كەچتىكى خىيال

كەۋسەر

كۆزۈڭنى ئېچىپ كەينىڭگە قارساڭ ئۆتمۈشۈڭ گويا بىر سىقىم كۈل كەبى ھېچنىمە چىقمايدىغان تولىمۇ يىراقلارغا ئۇزاپ كەتكەن ؛ سەن بەلكىم دەقىقە ئىچىدە ئەسلەپ ئۆتۈشكە جەريان تاپالمايسەن . ھايات مۇساپىسى مانا شۇنداق ، ئويلىساڭ ناھايىتى ئۇزۇن ، ئەمما ئۆتمۈشكە قايتىشىڭنى كۆز ئالدىڭغا كەلتۈرگىنىڭدە ئۇ تولىمۇ قىسقا بىر خىيال بولۇپ ۋۇجۇدۇڭنى ئۆرتەيدۇ ، كۈنلەر ئۆتمەكتە ، ئايلار ئۆتمەكتە ، يىللارمۇ گۈكىرىگەن پېتى ئات چېپىپ كەلمەكتە ، ۋاقىت بېشىڭنى كۈمۈش رەڭگە ئورىغاندا ئۆزۈڭنىڭ پانىي ئالەمدە ئىزسىزلا ياشاپ كەلگىنىڭگە ئىشىنىسەن . كۈنسېرى يېقىنلاپ كېلىۋاتقان ئۆلۈم مۇئەككىلىنىڭ شەپىسى سېنى چۆچۈتىدۇ ، ئويلاندۇرىدۇ ، غەمگە –مۇڭغا چۆمدۈرىدۇ . ھەر كېچە ئۇخلاپ ئويغىنىپ ئۆزۈڭنىڭ تېخى باقىغا سەپەر قىلمىغىنىغا ئىشەنىچ قىلىسەن . تۇرمۇش ، ھايات ھەلەكچىلىكىدە ئىجتىمائىيەتنىڭ تۈرلۈك-تۈمەن قايناملىرىغا چۈشۈپ ، ئادەملەر بىلەن ، تەبىئەت بىلەن ئۇچرىشىسەن مۇناسىۋەت قىلىسەن . ئەمما مەڭگۈلۈك ھەقىقەت-ئۆلۈم سېنىڭ يالغۇز قالغىنىڭدا خىيال ئالىمىڭنى خالىغانچە كېزىپ ، ساڭا چىدىغۇسىز ۋەھىمە بەخش ئېتىدۇ ، ياخشى –يامان ئەمەللىرىڭ ھەققىدە تەپەككۇرغا چۆكىسەن ، ئويلايسەنۇ ئاخىرىنى چۈشۈرەلمەيسەن ، خۇلاسەڭنىڭ نۇرغۇن يەرلىرى كەمتۈك پېتى قالىدۇ . تېنىڭ ئاجىزلاپ بۇرۇنقى ماغدۇرۇڭ ، كۈچ-قۇۋۋىتىڭ ، چىدامچانلىقىنىڭ سەن بارغانسېرى خوشلاشقاندا قېرىشقا باشلىغانلىقىڭغا تەن بېرىسەن ،تۈنۈگۈن بالا ئىدىڭ ، بۈگۈن يىگىت بولدۇڭ ، ئەتە يەنە تېخى ئاتا بولىسەن ، ھاياتلىق يولى ئۈزۈلمەيدۇ . بىر چاغلاردا سەن قۇچىقىڭغا ئېلىپ بېقىپ بەرگەن تۇغقانلىرىڭ ، قوشنىلارنىڭ بالىلىرى بۈگۈن قارىساڭ ساقال باسقان ئەزىمەتلەرگە ئايلانغان ~
بىر خىل كەيپىيات مېڭەڭنى ئوغرىلاپ ساڭا ھاياتنى يەكۈنلىگىدەك پۇرسەت بەرمەيدۇ . ۋاقىت كەينىڭدىن ئىتتىرىپ كەسىپكە ، مۇناسىۋەتكە ھەيدەپ سېنىڭ ھەركىتىڭگە ئۆزلۈكسىز قوماندانلىق قىلىدۇ .
مال-دۇنيا كۆپەيگەنسېرى ئۇنىڭغا بولغان ھېرىسلىقىڭ دېڭىز سۈيىدەك ئۇلغىيىدۇ ، يولدىمۇ شۇ خىيال ، ئۆيدە ، يوتقاندا –ھەتتا تېخى ئىبادەتلىرىڭدىمۇ تۈگىمەس پايدا-زىيان سان-سىفېرلار ئارىسىدا قالىسەن . كېتىۋېتىپ ئازىسەن ، بەزى كەينىڭگە يانىسەن ، ئىنساننىڭ كۆرمىشلىرى ئۇنىڭغا شۇنداق بىر پۇرسەتنى ئاتا قىلغانكى ، ئىنسان ئۆزىنىڭ شەخسىيەتچىلىكى تۈپەيلى ، مەنپەئەتكە زىيادە بېرىلگەنلىكى سەۋەبلىك يۈكسەكلىككە ئىنتىلگەن پاكىزە قەلبلىرنىڭ سادالىرىنى ئۇنتۇيدۇ .بىر دەملىك ھەۋەس ياكى بىر دەملىك تەشۋىش بىلەن ئۆمۈرلۈك پۇشايمانغا قالىدىغان ئىشلارنى سادىر قىلىدۇ ، بىلىپ تۇرۇپمۇ قىلىدۇ ، بىلمەي تۇرۇپمۇ ھەم ~تەۋبە قىلىسەن كەينىدىن شۇنداق پاتقاقلارغا ئۆزۈڭنى ئاتىسەن .
ئادەم ئاتا جەننەتتىن زېمىنغا قايتۇرۇلغاندىن تارتىپلا ئادەملەر ئازغۇنلۇقتىن ئۆزىنى تارتالماي ياخشى بىلەن –يامان ھامان گىرەلىشىپ كەلدى ، دۇنيا قارمۇ-قارشىلىقنىڭ تەرەققىيات بىرلىكىدە چېلىشىپ كەلدى . لېكىن بىر لا نەرسىدە پەقەتلا ئۆزگىرىش بولسىمۇ –مەڭگۈلۈك ھەقىقەت ئۆلۈم .
ئۆلۈمنى ئەسلەش ئاقىل ، ھوشيار ئادەملەرنىڭ خىسلىتى ، ئۆلۈمنى ئۇنتۇش –غاپىل ، ئاسىي بەندىلەرنىڭ ئىپادىسى .

