ياش كارخانىچى ئابدۇخېلىل مۇتەللىپ تەنھەرىكەت مەيدانى ياسىدى

  مەتقاسىم ئەخمەت خەۋەر قىلىدۇ: تەنتەربىيە ئىشلىرىنى يۈكسەلدۈرۈپ، خەلقنىڭ تەن ساغلاملىقىنى كۈچەيتىشنى كۆڭلىگە پۈككەن ياش كارخانىچى، خوتەن ‹‹ھېيتگاھ›› ئۆي – مۈلۈك تەرەققىيات چەكلىك مەسئۇلىيەت شىركىتىنىڭ باش لىدىرى ئابدۇخېلىل مۇتەللىپ 4مىليون يۈەن مەبلەغ سېلىپ، تەنتەربىيە مەيدانى ياسىدى.
   ئابدۇخېلىل مۇتەللىپ 2008 – يىلىنىڭ بېشىدا خوتەن شەھىرىنىڭ شورباغ يېزىسىدا تەنھەرىكەت مەيدانى ياساشنى باشلاپ، بۇ يىل خوتەن ۋىلايىتى بويىچە ئەسلىھەلىرى تولۇق، بۇتبول، ۋالىبول، ۋاسكېتبول، چېلىشىش، دارۋازلىق مۇسابىقىلىرىنى ئۆتكۈزگىلى بولىدىغان 50 مو كۆلەمدىكى تەنھەرىكەت مەيدانىنى پۈتتۈردى. بۇ مەيدان ياسالغاندىن ھازىرغىچە، خوتەن شەھەرلىك 4 – نۆۋەتلىك دېھقان – چارۋىچىلار تەنھەرىكەت مۇسابىقىسى ، نورۇز بايراملىق پائالىيەت، ياشلار – ئۆسمۈرلەر پۇتبول مۇسابىقىسى ئۆتكۈزۈلگەندىن باشقا، ھەر شەنبە كۈنى مىللىيچە چېلىشىش مۇسابىقىسى ئۆتكۈزۈلۈپ، تەنتەربىيە ھەۋەسكارلىرىنىڭ ماھارىتىنى نامايان قىلىدىغان، ئەمەلىي ماھارەت يېتىلدۈرىدىغان مۇھىم سورۇنغا ئايلاندى. بۇ مەيدان يەنە خوتەن ۋىلايىتىدىن ئاپتونوم رايونلۇق 12 – نۆۋەتلىك تەنھەرىكەت مۇسابىقىسى، ئاپتونوم رايوننىڭ 7 – نۆۋەتلىك ئاز سانلىق مىللەتلەر تەنھەرىكەت مۇسابىقىسىگە قاتنىشىدىغان تەنھەرىكەتچىلەرنى مەشىق قىلدۇرۇپ تەربىيەلەش بازىسى قىلىپ بېكىتىلدى.