تەسەللىنىڭ خاسىيىتى

بۇلاق

تەسەللىنىڭ خاسىيىتى

ئۆزۈمنىڭ تۈنۈگۈنلا قىيغىتىپ ئويناپ يۈرگەن بالىلىقىمدىن خوشلىشىپ، ئەمدىلىكتە ئېغىر مەسئۇلىيەت يۈكلەنگەن ئانىغا ئايلانغىنىمنى ئويلىسام، ۋاقىتنىڭ نەقەدەر تېز ئۆتكەنلىكىگە ھەيران بولىمەن. تۇرمۇشنىڭ ھەر خىل دوقاللىرىغا ئۇچراپ، ياخشى بىر مەسلىھەتچىگە موھتاج بولغىنىمدا، دادام ئېسىمگە كېلەتتى، بۈگۈنمۇ يەنە دادامنى ئويلاپ قالدىم.
نەرسە - كېرەكلىرىمنى يىغىشتۇرۇپ چوڭ ئۆيگە ماڭدىم. ئاپتوبۇستا كېتىۋېتىپ، يېزامنىڭ گۈزەل باھار پەسلى، يولنىڭ ئىككى قاسنىقىدىكى كۆكىرىۋاتقان دەرەخلەر، بېدە كۆكى تېرىۋاتقان قىز - چوكانلار، سىيالكا سۆرىگەن تىراكتورنىڭ كەينىدىن تاپ بېسىپ كېتىۋاتقان دېھقانلار... ئىشقىلىپ قاينام - تاشقىنلىققا تولغان ئېتىزلارنى كۆرۈپ كەيپىياتىم خېلىلا كۆتۈرۈلۈپ قالدى.
− ۋۇي ئەزىز مېھمان كېلىپ قاپتىغۇ، قانداقراق قىزىم؟ − ئاتام مېنى كۆرۈپ قولىدىكى ئىشنى تاشلاپلا مەن بىلەن قىزغىن كۆرۈشتى، شۇئان كۆزۈمگە ياش كەلدى، شۇ تاپتا ئۇنىڭغا ئېسىلىپ يىغلىغۇم كەلسىمۇ، ئۇنىڭ خۇشاللىقىغا سوغۇق سۇ سەپكۈم كەلمىدى−دە، ئۆزۈمنى كۈلكىگە زورلىدىم...
− قاراڭ قىزىم، چوڭ ئاكىڭىز ئۆي سېلىۋاتىدۇ، بۈگۈن 22 كۈن بولدى، ئۇنىڭغا　ياردەم قىلاي دەپ ھېچيەرگە بارالمىدىم، بىر كۈن بارمىسام ئىشى ئاقسايدۇ. بالىلار كىچىك بولغاچ، يەڭگىڭىزنىڭ ئىشىمۇ كۆپ. كىچىك ئاكىڭىزغا جايلىق يەر ئالىمەن دەپ، يەنە ئۇنىڭ ئىشىغىمۇ چېپىۋاتىمەن...
ئاتامنىڭ گەپلىرىنى ئاڭلىغاچ، كۆزۈمنىڭ قۇيرۇقىدا سەپسالدىم. ئۇنىڭ چاچلىرى ئۇچتەك ئاقارغان، چىشلىرى ئاللىقاچان چۈشۈپ كەتكەن، قوۋۇز سۆڭەكلىرى بورتۇپ چىققانىدى. ئاتام ئاغزىغا سالغان ناننى چاينىماي يالماپ يۇتۇۋاتاتتى. ئۇنىڭ قىزارغان كۆزلىرىدىن ياش ئەگىدى. ئۇنىڭ تارىشىدەك قولىغا، پايپىقىنىڭ ئۇچىدىن چىقىپ قالغان بارمىقىغا قاراپ ئىچىم ئاچچىق بولدى.
− سىڭلىڭىز ئۆي ئايرىيدىكەن، ئۇنىڭغا نېمە قىلىپ بەرسەم بولار؟ بىر موزاي بېقىپ قويدۇم، ئېغىلىغا باغلاپ بېرەي دەيمەن...
