ئۆلمىسۇن ( شېئىر )
( مۇسەببە )
ئىمىنجان كېرىم ( ئاقشەھىرى )
يۇلتۇز بولۇپ چاقنىغان نۇرلۇق چېھرى ئۆلمىسۇن ،
قۇياش كەبى پارلىغان ئىللىق مېھرى ئۆلمىسۇن ،
تۈمەن دىلنى يورۇتقان تۆھپە -ئەجرى ئۆلمىسۇن ،
ھەرقەدەمدە شان قۇچقان ئەقىل-زېھنى ئۆلمىسۇن ،
ئىلىم-ئىرپان نۇرچاچقان ئالتۇن قەسرى ئۆلمىسۇن ،
رەڭدار گۈللەر ئېچىلغان جەننەت بېغى ئۆلمىسۇن ،
بارچە دىلغا زەپ ياققان خىسلەت-سېھرى ئۆلمىسۇن .
سۆيگۈ-ۋىسال رىشتىنى ئەۋلاتلارغا باغلىغان ،
مەرىپەتنى قورال قىپ ھەقىقەتنى ياقلىغان ،
سەبىيلەرنى كۈلدۈرۈپ قەلبى ئەجەپ يايرىغان ،
چېكىپ تۈمەن مۇشەققەت يول-ئىزىدىن تايمىغان ،
توسقۇنلارنى مات ئەيلەپ ھەر قەدەمدە تازىلىغان ،
يۈرەكلەرنى ياشناتقان چىمەنزارى ئۆلمىسۇن ،
مەرىپەتتىن نۇرلانغان ئارمانلىرى ئۆلمىسۇن .
چاقنار ھەرچاغ قەلبىدە ھەمراھ بولۇپ دىيانەت ،
يالقۇنلايدۇ ئۆچمەيدۇ سەبىيلەرگە مۇھەببەت ،
نۇر تۆكىدۇ دىللارغا مېھنىتىدىن پەن-ھېكمەت ،
ئۇنتۇمايدۇ بۇرچىنى ، ئىزدىمەيدۇ پاراغەت ،
چوغلىنىدۇ ئىستەكلەر ئىقبال سۆيۈپ تائەبەت ،
پەنگە رىشتىن باغلىغان ئېتىقادى ئۆلمىسۇن ،
چىن سۆيگۈدىن شادلانغان ئىپتىخارى ئۆلمىسۇن .
مۇئەللىملىك شەنىنى يۈرىكىدە ساقلىغان ،
مەسئۇلىيەت -بۇرچىنى قان-تەر بىلەن ئاقلىغان ،
ھەر ئىشىدا ئەل-ئەۋلات تىلىكىنى ياقلىغان ،
توزان باسسا دىللارنى مەرىپەتتە پاكلىغان ،
شەمشىرىنى ئىدراكنىڭ تەپەككۇردا چاقلىغان ،
ئەل قەلبىدىن تۆر ئالغان شان -ھۈرمىتى ئۆلمىسۇن ،
مېھنىتىدىن يۈز تاپقان نام-شۆھرىتى ئۆلمىسۇن .
قەلبىڭ گۈزەل ، بىباھا ، ئاددىي كۆرمە سەن ئۇنى ،
ساغلام ، تېمەن ئۆستۈرەر پەرۋىشىدە نوتىنى ،
ئېچىلدۇرار باغلاردا سەرخىل گۈللەر -غۇنچىنى ،
سۈزۈپ ئالار ئىلىمنىڭ دېڭىزىدىن ئۈنچىنى ،
تىنىم تاپماس بال يىغىپ ، مەنىلىكتۇر كۈن-تۈنى ،
مېھنىتىدە تاۋلانغان ئەۋلاتلىرى ئۆلمىسۇن .
بوغۇنلارنى يايراتقان قەلبى-دىلى ئۆلمىسۇن .
