شىنجاڭنىڭ مىللىي سەنئەت گۈلزارلىقىدا ئۆزگىچە ئېچىلغان بىر قىزىل گۈل بار . ئۇ بولسىمۇ دىلنار ئابدۇللادۇر . دىلنار ئابدۇللا 1966 - يىلى 4 - ئاينىڭ 4 - كۈنى ئۈرۈمچىدە تۇغۇلغان . ئۇ 1973 - يىلى 9 - ئايدا ئۈرۈمچى شەھەرلىك 5 - باشلانغۇچ مەكتەپكە ئوقۇشقا كىردى . سەنئەتكار ئائىلىسىدە تۇغۇلۇپ چوڭ بولغان دىلنار كىچىكىدىنلا سەنئەتكە تولىمۇ ھېرىسمەن ئىدى . سەنئەتنى سۆيەتتى . شۇڭا ئۇ باشلانغۇچ مەكتەپتە ئوقۇۋاتقان چېغىدىلا ئۆزىدىكى تەبىئىي سەنئەت تالانتى بىلەن 1978 - يىلى 9 - ئايدا مەركىزى مىللەتلەر ئىنستىتۇتىنىڭ سەنئەت فاكۇلتېتىغا ئوقۇشقا كىردى . بۇ چاغدا دىلنار ئەمدىلا 12 ياشتا ئىدى .
دىلنار ئابدۇللا 1982 - يىلى 7 - ئايدا ئوقۇشنى تاماملاپ شىنجاڭ ناخشا - ئۇسۇل ئۆمىكىگە تەقسىم قىلىندى . شۇنىڭدىن ئېتىبارەن كەسىپكە بولغان ئوتتەك قىزغىنلىق ، چوڭقۇر مۇھەببەت ۋە ئۇلۇغۋار غايىلەر بىلەن تىنىمسىز ئىزدىنىشكە ، شىنجاڭنىڭ مىللىي سەنئەت ئىشلىرى ئۈچۈن ئۆزىنى بېغىشلاشقا باشلىدى ھەم ھەقىقىي سەنئەتكارغا خاس ئەقىل - پاراسىتى ۋە ئەخلاق - پەزىلىتى بىلەن تىزلا كۆزگە كۆرۈنۈپ ، خەلقنىڭ قىزغىن قوللىشىغا ، ھۆرمىتىگە سازاۋەر بولدى . شۇنداقلا ئۇ ئۆزىنىڭ شوخ ئۇسۇللىرى ئارقىلىق رەڭدار بەدىئىي ئوبرازلارنى يارىتىپ ، كۆپ قېتىم ئاپتونوم رايون ۋە ئېلىمىز ھەم خەلقئارادا تۈرلۈك مۇكاپاتلارغا ئېرىشتى . " ئۇستازغا " ، " ئاتا " قاتارلىق نادىر ناخشىلىرى ئارقىلىق خەلق قەلبىگە زوق بېغىشلىدى .
دىلنار ئابدۇللا ئۆزىنىڭ سەنئەت ئەمەلىيىتى ئارقىلى ئۇيغۇر خەلقىنىڭ ئۇسۇل سەنئىتىنى تېخىمۇ گۈللەندۈرۈشكە تېگىشلىك تۆھپە قوشتى . 1985 - يىلى ئۇ شىنجاڭدا تۇنجى بولۇپ يالغۇز كىشىلىك ئۇسۇل كېچىلىكى ئۆتكۈزدى. شۇ يىلى مەملىكەتلىك ئاز سانلىق مىللەتلەر ئۇسۇل مۇسابىقىسىدە ئۇ ئورۇنلىغان يالغۇز كىشىلىك ئۇسۇل " مۇز تاغدىكى ئوت " 1- دەرىجىلىك مۇكاپاتقا ئېرىشتى . ئۇ 1995- يىلى ئاپتونوم رايون بۇيىچە " ئەمگەك نەمۇنىچىسى " بولۇپ مۇكاپاتلاندى ھەمدە مەدەنىيەت مىنىستىرلىكى تەرىپىدىن ئەڭ ئالىي مۇكاپات " مەدەنىيەت جەۋھىرى مۇكاپاتى " غا ئېرىشتى . 1997 - يىلى ياپونىيىنىڭ ئوساكا شەھىرىدە ئۆتكۈزۈلگەن خەلقئارالىق سەنئەت بايرىمىغا قاتنىشىپ ، " ئەڭ ئالىي ئورۇنداش " مۇكاپاتىغا ، شۇ يىلى شاڭگاڭدا ئۆتكۈزۈلگەن چوڭ تىپتىكى ئەدەبىيات سەنئەت كېچىلىكىگە قاتنىشىپ ، " ئالتۇن " مۇكاپاتقا ئېرىشتى . 1998 - يىلى ئاۋمىندا ئۆتكۈزۈلگەن 6 - نۆۋەتلىك ئاسىيا ۋە تىنچ ئوكيان رايونىدىكى ياش ناخشىچىلار مۇسابىقىسىدە " ئەڭ مۇنەۋۋەر ناخشىچى " مۇكاپاتىغا نائىل بولدى . يەنە شۇ يىلى 3 - ئايدا ئاپتونوم رايون بۇيىچە " 8- مارت قىزىل بايراقدارى " بولۇپ باھالاندى . 1999 - يىلى گوۋۇيۈەن تەرىپىدىن مىللەتلەر ئېتىپاقلىقى بۇيىچە " نەمۇنىچى شەخس " بولۇپ مۇكاپاتلاندى . 2001- يىلى جۇڭگو ئەدەبىيات - سەنئەتچىلەر بىرلەشمىسى تەرىپىدىن " تۆھپىكار سەنئەتكار مۇكاپاتى " غا ئېرىشتى . 2001 - يىلى 4 - ئايدا چاۋشيەندە ئۆتكۈزۈلگەن چاۋشيەن خەلقئارا سەنئەت بايرىمىدا ئۇ ئورۇنلىغان " داۋانچىڭ قىزى " ناملىق يالغۇز كىشىلىك ئۇسۇل " ئالتۇن " مۇكاپاتقا ئېرىشتى .