ئاھ، ئۇنىڭ غەملىرى نېمانچە كۆپ، يېشى 60 تىن ھالقىغان ئاتام توغرىلىق يەنە خىيالغا پاتتىم. ئۇ ئائىلىمىزنىڭ تىرىك تارىخى ئىدى. ئۇ يالغۇز بولغاچقا، ئۇنىڭغا بىزدىن باشقا يۆلەك بولغۇدەك قېرىنداشلىرىمۇ يۇق ئىدى. ئاتام نۇرغۇن كەچمىشنى باشتىن كەچۈرگەن، كۆپ جەبىر جاپا تارتقان بولسىمۇ، تۇرمۇش ئۇنى ھەممىدىن خەۋىرى بار، ھەممىگە يېتىشلىك قىلىپ تاۋلىغانىدى. شۇڭا، مەسئۇلىيەتچان، ئۈمىدۋار، جاسارەتلىك ئەرلەر توغرىسىدا ئويلانغىنىمدا، ئاتامنىڭ ۋاقىت قارىشى، قىممەت قارىشى، دۇنيا قارىشى، كىشىلىك تۇرمۇش قارىشىدىن سۆيۈنەتتىم، ئۇنى ئۈلگە سۈپىتىدە پەرزەنتىمگە مىسال قىلاتتىم. ئۇنىڭ تۇرمۇشتىكى ئۈمىدۋارلىقى، كەڭ قورساقلىقىدىن ھۇزۇرلىناتتىم. تۈرگۈنلۈكىدىن ئۆرنەك ئېلىشقا، قىسقىسى، ئاتامنىڭ ھەربىر ھەرىكىتىنى دوراشقا ئىنتىلەتتىم. قىيىنچىلىققا ئۇچرىسام ئۇنىڭغا ئېيتىشقا، دانا مەسلىھەتلىرىنى ئاڭلاشقا ئالدىرايتتىم...
ئاتا، ئادىمىيلىك پەزىلەت، ئەخلاق توغرىسىدا قەلبىمگە ئاستا - ئاستا سىڭدۈرگەنلىرىڭىز مېنى ياشلىق مەزگىلىمدىن بىخەتەر ئۆتكۈزۈپ، بەختلىك بىر ئائىلىگە ئىگە مەسئۇلىيەتچان ئانىغا ئايلاندۇردى. سىزنىڭ قەلبىڭىزدىن كۆرگىنىم ئاقكۆڭۈللۈك، ساددىلىق، باشقىلارنىڭ غېمىنى يېيىش...
بۇ ھەقتىكى خىياللىرىم تۈگىمەيلا چوڭ نەۋرىمىز كىرىپ كەلدى:
− بوۋا، بۈگۈن مەكتەپتە ئاتا - ئانىلار يىغىنى بار ئىدى، دادام بازاردىن تېخى كېلەلمەپتۇ، سەن بارغىنا...
− ماقۇل، ماقۇل،− ئاتام چېيىنى چالا - بۇلا ئىچىپلا چىقىپ كەتتى.
ئۇنىڭ كەينىدىن قاراپ كۆزلىرىمگە يەنە ياش كەلدى. ئۇنىڭ باش قاتۇرىدىغان ئىشلىرى چېچىدىن تولا، كۆرىدىغان راھىتى ئاز بولسىمۇ، ئۇ يەنىلا ناھايىتى خۇشال. ئۇنىڭ ۋېلىسىپىتىنى ياش يىگىتلەردەك چاققانلىق بىلەن مىنىشىگە قاراپ كۈلۈپ كەتتىم. ئاتامغا ئېيتماقچى بولغان خاپىلىقلىرىم ئاللىقاچان يىراقلارغا ئۇچۇپ كەتكەنىدى. شۇ تاپتا ئۆزۈمنى قۇشتەك يەڭگىل، ھېچقاندەك خاپىلىقى يوق، خۇشال ھېس قىلىۋاتاتتىم... شۇ تاپتا مەن ئاتىنىڭ پەرزەنتكە ئاتا قىلغان مېھرىنىڭ قۇدرىتىنى، ئاتا - بالىلىق مۇھەببەتنىڭ شاراپىتىنى، شۇنىڭدەك ھايات ۋە تۇرمۇش ئاتا قىلغان تەسەللىنىڭ خاسىيىتىنى كۆرگەندەك بولدۇم.
مەنبە: شىنجاڭ گېزىتى

دىلكەش

تەسىرلىك تىمىكەن .ئاتا-ئانا ھەقىقەتەن ئۇلۇغ .

ئامان

ياخشى تېما ئىكەن. رەخمەت سىزگە.

火山

مەن ياقتۇردۇم ياخشى تېمىكەن !