دوستلۇرۇم مېنى ياقتۇرسۇن دېسىڭىز... [ئادىرسىنى كۇچۇرۇش]

                                                             دوستلۇرۇم مېنى ياقتۇرسۇن دېسىڭىز...
                  
                                                                             گۈلنۇر ئابلىمىت (ئارچا)

       كۆپۈنچە قىزلارنىڭ باشقىلاردىن ئاغرىنىدىغانلىقىنى، ئۆزى شۇنچە ياخشىلىق قىلسىمۇ باشقىلارغا ياىشى بولالمايدىغانلىقىنى ۋە دوستلىرىنىڭ ھەقىقىي دوستلىقىغا ئېرىشەلمەي كۆڭلى يېرىم بولىدىغانلىقىنى ئاڭلاپ تۇرىمىز، شۇڭا قىزلارغا تۆۋەندىكىدەك نەسىھەت قىلغىم كەلدى. پايدىسى بولۇپ قالسا ئەجەپ ئەمەس.  
     1. دوستىڭىزغا بەك سىلىق بولۇڭ، مۇلايىملىق بىلەن مۇئامىلە قىلىڭ، دەردىگە دەرمان بولۇڭ، ھالىغا يېتىڭ، ئاغرىپ قالسا مېھرىبانلىك كۆرسىتىپ، ئائىلىسىدە بىرەر ئىش بولسا يىقىن تۇرۇڭ، يېڭى كىيىم كەيسە مۇبارەكلەپ ‹يارىشىپتۇ› دەپ قويۇڭ، ھېيت – بايراملاردا تەبرىك ئۇچۇرلىرى يوللاڭ، مەنمەنچىلىك چوڭچىلىق قىلماڭ، بىراق كەمتەر بولدۇم دەپ زىيادە ۋاي دەپ ئاشۇرىۋەتسىڭىز ئەكسىچە سىزنى كۆزگە ئىلماس بولىۋىلىشى مۇمكىن، ئۇ چاغدا سىزگە ئېغىر كېلىدۇ.
    2. دوستىڭىزنىڭ نېمىسى يوق بولسا ئۆزىڭىزنىڭ شۇ نەرسىسىنى ئامال بار ئېغىزىڭىزغا ئالماڭ. مەسىلەن: ئاتا – ئانىسى يوق دوستلىرىڭىزغا ھەرگىزمۇ ئاتا – ئانىڭىزنىڭ سىزگە كۆيۈنۈپ قىلغان مېھرىبانلىقى توغرىسىدا گەپ قىلماڭ. قول تىلىفۇنى كونىراپ قالغان بولسا ئۆزىڭىزنىڭ داڭلىق ماركىلىق يانفۇنىنى زۆرۈل تېپىلمىسا قولىڭىزغا كۆپ ئېلىۋالماڭ ياكى داڭلاپ بەرمەڭ. دوستىڭىز كىيىشكە مۇيەسسەر بولالمىغان كىيىمنى كىيگەن بولسىڭىز ياكى ئالتۇن زىبۇ – زىننەت تاقىغان بولسىڭىز ئۇنىڭغا كۆز – كۆز قىلغاندەك قىلىقلارنى قىلماڭ. يەنە بىر مۇھىم مەسىلە شۇنى؛ دوستىڭىز يۇرتتىن يىراق يەردە ئوقۇۋاتقان ياكى خىزمەت قىلىۋاتقان بولسا يۇرتىڭىزنىڭ تەرەققىياتىغا مۇناسىۋەتلىك ئىشلار بولسا دېسىڭىز بولىدۇ بىراق ئۇنىڭ كۆرەلىشى، ئىشلىتەلىشى، يىيەلىشى مۇمكىن بولمايدىغان نەرسىنىڭ گېپىنى قىلماڭ، بولۇپمۇ يۇرتنىڭ يەرلىك يىمەك – ئىچمەكلىرى توغرىسىدا كۆپ سۆزلىمەڭ. مۇساپىرچىلىقتا يۇرتىنى ۋە ئۆي تامىقىنى سېغىنىپ ئاران تۇرغاندا ئىچىنى ئاچچىق قىلىپ قويىسىز.