دىلنار ئابدۇللا ھازىر شىنجاڭ ناخشا - ئۇسۇل ئۆمىكىنىڭ دۆلەتلىك 1- دەرىجىلىك ئارتىسى ، شىنجاڭ ئۇيغۇر ئاپتونوم رايونىنىڭ ئاتاقلىق ئۇسۇل سەنئەتكارى ، گوۋۇيۈەننىڭ ئالاھىدە تەمىناتىدىن بەھرىمەن بولىدىغان خادىمى ، مەملىكەتلىك ياشلار بىرلەشمىسىنىڭ ئەزاسى ، مەركىزى مىللەتلەر ئۇنىۋېرسىتېتىنىڭ تەكلىپلىك پروفېسسورى ، جۇڭگو ئۇسسۇلچىلار جەمئىيىتىنىڭ مۇئاۋىن رەئىسى ، شىنجاڭ ئۇسسۇلچىلار جەمئىيىتىنىڭ رەئىسى . ئۇ 2002 - يىلى " جۇڭگودىكى كۆزگە كۆرۈنگەن 10 چوڭ ياش " نىڭ بىرى بولۇپ مۇكاپاتلاندى .
10 يىلغا يېقىن كىنوچىلىق ساھەسىدە ئىشلەپ ، " سىم - سىم يامغۇردىكى ئەسلىمە " ، " بويتاقلار ئائىلىسى " ، " مەھەممەت ھەققىدە پاراڭ " دېگەندەك كۆپلىگەن فىلىملەرنى سۈرەتكە ئالغان ياش ئوپېراتور نىجات ئىسمائىل بىلەن ياش ئۇسۇل سەنئەتكارى دىلنار ئابدۇللامۇ رومانتىك ھېسسىياتقا ئىگە گۈزەل مۇھەببەت دەۋرىنى بېشىدىن ئۆتكۈزگەن . ئۇلارنىڭ ئاتا - ئانىلىرىنىڭ مۇناسىۋىتى يېقىن بولغاچقا ئىككىسى كىچىك چاغلىرىدىن باشلاپلا ئۆز - ئارا تونۇشاتتى . 1978 - يىلى دىلنار سابىق مەركىزىي مىللەتلەر ئىنستىتۇتىغا ئوقۇشقا كەتتى . 1981 - يىلى نىجاتمۇ بېيجىڭ كىنو ئىنستىتۇتىغا ئوقۇشقا باردى . ئۇلار بېيجىڭدا بىر قانچە قېتىم ئۇچۇرۇشۇش ئارقىلىق ئاستا - ئاستا بىر - بىرىنى ياقتۇرۇپ قېلىشتى . ھەر ئىككىسى بېيجىڭدىكى ئوقۇشىنى تاماملاپ شىنجاڭغا قايتىپ كەلگەندىن كىيىن ، ئالىيجانابلىق ھەم ۋاپادارلىق بىلەن يۇغۇرۇلغان چىن مۇھەببەتنىڭ گۈزەل باھارىنى كۈتۈۋالدى ھەمدە 1987 - يىلى 10 - ئاينىڭ 4 -كۈنى ئۈرۈمچىدە بەختلىك ھالدا توي مۇراسىمى ئۆتكۈزدى . ھازىر ئۇلارنىڭ بىر جۈپ ئوماق قىزلىرى بار ، چوڭىنىڭ ئىسمى ۋېنىرا ، كىچىكىنىڭ ئىسمى ئۇزنار ، ئۇلار ئۈرۈمچىدە ئوتتۇرا ، باشلانغۇچ مەكتەپتە ئوقۇۋاتىدۇ .