۈپتۇ...
بۇ دۇنياغا كۆز ئاچقاندىن باشلاپ تاكى ئۆمرىمىزنىڭ ئاخىرىغىچە ھەر بىر كۈن بىز ئۈچۈن پۇرسەت ۋە سوۋغا. ھەر كۈندىكى ئالغان قەدەملىرىمىز، قىلغان ئىشلىرىمىز كېيىنكى نەتىجىمىز، مۇۋەپپەقىيىتىمىز، شۇنداقلا ئارزۇلىرىمىزنىڭ ئەمەلگە ئېشىش-ئاشماسلىقىنى بەلگىلەيدۇ. نېمە بولۇشىدىن قەتئىينەزەر، نىشانىمىزنى ئېنىق قىلىپ، ئۈزلۈكسىز تىرىشساقلا ھاياتىمىز ھەقىقىي قىممەتكە ۋە مەنىگە ئىگە بولالايدۇ. ئەمما، ھاياتلىقتا كۆپىنچىلىرىمىز تۈرلۈك بېسىم، قاقشاش، قىيىنچىلىقتىن ئۆزىنى قاچۇرۇش، غايىسىزلىك، ئىرادىسىزلىك ۋە باشقا سەۋەبلەر تۈپەيلى كۈنلىرىمىزنى مەنىسىز ئۆتكۈزۈپ، ھەر بىرىمىز ئۈچۈن نىشان ۋە غايە، شۇنداقلا بۇ يولدا ئۈزلۈكسىز تىرىشىش ۋە ئاكتىپ پوزىتسىيەنىڭ بولۇشىنىڭ تولىمۇ مۇھىملىقىنى ئەستىن چىقىرىپ قويىمىز.
يۇقىرىقى ھېكايىنى ھاياتىمىزغا ئوخشىتىشقا بولىدۇ. بىز 20 ياشتىن بۇرۇن ئاتا-ئانىمىز ۋە ئوقۇتقۇچىلارنىڭ غەمخورلۇقىدا ياشايمىز. تۈگىمەس تاپشۇرۇق، ئىمتىھان، ئاتا - ئانىلارنىڭ بىزدىن كۈتىدىغان ئۈمىد-ئارزۇلىرى بىزگە «يۈك» تەك بىلىنىدۇ. ئۇنىڭ ئۈستىگە ئۆزىمىزمۇ تېخى پىشىپ يېتىلمىگەن بولغاچقا، ئۆز ئالدىمىزغا ئىش تۇتۇپ، ئۆز يولىمىزغا مەزمۇت قەدەم تاشلىيالىشىمىز قىيىن. 20 ياشتىن كېيىن ئەتراپىمىزدىكىلەرنىڭ بېسىمىدىن قۇتۇلغاندەك بولىمىز - دە، بار كۈچىمىز بىلەن ئارزۇلىرىمىزغا يېتىش ئۈچۈن تىرىشىمىز. بىراق، خىزمەت، ئائىلە ۋە جەمئىيەتتىكى تۈرلۈك مۇناسىۋەتلەر ھەلەكچىلىكىدە بۇ ئارزۇلىرىمىزنى ئۇنتۇشقا باشلايمىز. 40 ياشقا كىرگىنىمىزدە، ياشلىقىمىزنىڭ ئاللىبۇرۇن ئۆتۈپ كەتكەنلىكىنى بايقايمىز - دە، ئىختىيارسىز ئەپسۇسلىنىش ۋە پۇشايمان ئىچىدە قالىمىز. 60 ياشقا كەلگەندە، كېيىنكى كۈنلىرىمىزنى قەدىرلەشنى ئويلاپ ئۆمرىمىزنىڭ ئاخىرىنى ئۆتكۈزىمىز. ھاياتلىقنىڭ ئاخىرقى پەللىسىگە يېتىپ بارغىنىمىزدىلا، ئۆزىمىزنىڭ قانداقتۇر بىر ئىشلارنى قىلىپ بولالمىغانلىقىمىزنى ئەسكە ئالىمىز. بۇ دەل بىزنىڭ گۈزەل ئارزۇ-ئارمىنىمىز بولۇپ، بۇ ئارزۇ - ئارمانلىرىمىز 20 ياشتىكى ياشلىق باھارىمىزدا قالغان.
