شۇ يىلى مېنىڭ 14 ياشقا كىرگەن ۋاقتىم ئىدى . تولۇق ئوتتۇرىغا ئۆرلەپ ئوقۇش ئىمتىھانىغا تەييارلىق قىلىش ئۈچۈن، دەرستىن سىرتقى ۋاقتىمنىڭ كۆپ قىسمىنى كۈتۈپخانىدا دەرس تەكرار قىلىش بىلەن ئۆتكۈزەتتىم. ھەتتا يازلىق تەتىلگە قويۇپ بەرگەندىن كېيىنمۇ ھەر كۈنى دېگۈدەك كۈتۈپخانىغا كېلەتتىم.
   مېنىڭ T ئىسىملىك بىر ئوغۇل ساۋاقدىشىممۇ ھەر كۈنى دېگۈدەك كۈتۈپخانىغا كېلەتتى. بەزى كۈنلىرى مەن سەل كېچىكىپرەك كېلىپ قالسامئۇ ماڭا ئورۇن ئېلىپ قوياتتى. بىز چۈشكىچە بىللە تەكرار قىلىپ، چۈشتە ئاشخانىدا بىللە تاماق يەپ، چۈشتىن كېيىن يەنە بىللە دەرس تەكرارلايتتۇق.
   بىر كۈنى T كۈتۈپخانىغا كەلمىدى. مەن ئۇنى ئاغرىپ قالغانمىدۇ، دەپ بەك ئەنسىرىدىم. ئىككىنچى كۈنى ئۇ كەلدى. ئۇ ئۆزىنىڭ تۈنۈگۈن نېمىشقا كەلمىگەنلىكى ھەققىدە ئېغىز ئاچمىدى، مەنمۇ سورىمىدىم. بىز ئاۋۋالقىدەكلا بىللە تەكرار قىلىپ، چۈشتە بىللە تاماق يېدۇق. ئەمما ئۇ كۈنى ئۆزۈمدە توساتتىن ئۇنىڭغا نىسبەتەن ئاجايىپ بىرخىل سېزىم پەيدا بولۇۋاتقانلىقىنى ھېس قىلدىم. كۆزلىرىم ئۇنىڭ كۆزلىرى بىلەن ئۇچراشسىلا، يۈرۈكۈم ئىختىيارسىز سوقۇپ كېتەتتى، تىلىم گەپكە كەلمەي قالاتتى.
   مەن ئۇنى ياخشى كۆرۈپ قالدىممۇ - نېمە؟ ئىچىمدە شۇلارنى ئويلاپ خۇددى ئۆزۈمنى بىردىنلا چوڭىيىپ قالغاندەك ھېس قىلدىم. بۇرۇن مەندە ئوغۇل ساۋاقداشلىرىمنى ياخشى كۆرۈپ قېلىش ھېسسىياتى بولغان، لېكىن بۇ قېتىم ئۇ خۇددى مېنى سېھىرلەپ قويغاندەك ياكى تېنىمگە بىر خىل كېسەل چاپلىشىۋالغاندەكلا مېنى ئازابلاپ كېتىۋاتاتتى.
   ئەتىسى مەن ئۇدۇل كۈتۈپخانىنىڭ كىتاپ ئىسكىلاتىغا كىردىم. ئادەتتە ھەر كۈنى كۈتۈپخانىغا كىرسەممۇ، لېكىن كىتاپ ئىسكىلاتىغا ئانچە كىرىپ كەتمەيتتىم. كىتاپ ئىسكىلاتى جىمجىت، ئەمما سالقىن ئىدى. مەن ئۇ يەردە ‹‹مۇھەببەت››كە ئائىت نۇرغۇن كىتاپلارنى كۆردۈم. مېنىڭ بۇ كىتاپلارنى كۆرۈشتىكى مەقسىتىم ئۆزۈمدە پەيدا بولۇۋاتقان ئاشۇ سېزىملارنىڭ T نى ياخشى كۆرۈپ قېلىش ياكى ئەمەسلىكىنى ئىسپاتلاش ئىدى... ئەمما مەن ئاخىرى يەنىلا بۇ مۇھەببەتتىن ئۈمىد ئۈزدۈم. چۈنكى مەن بىر نەچچە قېتىم T نىڭ بىر قىز بىلەن قولتۇقلىشىپ يۈرگەنلىكىنى كۆرۈپ قالغان ئىدىم. مەن ئاخىرى قەتئىي نىيەتكە كېلىپ ئۇنى پۈتۈنلەي ئۇنتۇپ كېتىش قارارىغا كەلدىم. ۋاقىتنىڭ ئۆتۈشى بىلەن مەندىكى ئۇ سېزىم ئاستا - ئاستا يوقۇلۇشقا باشلىدى. كېيىن مەنمۇ ئاخىرى ئۆمۈرلۈك ھەمراھىمنى ئىزدەپ تاپتىم.


مۇتەللىپ ياقۇپ تەرجىمىسى

بۇگۈن مۇنبەرنى ئارىلاپ باقسام مۇشۇ [مۇھەببەت] تىمىسىدىكى يازمىلار كۆپ ئىكەن.بولسا مۇشۇنداق تىمىلار يوللىنىپ تۇرسا ياخشى دەپ قارايمەن.