شىنجاڭ ئۇيغۇر ئاپتونوم رايونىنىڭ رەئىسى نۇر بەكرى 25 - ئاپرېل چۈشتىن بۇرۇن بېيجىڭ شەھىرى شۈنيى رايونلۇق ‹‹ياڭجېن›› 1 - ئوتتۇرا مەكتىپىگە كېلىپ، رايونلۇق پارتكومنىڭ شۇجىسى جاڭ يەنكۈن، مۇۋەققەت رايون باشلىقى ليۇ جيەننىڭ ھەمراھلىقىدا شىنجاڭ سىنىپىدىكى ھەر مىللەت ئوقۇغۇچىلىرىنى يوقلىدى ۋە: ‹‹پۇرسەتنى قەدىرلەپ، ئىجتىھات بىلەن ئۆگىنىپ، ياراملىق كىشىلەردىن بولۇشقا ئىرادە باغلاپ، ۋەتەنگە جاۋاب قايتۇرساڭلار، سىلەردىن مىننەتدار بولىمىز››، دەپ رىغبەتلەندۈردى. ‹‹ياڭجېن›› 1 - ئوتتۇرا مەكتىپى 2005 - يىلىدىن باشلاپ شىنجاڭ تولۇق ئوتتۇرا سىنىپى تەسىس قىلغان، ھازىر ئۇ مەملىكەت بويىچە شىنجاڭ تولۇق ئوتتۇرا سىنىپىنىڭ كۆلىمى ئەڭ چوڭ، ئوقۇغۇچىلىرى ئەڭ كۆپ مەكتەپ بولۇپ قالدى، بۇ مەكتەپتە شىنجاڭلىق 771 ئوقۇغۇچى بار، ئۇلارنىڭ %60 ئى چەت، يىراق يېزا، قىشلاقلاردىن كەلگەن مىللىيچە ئوقۇغان مىللىي ئوقۇغۇچىلار.
ساۋاقداش ئادىل سۈرەتكە ئېلىشقا قاتناشقان ‹‹قان - قېرىنداش بولۇپ ئىناقلىق گۈلى ئېچىلدۇرايلى›› دېگەن قىسقا فىلىمدە شىنجاڭ سىنىپىدىكى ئوقۇغۇچىلار ئېيتقان ‹‹تۇغۇلدۇق چۆل - جەزىرىدە، قەلبىمىزگە ئورنىغان توغراق روھى؛ بىرىمىز كەلدۇق مۇزتاغدىن، قامىتىمىز خىسلەتلىك تاغ لەيلىسى››، دېگەن مەزمۇندىكى ‹‹شىنجاڭلىق ئوقۇغۇچىلار ناخشىسى›› ياڭرىدى. مەكتەپ مۇدىرى سۈن مېڭيۈەن: بالىلار مەكتىپىمىزدە جۇڭخۇا ئېلىنىڭ قوينىنىڭ كەڭلىكىنى ھېس قىلماقتا، ئۇلار چۈشىدىمۇ بىللە كىتاب ئوقۇيدىغان ساۋاقداشلىق مېھرىنى قەدىرلەيدۇ، ئۇلار مەكتىپىمىزدىكى مەدەنىي، ئۆگىنىشكە ھېرىسمەن ئوقۇغۇچىلار، ئۇلار ئوقۇتقۇچىلارنىڭ ئەقىدىسىنى ئاقلايدۇ.
خوتەندىن كەلگەن تولۇق 3 - يىللىق ئوقۇغۇچىسى سۈرىيە كاندىدات پارتىيە ئەزاسى بولۇپ، بۇ قىزنىڭ چىرايىدىن خۇشاللىق كۈلكىسى يېغىپ تۇراتتى، ئۇنىڭ ئۆزىگە ئىشىنىدىغانلىقى ۋە سالماقلىقىنى كۆرۈۋالغىلى بولاتتى. ئۇ مۇنداق دېدى: تۆت يىل ئىلگىرى بىز تېخى ئاتا - ئانىمىزدىن ئايرىلىپ سىرتقا چىقىپ باقمىغان كىچىك بالىلار ئىدۇق، ھازىر ھەممىمىز ئەدەبلىك، سالاپەتلىك قىزلاردىن بولۇپ قالدۇق، بۇ يەردە دۆلەتنىڭ نېمىلىكىنى، تىرىشچانلىقنىڭ نېمىلىكىنى، جاپاغا چىداشنىڭ نېمىلىكىنى يەنىمۇ بىلىۋالدۇق، مىننەتدارلىق بىلدۈرۈشنى، چۈشىنىشنى، كەڭ قورساق بولۇشنى ئۆگىنىۋالدۇق، تۆت يىللىق تۇرمۇش ئۆسۈپ يېتىلىش مۇساپىمىزدىكى ئەڭ گۈزەل ئەسلىمە بولۇپ قالغۇسى.
