ئۈن_تىنسىز يامغۇردەك ياغىسەن ئاستا
ۋە زېمىن باغرىغا سىڭىپ كېتىسەن.
سەن شائىر ياڭراتقان مەڭگۈلۈك
ناخشاجان يەتمەس جايلارغا بېرىپ يېتىسەن.
چوقاي تاش باغرىغا سالىسەن يۈرەك،
بىر ھايات كېتىدۇ بەختنى سۆزلەپ.
خىسلەتلەر تەپچىرەپ باشلايدۇ كۆرەك،
ھەر زەررە ۋەسلىگە بىر جەننەت كۆزلەپ.
قىيالار بېتىگە باسىسەن تامغا،
چىرىشتۇر خاتاسىز راھەت دېگەن گەپ.
(مەن ئۇنى ئاڭقىرىپ چۈشىمىدىم دامغا،)
ئېگىلگەن ھەقىقەت ئۇلۇغكەن ئەجەپ...
قۇرئاننىڭ ۋارىقى بولدى بۇ زېمىن،
ئايەتلەر پۈتۈلگەن ،مەشئەل ،مۇقەددەس.
ھەر ھېكمەت تىللاردا ياڭرىغان گېمىن،
ئۆڭمىگەن ئادەملەر مەڭگۈ زەبەردەس.
بىز بۇلغاپ تۇرىمىز ھامان جاھاننى،
سەن يۇيۇپ تۇرڭسەن ھېرىقماي پەقەت.
بىزلەرگە تاپشۇرۇپ ياخشى_ياماننى،
سەن ئۆزۈڭ تاراتتىڭ ئوغۇز مۇھەببەت.
يارىدار يىلتىزنىڭ يېرىقلىرىغا،
تولىسەن پۈتىدۇ،ئەمسىز جاراھەت.
تولىسەن دىللارنىڭ ئېرىقلىرىغا،
نەلەردە قالىدۇ نۇرسىز قاباھەت.
چېقىنلار كۆيدۈرگەن ئانا تۇپراقنى،
سىيپايسەن ئېسىركەپ تەڭرىدەك گويا.
سەن ياساپ، سەن تۆككەن ئېسىل بوياقنى،
بىر ئۆمۈر يۈزىگە ياقىدۇ دۇنيا...
ئۈن_تىسىز
يامغۇردەك
ياغىسەن ئاستا،
زارىققان دىللارغا
سىڭىپ كېتىسەن.
سەن سايلاپ،سەن ئېچىپ تۇتقان يول باشقا،
بىغۇبار مەنزىلگە بېرىپ يېتىسەن!
_ئوسمانجان ساۋۇت
