يانغىن يازمىسى ...
(1)
ئۇنتاي دەپ مەن سىنى ئۇنتىيالمىدىم ،
رازىمەن سەن ئۈچۈن چىكىشكە ئازاب .
ئىزلىدىم ئىزىڭنى ھېچ تاپالمىدىم ،
تۇتىيا ئايلىبان @قىلاي دەپ تاۋاپ .
جۇدالىق ئىلكىدە ئۆتتى كۆپ يىللار ،
ۋە لېكىن سۆيگۈمىز باردى ئۇلغۇيۇپ .
ئازابتىن ئۈن -تىنسىز ئۆكسىدى دىللار ،
ئۇخلىماي تۈنلەردە چىقتۇق تولغۇنۇپ .
ۋەدىمىز بۇلاقتەك مۇستەھكەم ئىدى ،
سۆيگۈنىڭ ئوتىدا كۈيۈپ تاۋلانغان .
دىللاردا ئىپتىخار مۇجەسسەم ئىدى ،
رىشتىمىز ئۈزۈلمەس بۇلۇپ باغلانغان .
ئاھ ، ئەپسۇس تەقدىرنىڭ كاساپىتىدىن ،
يۈرەكنى ئۆرتىدى ھىجران داغلىرى .
شۇ تەتۈر پەلەكنىڭ ھاقارىتىدىن ،
سۇلاشتى ۋاقىتسىز سۆيگۈ داغلىرى .
ئازابقا چىدىماي كەتتىڭ يىراققا ،
سۈت بىرىپ ئۆستۈرگەن يۇرتۇڭنى تاشلاپ .
مەن قالىپ تۈگىمەس دەرتكە پىراققا ،
يۇلۇڭغا تەلمۈرۈپ كۆزۈمنى ياشلاپ .
خۇداغا نالە قىپ شۇنىڭدىن بۇيان ،
ئۈن -تىنسىز ئاھ ئۇرۇپ چەكتىم نادامەت .
ئۈلۈشنى ئويلىدىم ئۆلمىدىم لىكىن ،
ئاھ ، مىنى قۇتقۇزۇپ قالدى مۇھەببەت .
(2)
سېغىنىش ئىلكىدە ئەسلەيمەن پات -پات ،
ئىككىمىز سىرداشقان دەريا بۇيىنى .
شۇھامان ھېسلىرىم قېقىپ پەر قانات ،
كۆرگەندەك بۇلىمەن ۋىسال تويىنى .
ئىسىڭدە بارمۇ شۇ ئارچا دەرىخى ،
ئاستىدا ئۆتكۈزگەن قاراڭغۇ تۈنلەر .
مېنىڭغۇ ھېلىھەم يادىمدا تېخى ،
دىللاردىن فونتاندەك ئوخچىغان كۈيلەر .
ئىسىمدە باھارنىڭ گۈزەل بىر كۈنى ،
قىلغانتۇق بىز خۇشال گۈللەر سەيلىسى .
ئەتراپتا ياڭرايتتى بۇلبۇللار كۈيى ،
كەلگەندەك بىزگە چىن زوقى -ھەۋىسى .
كۈلەتتۇق شادىمان بەخت ئىلكىدە ،
پايانسىز دالىدا قىيغىتىپ ھامان .
جىسمىمىز مەست بۇلۇپ سۆيگۈ ۋەسلىدە ،
كەلگۈسى كۈنلەردىن قىلمايتتۇق گۇمان .
(3)
ئۇ شىرىن ئاي -كۈنلەر قالدى يىراقتا ،
تۇمانلىق كېچىدە كۆرگەن چۈش كەبى .
بىر جۈپ ياش يۈرەكلەر قالغاچ پىراقتا ،
نالىلەر قىلماقتا شۇنچىلىك سەبى .
ئاھ ، نىگار ئۆزەڭنى قويما يوقىتىپ ،
نامەرتلەر پېيىڭدە يۈرمىسۇن قەستلەپ .
ئۇ گۈزەل چاغلارنى كەتسەڭمۇ ئۇنتۇپ ،
تۇر جېنىم ھەرۋاقىت سەن مىنى ئەسلەپ ...
