ئانا ناخشىسى

كەۋسەر

ئانا ناخشىسى

ئەجرىڭ گويا بىر دېڭىز ئانا ،
تەرىپلىسەم تەرىپىڭنى مەن .
ئۇلۇغلۇقۇڭ راستىلا مۇقەددەس ،
ئىجادچىسى مۇھەببەتنىڭ سەن .

تىلغا ئالسام سېنى ئانىجان ،
يېنىپ كېتەر باغرىمدا گۈلخان .
چاقناپ تۇرغان چېچەكلەر گويا
تومۇرۇمدا ئۇرغۇپ تۇرغان قان .

سەن ھەممىگە چېچىلغان قۇياش ،
پەرزەنىتلەرگە مېھىر ئاپتابى .
قۇچىقىڭدىن ئالەمگە مەشھۇر ،
چىققان مەھمۇد ، يۈسۈپ ، فارابى .

سەن قەلبىمگە قۇيۇپ قويغان كۈي
قانات ، مەڭگۈ شادلىق ، غۇرۇرغا .
ئىزلىرىمدا قالىدۇ جەننەت ،
كۆمۈلىمەن ئىلاھىي نۇرغا ...

قانچە ئېيىتسام ناخشام تۈگىمەس ،
ھەر بېشى سەن ناخشىلىرىمنىڭ .
ھەر مىسرادا يادلىنار چېھرىڭ ،
ھەمراھىسەن شېئىرلىرىمنىڭ ...

ئاتا بولغان كۈنۈمدىن بېرى ،
قەدرىڭگە مەن يەتتىم دەممۇ-دەم .
ھەر يىغلىسا نەۋرەڭ قىقاسلاپ ،
ئەسكە ئالدىم سېنى بىر مەرتەم .

ساڭا شۇنچە تەلپۈندى كۆڭلۈم ،
يۈرىكىمدە بىر سېنىڭ غېمىڭ .
مانا ئەمدى يېتىپ قېرىلىق ،
ئالالماپسەن تۈزۈك بىر دېمىڭ .

بارلىقىڭنى غەنىيمەت بىلىپ ،
تۇتاي ھەممە بارىمنى ساڭا .
بەرىكەتلىك دۇئالىرىڭدىن ،
قىلىپ قويغىن ئوغلۇڭغا يەنا ...

ئۆزۈم يازغان

زەپەر

بەك ياخشى شىئېر يوللاپسىز  بۇ شىئېرنىڭ تەربىيەۋىي  ئەھمىيتى    ئىنتايىن يۇقىركەن  . ئانىنى دۇنيادا قانچىلىك تەرىپلىسەك ئەرزىيدۇ.  يازمىللىرىڭىز توختاپ قالمىغاي .

barqin

ئانا-دۇنيادا ئەڭ ئۇلۇغ ئىسان ، ئانىسىز ھېچقانداق مەۋجۇدات بولمايدۇ،ئانىنىڭ خىسلىتىنى،ئانىنىڭ قۇدرىتىنى ئاددى تىل بىلەن مەڭگۇ ئىپادىلەپ بولغىلى بولمايدۇ.................
دوسلارنىڭ ئاتا-ئانىلىرىمىز بار چېغىدا قەدرىنى قىلىپ ئۇلارنىڭ ھالىغا يىتىشنى، كۈنلەرنىڭ بىرىدە پۇشايماندا قالماسلىقىنى ئۈمىد قىلىمەن

راۋاپچى

ئانا ھەممىنىڭ ئانىسى،ئانىدەك بۈيۈك ئىنسان يوقتۇر!

دىلكەش

ئانا ھەقىقەتەن بەك ئۇلۇغ ،ناھايىتى ياخشى يېزىپسىز .

火山

بەك ياخىشى يېزىپسىز ! مەن ئۇقۇپ بەك تەسىرلەندىم !

asrar

دۇئاسىدا ياشنايدۇ ئالەم،
سۈبھىمۇ ئۇيغۇنار ئاناچىھرىدە .
دۇئالارنى كۈتۈپتۇ ئۇغۇل،
چوڭ بۇلۇپتۇ ئانا مىھرىدە.

بەك يىقىملىق ئەللەي ناخشىسى،
تىپىلمىغان بۇندىن ياخشىسى.
ئۈزۈن ئۆمۈر تىلەيمىز ساڭا،
بايقاشتىكى دوسلار ھەممىسى.