ياشلىق
ياشلىقىم ! ھەي گۈلدەك چېغىم كەتتىڭ قايان ،
ھەسرىتا ! قەدرىڭنى مەن بىلمەپتىمەن .
نامازشامدەك ۋاقتىڭ سېنىڭ قىسقا ئەجەپ ،
بۇنچە تېزلا كېتەر ئۇزاپ دېمەپتىمەن .
كەتتى ئۇچۇپ قۇشلار كەبى قاياققىدۇر ،
قانچە قىلسام قايتماس ئارتقا بۇ ياشلىقىم .
بېشىم قويۇپ قوينۇڭدا بەك ئۇخلاپتىمەن ،
كۈنلەر ئۆتۈپ خورىماقتا ھەم شاشلىقىم .
چۈشتى قىراۋ چاچ-ساقالغا قاردەك گويا ،
گۈل-بېغىمنىڭ ئەتىۋارى قالدى نەدە ؟
ئاڭلانمايدۇ بۇلبۇل –كاككۇك ئۈنى ھەتتا ،
قاغجىرىغان گۈل-گىياھلار چۈشۈپ يەرگە .
گەرچە ھەركۈن قۇياش پاتسا مەغرىبكە ،
كۈتۈرۈلۈپ چىقار يەنە شەرقتىن .
بىراق ، ياشلىق كېتىدىكەن بىر يولى ،
كەلمەيدىكەن قۇچاق ئېچىپ كەينىدىن .
قەدرىڭ بىلگەن چېغىمدا ئەي ياشلىقىم ،
چەكسىز يىراق پەرۋاز قىپسەن توختىماي .
ئەسلى ھەر كۈن ئامانەتكەن ئۆمۈرنىڭ ،
قانداق چىداي ئەمدى ھەرگىز يىغلىماي .
ئەسلى ياشلىق ئىلىم-بىلىم كانىكەن ،
راۋاج تېپىپ ، ئالغا بېسىش ۋاقتىكەن .
ھەر قەدەمدە بەركەتلىك ئىز قالدۇرۇپ ،
بىكارچىدىن يىراق تۇرغان ياخشىكەن .
بەڭباشلىقتا كېزىپ كوچا ھەر كويدا ،
كەيپ سۈرۈپ كۈنۇ-تۈندە مەست-ئەلەس .
جىسمۇ-روھى زەھەرلەنگەن بىخۇت بوپ ،
ئۇ ھەقىقى ئۇيغۇر يىگىتى ئەمەس .
نى مەشھۇرلار ئۆتكەن ياشاپ بۇ دىيار ،
« مەھمۇد » ، « يۈسۈپ » ،« سۇتۇق بۇغرا »، يۈكنەكى .
ياشلىقىدا ئەجر قىلغان ، تەر تۆكۈپ ،
ھەر بىر ئىنسان« پەرز » بۇنى بىلمەكى .
زېھنى ئوچۇق ئالتۇن ۋاقىت بۇ ياشلىق ،
ئۆتكۈر مەرگەن ئوقياسىدەك شىددەتلىك .
توسسا دۈشمەن ، يۈرىكىنى تىلغايدۇ ،
كۆرىنىدۇ باتۇر شۇنچە ھەيۋەتلىك .
ياشلىقىمىز ئۆتكۈنچىدۇر بەك قىسقا ،
بارلىقىدا ئۇنىڭ قەدرىن بىلەيلى .
ئىلمۇ-ئىرپان باغلىرىدىن گۈل ئۈزۈپ ،
ھەر بىر كۈنگە سىرۇ-ھېكمەت تىلەيلى .
ياشلىقىدا ئۆگەنسە گەر ھەر كىشى ،
قېرىغاندا قېپقالمايدۇ ھېچ ئىشى .
ئۆتكەن كۈندىن رازى بولساق كۇپايە ،
تېپىلمايدۇ بۇنىڭ ھەرگىز تەڭ-تۇشى .
ئەزرائىل ئىزدەيدۇ سېنى بىر كۈنى ،
شۇ ئەزىز تېنىڭدىن ئېلىشقا جاننى .
ئۆلۈمدۇر مەڭگۈلۈك سۇنماس ھەقىقەت ،
قەدىرلە ئۆمرۈڭدە دوستۇم ياشلىقنى .
مەنبە-ئۆزۈم
| 
قىزغىنلىق
تىللا
تۆھپە
شۆھرەت
يوللىغان ۋاقتى 2012-7-19 18:06:33
يوللىغان ۋاقتى 2012-7-19 19:41:00
