بىر سائىلنىڭ رىسالىسى

كەۋسەر

بىر سائىلنىڭ رىسالىسى


روزى سايىت

قول ، پۇتى ساق ، قەلبى چولاق توكۇرمەن ،
غۇرۇر سېتىپ مۇتقا ، توقۇم توقۇرمەن .
سىياقىمدا بىچارىلىك ، مىسكىنلىك ،
بارغان يەردىن « چالما » يۈدۈپ قوپۇرمەن .
پارچە-پۇرات سەدىقىگە خوشۇم يوق ،
چوڭ-چوڭ بەرسە ئاندىن رەھمەت ئوقۇرمەن .
ساددىلارغا ئېيتارىم شۇ :« دادام يوق ،
پۇلسىز ، كېسەل -ئۈچەيلىرىم سوقۇرمەن .
ئانام قارىغۇ ، ئاكام پالەچ ، ئىنىم گاس ،
ئاھ ، نامراتلىق ...» دەيمەن تىنىپ چوڭقۇر مەن .
« سېخىيلارنىڭ جايى جەننەت ! » شۇ گەپتە
يانچۇقىنىڭ ئاغزى چىڭنى نوقۇرمەن .
ئالىقان ئېچىپ ، دۇئا چېچىپ ، كۆز ياشلاپ ،
بەرمەسلەرنىڭ ئىنسابىنى چوقۇرمەن .
خەقنى ئالداپ تاپقىنىمنى ھەر ئاخشام
تاۋىكاغا خەجلەيدىغان موخۇرمەن .
ئاكام تىمەن ، ئانام ساپمۇساق ، دادام بار ،
( ئاغزى شالتاق ، لەۋزى يالغان كۇپۇرمەن ) .
ياتار جايىم تۇغ-شەددىلىك گۈمبەزدە ،
نىكاھىمدا ئىككى خوتۇن-پوخۇرمەن ...
قول قاپارتىپ يۈرمىسەممۇ ، يېنىم توم ،
رىزقى كەڭرى ، ئەقلى چولتا « خور-خور » (1) مەن .
باغرى يۇمشاق مىللىتىم بار بەرگىلى ،
بەرگەنسېرى قىچىشقاقتەك يۇقۇرمەن .
نامىم سائىل ، ھېچنەرسىدىن كېمىم يوق ،
خۇدا بەرگەن «ھالى ئېگىز ئوقۇر » مەن .
كېمىمغۇ يوق ، يۈرەك پوك-پوك غېمىم بار ،
يۇرت شەنىگە  داغ ، ساقايماس قوتۇرمەن .
دەپ قالسا ئەل : « ئىشلەپ يېگىن ئالدامچى ! »
ھالىم چاتاق ، ئۇچاغ ئوپۇر-توپۇرمەن ...
« ئانا تىلىم زەر تىلىم » دىن ئېلىندى.

زەپەر

مەرھۇم رۇزى سايىتنىڭ شىئىېرلىرىنى مەنمۇ بەك ياقتۇرۇپ ئۇقۇيمەن.  مەرھۇمنىڭ ياتقان جايى جەننەت بولغاي. ياخشى تەربىيەۋىي ئەھمىيتى بار شىر يوللاپسىز.

بوسۇغا

مەرھۇم روزى سايىتنىڭ ئىجادىيەتلىرىنى يوللىغىنىڭىنىزغا رەھمەت.

راۋاپچى

رەھمەتلىكنىڭ نادىر شىئىرىدىن بىرنى بىزلەر بىلەن ئۇچراشتۇرغانلىقىڭىزغا كۆپتىن كۆپ رەخمەت.
بەك خۇشھال بولدۇم.

بۇغداي

مەنمۇ بەك ياقتۇرىمەن مەشھۇر دېھققان شائىرى رۇزى سايىت شىئىرلىرىنى. شائىرنىڭ ئۆتكۇر پىكىرلىك دۇردانىللىرىنى ئوقىغان ۋاقتىمدا خىيالغا پېتىپلا قالىمەن. رەخمەت سىزگە.