ئابلىمىت ئەبەيدۇللا، نې ۋەنجۇ خەۋىرى : جۇڭگو ساياھەت تېلېۋىزىيەسى جەمئىيىتى ئۇيۇشتۇرغان 3 – نۆۋەتلىك جۇڭگودىكى ‹‹كىشىلەر ئەڭ تەلپۈنىدىغان جاي››نى باھالاش نەتىجىسى يېقىندا ئېلان قىلىندى. كۇچا ناھىيەسى ئۆزگىچە جەلپ قىلىش كۈچىگە ئىگە كۈسەن مەدەنىيىتى، ھەممە جايغا تارالغان ساياھەت مەنزىرە نۇقتىلىرى، كىشىنى مەپتۇن قىلىدىغان گۈزەل مەنزىرىسى بىلەن جۇڭگودىكى ‹‹كىشىلەر ئەڭ تەلپۈنىدىغان جاي›› بولۇپ تاللاندى.
ئۇقۇشىمىزچە، بۇ ناھىيە 2008 – يىلى ئۆزگىچە تارىخ، مەدەنىيەت ۋە ئېكولوگىيە بايلىقى ئۈستۈنلۈكىنى جارى قىلدۇرۇپ، ساياھەتچىلىكتە كۈچلۈك ناھىيە بەرپا قىلىش ئىستراتېگىيەسىنى يولغا قويغانىدى. شۇنىڭدىن بۇيان، بەش يۇلتۇزلۇق مېھمانساراي سېلىپ، مەنزىرە رايونىنىڭ يوللىرىنى ياخشىلىغاندىن سىرت، نۇرغۇن مەبلەغ ئاجرىتىپ قىزىلتاغ تاش ئورمانلىقى، چوڭ كىچىك كۆل، قىزىلقاغا تۇراسى، كۈسەن قەدىمىي شەھىرى قاتارلىق مەنزىرە رايونىنى ياخشىلىغان. بۇنىڭ بىلەن بۇ ناھىيەنىڭ ساياھەت كەسىپ كۆلىمى، ئىگىلىك باشقۇرۇش، مەنزىرە نۇقتا قۇرۇلۇشى، ماركا يارىتىش ئىشلىرىدا زور ئىلگىرىلەش ھاسىل قىلىنىپ، ‹‹شىنجاڭدىكى ئون چوڭ ساياھەت مەنزىرە رايونى››، ‹‹جۇڭگودىكى ئون چوڭ ساياھەت ئارامگاھى››، ‹‹جۇڭگودىكى ساياھەتتە ئەڭ جەلپكار كۈچلۈك ناھىيە›› دېگەن شەرەپكە ئېرىشكەن. بۇلتۇر ناھىيە كۈتۈۋالغان ساياھەتچى 800 مىڭ ئادەم (قېتىم)گە، ساياھەتچىلىكتىن قىلىنغان كىرىم 400 مىليون يۈەندىن كۆپرەككە يەتكەن. ھازىر، بۇ ناھىيەدە يۇلتۇز دەرىجىلىك مېھمانخانا ئونغا، AAAA دەرىجىلىك مەنزىرە رايونى ئۈچكە يەتكەن.
بۇ قېتىمقى پائالىيەت توردا بېلەت تاشلاش ئارقىلىق بىر يىل ئېلىپ بېرىلغان بولۇپ، ئون جاي جۇڭگودىكى ‹‹كىشىلەر ئەڭ تەلپۈنىدىغان جاي›› شەرىپىگە ئېرىشكەن. كۇچا ناھىيەسىنىڭ شىنجاڭدىكى جۇڭگودىكى ‹‹كىشىلەر ئەڭ تەلپۈنىدىغان جاي›› دېگەن شەرەپكە ئېرىشكەن بىردىنبىر ناھىيە بولۇشى – كۇچانىڭ تونۇلۇش دەرىجىسىنى ئۆستۈرۈپ، ساياھەتچىلىكنىڭ تەرەققىياتىنى ئىلگىرى سۈرۈشتە تۈرتكىلىك رول ئوينايدۇ.
| تەۋسىيە
| ئىزدەش رايۇنى
| مۇلازىمەتلىرىمىز
| بانكا
| مىدال مەركىرى