دېمەك، ھاياتىمىزدىكى ھەر بىر پەلەمپەي ئەمەلىيەتتە شۇ قەدەر گۈزەل ۋە نۇرغۇن پۇرسەتكە تولغان. ياشلىقتا بالىلىقىنى ئەسلەيدىغان، ئازراقلا قىيىنچىلىققا ئۇچرىسا «ئېسىت، چوڭ بولمىسام بوپتىكەن؟!» دەيدىغان، 40 - 50 ياشقا كىرگەندە ياشلىقىنى ئەسلەيدىغان، ئاغرىپ يېتىپ قالغاندا، ساقلىقنىڭ قەدرىگە يېتىدىغان ئەھۋاللار رېئاللىقىمىزدا مەۋجۇت. ھاياتلىق پەلەمپىيىدە ئادەم پەقەت غايىسى ۋە ئارمانلىرى بىلەنلا تېگىشلىك نەتىجىگە ئېرىشەلەيدۇ. پۇرسەت مەڭگۈ تەييارلىقى بار ھەم دەرھال ھەرىكەتلىنەلەيدىغانلارغا مەنسۇپ! بىز نەپەس ئېلىۋاتقان دەقىقىنى ھاياتتىكى ئەڭ گۈزەل چاغ دەپ قاراش ۋە ئۇنى قىممەتكە ئىگە قىلىش ئۈچۈن تىرىشىشىمىز كېرەك.
«پوزىتسىيە ھەممىنى بەلگىلەيدۇ» دېگەن قاراش بۈگۈنكى كۈندە نۇرغۇن كىشىنىڭ بىردەك ئېتىراپ قىلىشىغا ئېرىشمەكتە، شۇنداقلا ئۇ كىشىلەرنىڭ ھاياتلىقتىكى مەسىلىلەرگە بولغان قارىشىغا تەسىر كۆرسەتمەكتە. پوزىتسىيەنىڭ ھاياتىمىزغا كۆرسىتىدىغان تەسىرىگە ھەقىقەتەن سەل قارىغىلى بولمايدۇ. بىزدە كۈنسېرى ئومۇملىشىۋاتقان قاقشاش، «خەققە نېمە بولسا ماڭىمۇ شۇ» پىسخىكىسى بىزدىكى تىرىشچانلىق ۋە ئۈمىدۋارلىقنى يەپ كېتىۋاتىدۇ. ئىنسانىيەت دۇنياسىدا ئىرادىسىزلار ئۆز قەدىر-قىممىتىنى بىلمىگەنلىكى ئۈچۈن پۈتۈنلەي يارامسىز ئەھۋالغا چۈشۈپ قالىدۇ. ھاياتتىكى مەقسەت ئىنسان قەدىر-قىممىتىنىڭ ۋە بەختىنىڭ ئاساسىدۇر. شۇڭا، ھاياتتا ئۆز غايىمىز ئۈچۈن ئۈزلۈكسىز تىرىشىشىمىز ۋە بۇ جەرياندا يولۇققان قىيىنچىلىقلارغا دادىل يۈزلىنىپ، خۇشال ۋە قەيسەر ياشىشىمىز كېرەك. شۇندىلا ھاياتلىق پەلەمپىيىنىڭ ھەر بىرىنى مەزمۇت بېسىپ كۆزلىگەن پەللىگە چىقالايمىز.
مەنبە: جۇڭگو ئۇيغۇرچە رادىئو تورى بۇ يازمىنى ئاخىرىدا ئامان تەھرىرلىگەن. ۋاقتى 2012-8-2 23:51
| 
قىزغىنلىق
تىللا
تۆھپە
شۆھرەت
يوللىغان ۋاقتى 2012-8-2 19:27:27
يوللىغان ۋاقتى 2012-8-2 21:06:30
يوللىغان ۋاقتى 2012-8-2 23:48:36
يوللىغان ۋاقتى 2012-8-2 23:59:10