ساتىرا- شەنبىدە

admin

شەنبىدە

(ساتىرا)

ئابدۇرېشات مۇساجان توغرۇل

قاچانلاردا دەم ئېلىش بولغاي نېسىپ شەنبىدە؟
مەرىكىگە كۆپ چېپىپ كەتتىم ھېرىپ شەنبىدە.

ئىدى ئەسلىي دەم ئېلىش، بولدى ئەمدى غەم سېلىش،
تۆكمە بولۇپ مەرىكە كەتتى سېسىپ شەنبىدە.

«شېكەر شەنبە» ئىدى ئۇ، «زەھەر شەنبە» بولدىغۇ،
يانچۇق كولاپ غەم بىلەن يۈردۈم كېزىپ شەنبىدە.

ئۈچ كۈن بۇرۇن تۇشمۇ تۇش باغاق ياغار يامغۇردەك،
كۆپلۈكىدىن باغاقنىڭ كەتتى ئېزىپ شەنبىدە.

سالام قىلىپ ئۆتكەننىڭ جازاسىمۇ بىلمىدىم،
ئانام-ئاتام كۆرمىگەن باغاق يېزىپ شەنبىدە.

پاتماي قالسا شەنبىگە يەكشەنبە بار توۋىسى،
نۆۋەت بىلەن بەسلىشىپ قاتار تىزىپ شەنبىدە.

نەۋرە-چەۋرە تويلىرى، بۆشۈك توي، قۇلاق تەشمە...
قۇرۇدى يانچۇق مانا قويماي بېرىپ شەنبىدە.

بوۋاي-موماي تويلىرى، خەتمە توي ھەم غۇنچە توي،
تۇغۇلغان كۈن، ئۆلگەن كۈن... قالدۇق چېنىپ شەنبىدە.

ئۆي سالسىمۇ مۇبارەك، ئۆي ئالسىمۇ مۇبارەك،
ئۆيدىن ئۆيگە كۆچسىمۇ تەبرىك قىلىپ شەنبىدە.

ئۆگزە ئالسا بىنادىن مۇبارەككە قاتارى،
ئېلىپ سېتىپ تاپاۋەت كەتتى قىزىپ شەنبىدە.

بازار تېپىپ باغاق زاۋۇت قۇردى باسارغا،
بىزگە دەپ يۈز ئارقىلىق قىممە سېتىپ شەنبىدە.

كۆپەيگەچكە مەرىكە ئېشىپ باردى سوۋغىتى،
مائاش قانچە؟ پۇل قانچە؟ غەمگە پېتىپ شەنبىدە.

مەرىكىمۇ، تىجارەت، ئادەتمۇ يا تاپاۋەت،
بۇ قىلىقلار چېكىدىن كەتتى ئېشىپ شەنبىدە.

مۇبارەكلەش ئۆز ئارا بولغان تۈزۈك ئەمەسمۇ؟
نە ئىش خەقنى غۇدۇرىتىش، نىزا تېرىپ شەنبىدە.

ئازدۇق، ئەمدى ئازمايلى، باغاقنى كۆپ يازمايلى،
ئەخلاق بىلەن يۈرەككە قولنى سېلىپ شەنبىدە.

خىزمەت يۈكى، ئۆي يۈكى، يىتەر كۈلپەت، بولدى بەس،
راھەتلىنىپ ياشايلى ئارام ئېلىپ شەنبىدە.

مەنبە: «كېرىيە ژورنىلى»1-سان

◤pari◥

بەك ياخشى يېزىلغان شېئىركەن بۇ  تەشەككۇر شائىرىمىزغا تەشەككۇر!!!
شەنبىنىمۇ يوللاپسىز ، ئارقىچىلا يەھشەنبىنىمۇ يوللىۋېتىڭە ، ياقتۇردۇم يوللىغان شېئىرىڭىزنى رەھمەت !!

ئامان

يارايسىز، ئادمىن ئەپەندى. ئارقى-ئارقا يوللىغان ساتىرالىرىڭىز ئەجەپ ئېسىل-ھە!
ئابدۇرېشات ئەپەندىم قالتىس شائىردە. ئۇ ‹‹ باشلىق كېلىدۇ›› قاتارلىق بىر يۇرۇش نادىر شېئىرلىرى بىلەن داڭ چىقارغان ئىدى، بۇ شېئىرنىمۇ قالتىس يېزىپ قويۇپتۇ.
سىز يوللىمىغان بولسىڭىز تېخىچە كۆرمەي يۈرىيدىكەنمەن. رەخمەت سىزگە.

زەپەر

رەخمەت سىزگە ئادىمىن ئەپەندى. بۇ يوللىغان ساتتىرانى ئۇقۇغانسىرى ئۇقۇغىسى كىلىدىكەن  . بولسا ياخشى تىمىلاردىن بىزنىمۇ بىرگە خەۋەردار قىلىپ تۇرشىڭىزنى ئۈمۈت قىلىمەن.

دىلكەش

ياخشىكەن.

زىبالىق

ھەقىقەتەنمۇ رىئاللىق ئەكىس ئەتتۇرۇلگەن شئىر ئىكەن.رەھمەت .

مائارىپ

دەل بىزنىڭ ھازىرقى تۇرمۇشىمىزدىكى رىئال ئەھۋاللارنى بەكلا ئۇچۇق ئەكىس ئەتتۈرۈپ بېرىپتۇ. دېمىسىمۇ شەنبە، يەكشەنبە ئادەمگەرچىلىكنىڭ دەستىدىن ئارام ئالغىلىمۇ بولمايدۇ. نىمانچە كۆپ ئادەمگەرچىلىك بۇ

saba007

ناھايتى ياخشى تىمىكەن، تۇرمىشىمىزدىكى رىئاللىق جانلىق سۈرەتلىنىپتۇ.