نۇر بەكرى ئوقۇغۇچىلار ياتىقى، مۇسۇلمانچە تائاملار ئاشخانىسىنى كۆزدىن كەچۈرگەندە نۇرغۇن ئوقۇغۇچى ئەتراپىغا يىغىلىپ، مەكتەپ ۋە ئوقۇتقۇچىلارنى بىردەك ماختاپ كەتتى. نۇر بەكرى ساۋاقداشلارغا مۇنداق دېدى: بۈگۈن ‹‹ياڭجېن›› 1 - ئوتتۇرا مەكتىپىگە كېلىپ ساۋاقداشلار ۋە ئوقۇتقۇچىلارنى يوقلاش، ئۇلاردىن ھال سوراش ئارزۇيۇم ئەمەلگە ئاشتى، ئوقۇغۇچىلارنىڭ ئاتا - ئانىسىغا ۋاكالىتەن تىرىشچان باغۋەنلەرنىڭ ئەجرىگە رەھمەت ئېيتىمەن. 2001 - يىلى پارتىيە مەركىزىي كومىتېتى، گوۋۇيۈەن ئىچكىرى ئۆلكىلەردە شىنجاڭ تولۇق ئوتتۇرا سىنىپى ئېچىشتىن ئىبارەت دانا تەدبىرنى ئوتتۇرىغا قويدى، ئەينى چاغدا 12 شەھەر يىلىغا 1000دىن ئوقۇغۇچى قوبۇل قىلغانىدى. ھازىر 25 شەھەردىكى 45 مەكتەپ يىلىغا 5000دىن ئارتۇق ئوقۇغۇچى قوبۇل قىلماقتا، بۇ ئەۋلادتىن ئەۋلادقا بەخت يارىتىدىغان ئۇلۇغ ئىش بولۇپ، ئەۋلادتىن ئەۋلادقا تەسىر كۆرسىتىدۇ. سىلەر كەلگۈسىدە ۋەتەننى، شىنجاڭنى قۇرۇشنىڭ تۈۋرۈكىگە ئايلىنىسىلەر، گۈزەل ئىشلار سىلەرنىڭ ۋۇجۇدقا چىقىرىشىڭلارنى كۈتۈپ تۇرماقتا، سىلەر شىنجاڭدىكى ھەر مىللەت خەلق ۋە ئاتا - ئاناڭلارنىڭ ئۈمىدىنى زىممەڭلەرگە ئالغان، سىلەر پۇرسەتنى قەدىرلەپ، ئىجتىھات بىلەن ئۆگىنىپ، ياراملىق كىشىلەردىن بولۇشقا ئىرادە باغلاپ، ۋەتەنگە جاۋاب قايتۇرساڭلار، شۇنىڭدىن مىننەتدار بولىمىز.
نۇر بەكرى يەنە مەكتەپكە توغراق رەسىمى نەقىشلەنگەن ئېسىل گىلەم سوۋغا قىلدى، ساۋاقداشلارنى توغراق روھىنى جارى قىلدۇرۇپ، ئۈزلۈكسىز ئىلگىرىلەشكە رىغبەتلەندۈردى.
شىنجاڭ گېزىتىدىن ئېلىندى
باس باس مۇنبىرى>>مائارىپ ۋە تەربىيە >> مائارىپقا نەزەر >> نۇر بەكرى بېيجىڭدا ئوقۇۋاتقان شىنجاڭ تولۇق ئوتتۇرا سىنىپى ئوقۇغۇچىلىرىنى يوقلىدى
