مەنزىل مەردنى تاللايدۇ
قىرىق يىللىق مۇھەررىرلىك مۇساپىسىدە قىرلار ئېشىپ ، ئاخىرقى مەنزىل بوسۇغىسىدىن مەزمۇت قەدەملەر بىلەن ئاتلىغان پىشقەدەم ئەدىب ئابدۇرۇسۇل ئۆمەر ئەپەندى يەتمىشكە يېقىنلىشىپ قالغان بولسىمۇ ، يەنىلا نەۋقىران چاغلىرىدىكىدەك سۇباتلىق ۋە سۇمباتلىق كۆرۈنەتتى .
ــ ئابدۇرۇسۇل ئەپەندى ، غۇلجىلىق ئىكەنسىز ، ــ مەن چاقچاق قىلغاچ گەپنى ئەگىتتىم ، ــ « ئورۇسنىڭ يۈزىنى تاتىلىسا ، تاتار چىقىدۇ » دېگەندەك ، غۇلجىلىقنىڭ يۈزىنى تاتىلىسا ، ئالتىشەھەرلىك چىقامدۇ ، نېمە ؟ . ئىلگىرى ئىككى غۇلجىلىقنىڭ يۈزىنى تاتىلىسام ، ئىككى خۇتەنلىك چىقتى . بۈگۈن سىزنىڭ يۈزىڭىزنى تاتىلاپ باقسام نېمە چىقارىكىن ، ھە ؟
ــ نېمە چىقاتتى ، ئاتۇشلۇق چىقىدۇ ، شۇ ، ــ دەپ ، ئەدىب قاقاھلاپ كۈلۈپ كەتتى ، ــ لېكىن تاتىلاش كەتمەيدۇ . چۈنكى بىزنىڭ ئائىلە مېنىڭ ئالتە ــ يەتتە يېشىمدا ئاتۇشتىن غۇلجىغا كۆچۈپ چىقىپتىكەن . دادام يەر تېرىپ تارانچى بولۇشنى خالىماي ، مال بېقىپ چارۋىچى بولۇپ قاپتىكەن .چارۋا ماللىرىمىز نىلقا تاغلىرىنىڭ گۈزەل يايلاقلىرىدا ، قاش دەرياسىنىڭ يېنىدىكى ئارسلان يايلىقىغىچە بېرىپ يايلايىتتى .مەن ئىلگىرى ئارسلان يايلىقىغا زىيارەت قىلىپ بارغىنىمدا شۇنداق دەپ يازغانىدىم .
توز كەبى ياسانغان ياپيېشىل يايلاق ،
سېغىنىش ئىلكىدە قوينۇڭنى كەزدىم .
دىلىمنى ياشناتتى شەربەتلىك بۇلاق ،
باغرىڭنى گوياكى جەننەتتەك سەزدىم .
ــ مۇھەررىر ئەپەندى ، مۇساپە مىڭنى شاللايدۇ ، مەنزىل مەردنى تاللايدۇ . سىز گۈزەل نىلقا تاغلىرىدا ، قاش دەرياسىنىڭ ئەركەك سۇيىنى ئىچىپ چوڭ بولغاچقا ، ئۇزۇن يىللىق مۇھەررىرلىك مۇساپىسىدا شاللىنىپ قالماي ، مەردلەرچە مېڭىپ مەنزىلگە يېتىپسىز . يۈزىڭىزنى تاتلىمايلا قويايلى ، غۇلجىلىق بولۇپ قالىۋىرىڭ !
مەنبە : غىلاجىدىن ئوسمان . « پۈتۈلمىگەن پۈتۈكلەر » .
[ مەزكۇر پۈتۈك پۈتۈك تەرىپىدىن 2009-04-29 10:26 دە تەھرېرلەندى. ]