ئۇ بولمىسا ئالەمدە زاۋاللىق بار ، زۇلمەت بار ،
ئۇ بولمىسا ئېنىقكى ، بەخت -شاتلىق بولۇر خار ،
ئۇ بولمىسا ماڭارغا داغدام يولمۇ بولۇر تار ،
ئۇ بولمىسا چاڭقاق دىل تامچە سۇغا بولۇر زار ،
ئۇ بولغاچقا ئۆستى بەك بىزدە غۇرۇر -ئىپتىخار ،
زۇلمەت تۈننى ئىڭراتقان شام-چىرىقى ئۆلمىسۇن .
روھىمىزنى ئۇرغۇتقان كۈچ-قۇدرىتى ئۆلمىسۇن .
ئۇ بولغاچقا خۇراپات مەقسىتىگە يىتەلمەس ،
ئۇ بولغاچقا قاششاقلىق قىلچە يامراپ كىتەلمەس ،
ئۇ بولغاچقا نادانلىق مەغرۇررانە كۈلەلمەس ،
ئۇ بولغاچقا ئىللەتلەر قەلبىمىزگە سىڭەلمەس ،
ئۇ بولغاچقا مۇشەققەت قەددىمىزنى پۈكەلمەس ،
خۇراپاتلىقنى لەت قىلغان ئول قىممىتى ئۆلمىسۇن .
نادانلارنى ئويغاتقان نۇر ، ھىممىتى ئۆلمىسۇن .
ئۇ بولغاچقا روھىيەت گۈزەل بەكلا چاراقلار ،
ئۇ بولغاچقا ئۇرغۇتقان مەنىۋىيەت كۈچ ئالار ،
ئۇ بولغاچقا ئىشقىدا ئادىمىيلىك تاۋلىنار ،
ئۇ بولغاچقا بارچە ئەل ئامىتىدىن شادلىنار ،
پەرۋىشىدە ئېچىلغان گۈلى- ھىدى ئۆلمىسۇن .
مۈشكۈل جەبرى تاۋلىغان ۋىجدان -دىتى ئۆلمىسۇن .
يەلكىسىدە تاغدەك يۈك ، ياشار يەنە ئۈمىدتە ،
ئۆتەر كۈنى ئالدىراش ئەۋلاتلارنىڭ غېمىدە ،
ئۈشبۇ ئالەم ئىللىقتۇر يۈرىكىنىڭ تەپتىدە ،
ئاڭا ھازىر ھۈرمەت تۆر ئەل-ۋەتەننىڭ قەلبىدە ،
ئېچىلىدۇ گۈل-چېچەك باسقان ھەر ئىز-قەدەمدە ،
ئەۋلاتلارغا تۆككەن شۇ نېمەتلىرى ئۆلمىسۇن .
چىمەن باغنى چاقناتقان زىننەتلىرى ئۆلمىسۇن .
مۇئەللىمسىز چىن دىلدىن ھېچكىم يايراپ كۈلەلمەس ،
تەرىپلەشكە تىل ئاجىز ، سۆزۈم چىن ھەق ، لاپ ئەمەس ،
ياغدى ھۈرمەت يامغۇرى قىلىپ شۇندا مەن ھەۋەس ،
تۇتتۇم سۆيگۈ جامىدا دىلدىن شاراپ لىق پەۋەس ،
ئەۋلات ئۈچۈن يۈرىكى سوقار بولۇپ بىر نەپەس ،
ئەل -ۋەتەننىڭ ، ئەۋلاتنىڭ مۇئەللىمى ئۆلمىسۇن .
قەلبلەردە ياڭرىغان بۈيۈك نامى ئۆلمىسۇن .
مەنبە-شىنجاڭ مائارىپى | 
قىزغىنلىق
تىللا
تۆھپە
شۆھرەت
يوللىغان ۋاقتى 2012-7-15 13:55:30
يوللىغان ۋاقتى 2012-7-15 14:06:24
يوللىغان ۋاقتى 2012-7-15 14:12:46
يوللىغان ۋاقتى 2012-7-16 09:34:32