   3. دوستىڭىزنىڭ يوشۇرىۋاتقان مەخپىيەتلىكىنى سەزسىڭىز ياكى باشقىلاردىن ئاڭلىغان بولسىڭىز يۈزىگە سالماڭ. يىتەرسىزلىكى بولسا ئۇدۇللا دېمەي چىرايلىق پاراڭلىشىپ ئولتۇرغاندا ئالدىرماي سەسىمىيلىك بىلەن ئەسكەرتىپ قويۇڭ، ھەرگىزمۇ باشقىلار ئالدىدا ‹سەن زادى ئۇنداق زادى مۇنداق› دېگەندەك گەپلەرنى قىلماڭ. زىتىغا تېگىدىغان، غورىرىغا تىگىپ كېتىدىغان گەپلەرنى تېخىمۇ قىلماڭ. مىجەزىگە، كەيپىياتىغا، ۋاقتىنىڭ بار - يوقلىقىغا بېقىپ پاراڭلىشىڭ. ‹دوست يىغلىتىپ ئىيتار دۈشمەن كۈلدۈرۈپ› دېگەن ماقالغا بەك ئېسىلىۋالماڭ، نوۋىتى كەلگەندە باشقىلار ئالدىدا لايىقىدا ماختاپ قويۇڭ ئاشۇرىۋەتمەڭ، كەينىدىن گەپ قىلماڭ.
    4. دوستلىرىڭىزنىڭ شەخسىيىتىنى كوچىلاپ سوراپ يۈرمەڭ، ئەگەر ئۆزى خالاپ سۆزلەپ بەرگەن بولسا  سىزگە ئىشىنىپ دەپ بەرگەن سىرلىرىنى باشقىلارغا دەپ بەرمەڭ، تەسەللىيگە مۇھتاج بولسا لايىقىدا تەسەللىي بېرىپ قويۇڭ، كەيپىياتى ناچار ۋاقىتتا تەسەللى بولسۇن دەپ گۇنانى ئۆزىگە يۈكلەپ تۇرۇپ سۆزلىمەڭ، ئۇنداق قىلسىڭىز ئەكسىچە ئۈنۈمگە ئېرىشىدۇ – دە سىزگە  بولغان ئىشەنچىسىمۇ يوققا چىقىشى مۇمكىن، ھەمدە ئۆزىنى يالغۇزسىراپ قالغاندەك ھېس قىلىپ تېخىمۇ چۈشكۈنلىشىپ كېتىدۇ.
    5. دوستىڭىز ئالدىدا بەك سىرلىقمۇ بولىۋالماڭ، لېكىن ھەممە سىرىڭىزنى بىراقلا تۆكىۋەتمەڭ. ئېسىڭىزدە بولسۇنكى قىز – ئاياللارنىڭ جان كۆيەر دوستى كۆپ بولمايدۇ، ۋاقتى كەلگەندە سىز ئىشەنگەن دوستىڭىز يۈزسىزلىك قىلىشىمۇ، بارلىق سىرىڭىزنى چۇۋۇپ چىقىشىمۇ، دۈشمىنىڭىزگە ئايلىنىپ قېلىشىمۇ مۇمكىن. سىز ياقتۇرمىغان، نەزىرىڭىزگە ئىلمىغان بىرەرسى كۈنلەرنىڭ بىرىدە سىزگە دوستلۇق يەتكۈزۈپ قېلىشىنىمۇ  نەزەردىن ساقىت قىلماڭ.
6 . ئۆز ئۆزىڭىزگە تەسەللىي بېرىشنىمۇ ئۈگىنىۋېلىڭ. سىرتقا چىققاندا رەتلىك كىيىنىپ يۈرۈڭ، چاچ پوسۇنىڭىز بىلەن كىيىمىڭىز ۋە بارىدىغان سورۇنىڭىز ماسلىشىشى كېرەك. كىيىملىرىڭىزمۇ ئاياق، پايپاق، ۋە سومكىڭىز بىلەن ماسلاشسۇن، مودا قوغلۇشۇپ ئىسراپچىلىقمۇ قىلماڭ. ئوچۇق – يورۇق بولدۇم دەپ ھەممىلا يەردە كۈلۈمسىرەپ يۈرمەڭ، چاقچاق سورۇنلىرىدا چاكىنا ئاڭلىنىدىغان گەپ – سۆزلەرنى قىلماڭ. ئوبرازىڭىزنى ياخشى ساقلاڭ. قىزلارنىڭ ئىناۋىتى ئۇنىڭ قەدىر – قىممىتىدە بولىدۇ، ئۆز قەدىر قىممىتىڭىزنى ئەخلاق – پەزىلىتىڭىز ئارقىلىق ساقلىيالايسىز.  
        2012.11.5
باشقا مۇنبەرگە يوللىغاندا ئىسمىمنى ئۆچۈرىۋەتمەڭ، ئەگەر ئۆز نامىڭىزدا ككچۈرسىڭىز مەسئۇلىيىتىڭىز سۈرۈشتە قىلىنىدۇ!

رەخمەت سىزگە.

ياخشى  تىما،،،،،،،،،،

راس دەيدۇ ..........................

قىزلار دىققەت قىلىشقا تىگىشلىك ئۈزۈندىلەركەن ...رەھمەت سىزگە

بەك ياخشى گەپلەرنى قىپسىز.  

بەك ياخشى تېما ئىكەن رەھمەت.