بۈگۈن سېنىڭ مەرىكە كۈنىڭ ...
*
ئاتاقلىق يازغۇچى تۇرسۇنئاي يۇنۇس خانىمنىڭ نەسرگىلا ئەمەس ، نەزمىگىمۇ ئېپى بار ئىكەن . ئۇ سۆھبەت جەريانىدا ئۆزىنىڭ ئارىلاپ شېئىر يېزىپ قويىدىغانلىقىنى ئېيتىپ ، ماڭا بەزى شېئىرلىرىنى ئوقۇپ بەردى . مەن مۇشۇ پۈرسەتتىن پايدىلىنىپ ، « 8 - ماي ئانىلار بايرىمى » ھەققىدە گەپ ئۇرۇپ :
ــ يازغۇچى خانىم ، ــ دېدىم مەن يازغۇچىنىڭ يېشىل كۆزلىرىگە قاراپ ، ــ « ئانىلار بايرىمى »كېلىش ئالدىدا تۇرۇپتۇ ، ئانىلار توغرىسىدا بىرەر نەزمە ئوقۇپ باقامسىز .
ــ ئوبدان . مېنىڭ « بۈگۈن سېنىڭ مەرىكە كۈنىڭ » دېگەن بىر شېئىرىم بارئىدى ، شۇنى « ئانىلار بايرىمى » غا ئاتاپ دېكلاماتسىيە قىلىپ بېرەي ، ــ دەپ يازغۇچى زوق - شوق بىلەن شېرىنى ئوقۇشقا باشلىدى .
بۈگۈن سېنىڭ مەرىكە كۈنىڭ،
تەبرىكلەيمەن سېنى جان ئانا .
تۇتالمايمەن يىراقتىغۇ مەن ،
ئەتىر گۈلۈم قولۇمدا مانا .
*
بۈگۈن سېنىڭ تۇغۇلغان كۈنىڭ ،
بارالمىدىم كەچۈرگىن مېنى .
كۆزلىرىمدە يامغۇر كەبى ياش ،
بىر دەقىقە كۆرەلمەي سېنى .
*
ئاي شولىسى چۈشكەن قورۇدا ،
ئانىلار كۈنى ناخشىسى ياڭراق ،
تۇرىمەن تەنھا ھۇجىرامدا مانا ،
ناخشا ئېيتىمەن ، ئاڭلانماس بىراق . *
بۈگۈن سېنىڭ مەرىكە كۈنىڭ ،
ئاق روماللىق پەرىشتەم ئۆزۈڭ .
« قىزىم سېنى سېغىندىم » دېگەن ،
ساقلىنار ھامان قەلبىمدە سۆزۈڭ !
ــ رەھمەت ، تۇرسۇنئاي خانىم . ئانىلار بايرىمىنى ئابلىكىم سابىر ئەپەندى بىلەن بىللە تويلاپ ، تېخىمۇ ئىجىل - ئىناق ئۆتۈشىڭلارغا تىلەكداشمەن !
مەنبە : غ . ئوسمان «پۈتۈلمىگەن پۈتۈكلەر »
[ مەزكۇر پۈتۈك ئىدىل تەرىپىدىن 2009-05-06 16:59 دە تەھرېرلەندى. ]