مەنبە-كەچتىكى ئېگىز-پەس خىياللىرىم .

كەۋسەر يازمىسى
2012-يىلى 7-ئاينىڭ 28-كۈنى

زەپەر

كەۋسەر ئەپەندىم ، يېقىندىن بۇيان ئۆزىڭىزنىڭ ئىجادىي يازمىلىرىڭىزنى يوللاپ مۇنبەرنىڭ جانلىقلىقىنى ئاشۇرۇشقا تۆھپە قوشۇۋاتىسىز . داۋاملىق تىرىشىڭ .
ئىنساننىڭ ئۆمرى ناھايىتى قىسقا بولىدۇ .ھەركۈنى بىز يىراق-يېقىندىن نۇرغۇن كىشىلەرنىڭ پانىي ئالەم بىلەن خوشلىشىپ باقى ئالەمگە سەپەر قىلىۋاتقانلىقىنى ئاڭلاپ ۋە كۆرۈپ تۇرىۋاتىمىز . شۇنداق بولغان ئىكەن بۇ قىسقا ھاياتلىقنى قەدىرلەش كېرەك . ئۆمرىمىزنى چوقۇم مەنالارغا باي ھالەتتە تامام قىلىشقا ئىنتىلىشىمىز كېرەك . تېخىمۇ كۆپ نادىر يازمىلارنى يوللاپ تۇرۇشىڭىزنى ، بۇ ئارقىلىق مۇنبىرىمىزنىڭ گۈللىنىشىگە ھەسسە قوشۇشىڭىزنى ئۈمىد قىلىمىز .

umid0998

ھەقىقەتەن ياخشى يىزىلغان نەسىر ئىكەن، ماڭا بەك يارىدى. مومكىن بولسا نەشىرىياتقا ئەۋەتىپ نەشىر قىلدۇرۇڭ. سىزدىن ئۇمىدىم، مۇشۇنداق نادىر ئەسەرلەرنى داۋاملىق يوللاپ تۇرسىڭىز، بايقاش تورىمىزنىڭ تەرەققىياتىغا تىخىمۇ كۆپ تۆھپىڭىز قوشۇلغۇسى،
بۇندىن كىيىنكى ئىجادىيتىڭىزگە مۇۋەپپىقىيەت يار بولسۇن.

ئامان

ھەقىقەتەن ياخشى يېزىپسىز، تىل ئىشلىتىش قابىلىيىتىڭىز ھەقىقەتەن ياخشى ئىكەن. سۆز-جۈملىلەرنىڭ باغلىنىشى، باش،ئوتتۇرا ۋە ئاخىرىدىكى پىكىر ئىزچىللىقىنىڭ راۋانلىقى ھەقىقەتەن مېنى قايىل قىلدى. يەنە نەسىرنىڭ ئاخىرىدىكى يەكۈن:

ئۆلۈمنى ئەسلەش ئاقىل ، ھوشيار ئادەملەرنىڭ خىسلىتى ، ئۆلۈمنى ئۇنتۇش –غاپىل ، ئاسىي بەندىلەرنىڭ ئىپادىسى .

ماڭا بەك يارىدى. رەخمەت سىزگە، مۇشۇنداق نادىر يازمىلىرىڭىز بايقاش مۇنبىرىدىن ئۈزۈلۈپ قالمىغاي.