رۇبائىيلار (ئەركىن داۋۇت ئوغۇزى)

tursun123

بىل ۋاقىت ھەر نەرسىدىن قىممەت بولۇر،
ئەجىر قىلساڭ بال كەبى نىمەت بولۇر.
ئالسىمۇ بىر كۈن جىنىڭنى شۇم ئەجەل،
قالغىنى ئەلگە ئىجاد-مىھنەت بولۇر.

خۇش بولارمەن بىرسى جەڭگە چىللىسا،
كۆرسۈتۈپ ئەيىبىمنى پات-پات تىللىسا.
شۇ يوسۇنداياغدۇرۇپ تەنبىھ ماڭا،
نۇرلىنىپ خۇددى قۇياشتەك ئىللىسا.

كۈچ، ئەقىل ئەلەم سىرىنى پاش ئىتەر،
قۇدرىتى ئاسمانۇ ھەم يەرگە يىتەر.
بۇ ئەجەلنىڭ سىرىنى بىلمەي كىشى،
ئۇشبۇ ئالەمدىن ئۇزاپ بىر كۈن كىتەر.

يورغىلاپ بەك تىز ئۆتەر ئاي، يىل دىگەن،
شۇنچە نازۇك بۇ ھاياتتا دىل دىگەن.
دىلنى-دىلغا خۇددى زەنجىردەك چېتىپ،
يايرىتار ئىنساننى تاتلىق تىل دىگەن.

ئاي يۈزۈڭنى مەن كۆرەي ئاچ دىلبىرىم،
مىھرىبانلىق نۇرىنى چاچ دىلبىرىم.
بۇ ھايات سەيناسىدا غۇۋغا تولا،
ئوغرى، مەككاردىن يىراق قاچ دىلبىرىم.

سېنى چىن سۆيگەن گۈزەل جانان بولۇر،
نەدە بولسا سەن بىلەن بىر جان بولۇر.
چۈشسىمۇ دۈشمەن قولىغا ئۇ ئەگەر،
قىلما ئەندىش سىرلىرىڭ پىنھان بولۇر.

كۆرمىەەنلەر كۆرسە بەك ،ھەيران بولۇر،
ئىشقىدا گۈلنىڭ كۆيۈپ ۋەيران بولۇر.
يىغمىسا گەر نەپسىنى ئاچ بۆرىدەك،
ئىزگۈ-ۋىجداندىن يىراق شەيتان بولۇر.



مەنبە: تارىم ژورنىلى2002-يىل 8-سان

ئامان

ئەركىن داۋۇت ئەپەندىنىڭ شېئىرلىرى شۇنداق ئېسىل جۇمۇ؟!
تىلى يۇمشاقىقى، ئەكس ئەتتۇرگەن مەزمۇنىنىڭ  چوڭقۇرلىقى بىلەن ئادەمنىڭ ئوقۇغانسېرى ئوقۇغۇسى كېلىدۇ.

يورغىلاپ بەك تىز ئۆتەر ئاي، يىل دىگەن،
شۇنچە نازۇك بۇ ھاياتتا دىل دىگەن.
دىلنى-دىلغا خۇددى زەنجىردەك چېتىپ،
يايرىتار ئىنساننى تاتلىق تىل دىگەن.

ئۆزى قىسقا، ئەمما مەزمۇنى چوڭقۇر. مۇشۇنداق ياخشى شېئىرلار بىلەن ئۇچراشتۇرغىنىڭىزغا كۆپ رەخمەت بۇرادەر.