پاشا ئىشان 12 ياش چېغىدىلا بۇلبۇلغا ئوخشاش ئاۋازى بىلەن كىشىنى ھەيران قالدۇرالىغان. ئۇ ئۆزىنىڭ ئاجايىپ ياڭراق ، يېقىملىق ئاۋازى ، سەنئەتتىكى تەبىئى تالانتى ، خەلق ناخشىلىرىنى ئورۇنداشتىكى ئۆزگىچە ماھارىتى بىلەن خەلقىمىزنىڭ ھۆرمىتىگە ئېرىشىپ ‹‹ تەڭرىتاغ بۇلبۇلى ›› دەپ نام ئالغان . ئۇ سەنئەت مۇساپىسىدا يېرىم ئەسىردىن ئارتۇق ئۇزۇن مۇساپىنى بېسىپ ئۆتۈپ ، ۋەتىنىمىزنىڭ ، جۈملىدىن ئاپتونوم رايونىمىزنىڭ سەنئەت ئىشلىرىغا ئۆچمەس تۆھپىلەرنى قوشقان .

پاشا ئىشان 1940 – يىلى غۇلجا شەھرىدە تۇغۇلغان . ئەينى يىللاردا غۇلجا شەھىرىدە ئاجايىپ نەغمىچىلەر ، ئۇستا ناخشىچىلار بار بولۇپ ، ئۇنىڭ قەلبىگە سەنئەتنىڭ دەسلەپكى ئۇرۇقلىرىنى ئەنە شۇ ناخشىغا ھېرىسمەن خەلق چاچقان .

1952 – يىلى ، پاشا ئىشان غۇلجىدا باشلانغۇچ مەكتەپنى ئەمدىلا تۈگىتىشىگە ئاپتونوم رايوننىڭ سابىق رەئىسى سەيپىدىن ئەزىزى مۇشۇنداق ئاۋازى ياڭراق بىر قىزچاقنىڭ بارلىقىنى ئاڭلاپ ، كىچىك پاشانى شىنجاڭ ناخشا – ئۇسسۇل ئۆمىكىگە ئەكەلگەن ، شۇنىڭدىن كېيىن پاشا ئىشان ھەقىقىي سەنئەت ھاياتىنى باشلىۋەتكەن .

1953 – يىلى پاشا ئىشان چاۋشىيەن ئالدىنقى سېپىدىكى پىدائىيلاردىن ھال سوراش ئۆمىكىگە قوشۇلۇپ ، ئۆزىنىڭ ياڭراق ناخشىلىرى بىلەن شىنجاڭ ھەر مىللەت خەلقىنىڭ سالىمىنى پىدائىيلارغا يەتكۈزگەن . 1955 – يىلى پاشا ئىشان ۋارشاۋادا ئۆتكۈزۈلگەن دۇنيا فېستۋالىغا قاتنىشىپ ، ‹‹ئازات زامان›› ، ‹‹سېنى ئەسلەيمەن›› قاتارلىق ناخشىلارنى يۇقىرى ماھارەت بىلەن ئورۇنداپ كۈمۈش مېدالغا ئېرىشكەن ، بۇنىڭ بىلەن پاشا ئىشان ۋەتىنىمىزگە شان – شەرەپ كەلتۈرگەن . 1961 – يىلى ئۇ جۇ ئېنلەي زۇڭلىنىڭ يېتەكچىلىكىدە ھېندونزىيە ، بېرما ، نېپال ، ئىراق قاتارلىق دۆلەتلەرگە بېرىپ ، ياڭراق ئاۋازى بىلەن دۇنيا سەھنىلىرىدە ئۇيغۇر سەنئىتىنىڭ جەزبىدارلىقىنى نامايەن قىلغان
سەنئەت ئىشلىرىغا تىنماي تۆھپە قوشۇۋاتقان پاشا ئىشانغا 1985 – يىلى دۆلەت تەرىپىدىن ‹‹ دۆلەتلىك 1 – دەرىجىلىك ئارتىس ›› دىگەن ئۇنۋان بېرىلگەن. ئۇ مەملىكەتلىك مۇزىكانتلار جەمئىيتىنىڭ مۇئاۋىن رەئىسى ، شىنجاڭ ئۇيغۇر ئاپتونوم رايونلۇق سىياسى كېڭەشنىڭ 7 – ، 8 – نۆۋەتلىك مۇئاۋىن رەئىسى ، شىنجاڭ ئۇيغۇر ئاپتونوم رايونلۇق ئاياللار بىرلەشمىسىنىڭ ھەيئەت ئەزاسى قاتارلىق ۋەزىپىلەرنى ئۆتىگەن . نۆۋەتتە، پاشا ئىشان گەرچە پىنسىيىگە چىققان بولسىمۇ، دائىم شىنجاڭ ئۇيغۇر ئاپتونوم رايونلۇق ناخشا – ئۇسسۇل ئۆمىكىگە بېرىپ ناخشا مەشىق قىلىدۇ ھەمدە تۆۋەنگە چۈشۈپ ئويۇن قويۇشقا قاتنىشىدۇ .

شىنجاڭ ئۇيغۇر ئاپتونوم رايونلۇق خەلق ھۆكۈمىتى ۋە شىنجاڭ ئۇيغۇر ئاپتونوم رايونلۇق پارتكوم تەشۋىقات بۆلۈمى تەرىپىدىن 2004 – يىلى ئۇنىڭغا‹‹ تەڭرىتاغ تۆھپىكارى›› دېگەن شەرەپلىك نام بېرىلگەن .