بىر بۇرادەرگە تېز سىزما
(ساتىرىك مۇسەببە)





قۇدرەت قۇربان





ماقتىنىسەن ۋالاقلاپ،ئۆز-ئۆزۈڭنى باسالماي،


ئۇچتۇم دەيسەن ئەرشتە، مېڭىپ قىردىن ئاشالماي،

ئالتۇن دەيسەن تۇچۇڭنى، تۇچقا بازار تاپالماي،

پۈۋلەپ قويسا توزغاقتەك ئۇچۇپ كېتىپ قونالماي،

شاكال توپتەك تاقلايسەن، پالاق تەگسە تۇرالماي،

قۇسۇرچىسەن، ئۆزۈڭنىڭ ئوچۇق قالسا ياپالماي،

مەنسىتمەيسەن ساراينى، بىرەر ساتما قۇرالماي.





ھاتەمدىنمۇ سېخى دەپ، ئۆز-ئۆزۈڭنى ماقتايسەن،

ئەمما چىقىم بار جايدىن ئەپچىلگىنە ئاتلايسەن،

نەپ چىقمىغان كوچىدىن ھەرگىز بىكار چاپمايسەن،

ھېچ كىشىگە مەقسەتسىز زىنھار ئىشىك ئاچمايسەن،

باشقىلاردىن زەررىچە نەپ چىقمىسا، دادلايسەن،

بىر نان تاپساڭ، تېڭىدا داپ چالىسەن تۇرالماي،

ئاتاڭدىنمۇ قاقشايسەن، قالساڭ پايدا ئالالماي.





غۇم ساقلايسەن بەيگىدە ئۇزاپ ئالدىن چاپقاندىن،

ھالال ئەمگەك-مېھنەتتە ئاتاق-ئابروي تاپقاندىن،

تولغىنىسەن ھەسەتتە ئىشى ئوڭغا تارتقاندىن،

قىزغىنىسەن تۆھپىسى ئەل كۆڭلىگە ياققاندىن،

قۇسۇر ئىزدەپ يۈرىسەن مېلى بازار تاپقاندىن،

ئەلدىن ۋايساپ ئۆتىسەن، ئەل كۆڭلىنى ئۇتالماي،

ئەل دىتىغا ياققۇدەك شەرەپ-ئۇتۇق قۇچالماي.





بىر تۈپ كۆچەت تىكمەيسەن، ياراتمايسەن باغلارنى،

بويسۇندۇرۇپ ئاغزىڭدا تالقانلايسەن تاغلارنى،

مىكروسكوپتا ئىزدەيسەن كۆرۈنمىگەن داغلارنى،

شۇملۇق ئىزدەپ زۇغۇيدەك ئۆتكۈزىسەن چاغلارنى،

چىقالمىساڭ پەيتۇنغا پاچاقلايسەن چاقلارنى،

قامچىلايسەن ئېتىڭنى، ئېگەر- جابدۇق قاتالماي،

ئەيىپلەيسەن تۇلپارنى، تۇلپار كەبى ئۇچالماي.





ئاڭلىغۇڭ يوق ياخشىنى كۈيگە قاتسا باشقىلار،

ئەرزىمەيدۇ دېتىڭغا سەنسىز ئېيتقان ناخشىلار،

مەۋجۇت ئەمەس سېنىڭچە، سەنسىز سەرخىل- ياخشىلار،

سېھىرگەرلىك كەسپىڭدىن دوستلار ھەيران-ھەس قالار،

غەلۋىرىڭدە چەشلەرمۇ سامان بولۇپ تاسقىلار،

سامىنىڭنى داڭلايسەن، بۇغداي نەرقى ساتالماي،

ھوسۇلىڭنى جىڭلايسەن، تارازاڭغا تاش سالماي.





دەيسەن: مەنسىز چۆللۈكتۈر گۈل-گۈلىستان دالامۇ،

قىزىمايمىش سېنىڭسىز سورۇن، نەغمە-ناۋامۇ،

سەن بارمىغان سورۇنلار بولالمايمىش راۋامۇ،

ئەندىشەڭ شۇ:باشقىلار تۆردىن ئورۇن ئالارمۇ،

ياكى دەيسەن: چاۋامنى چۇۋۇپ چىتقا يايارمۇ،

زىنھار ئۇيقۇڭ كەلمەيدۇ بىرنى مىڭلاپ چاقالماي،

چۈشلىرىڭدە ئەرشكە يامىشىسەن چىقالماي.





ھەسەت قىلىپ ياخشىغا، يۈرىكىڭنى داغلايسەن،

رەڭۋازلىقتا ئۆزۈڭنى كەسپ ئەھلى چاغلايسەن،

تۇخۇمدىن تۈك ئۈندۈرۈپ، قۇرۇق گەپنى شاخلايسەن،

چاپىنىدا ئۆزگىنىڭ تەرلەپ ئىزا تارتمايسەن،

يامان كۆزدىن ئۆزۈڭنى ئىسرىق سېلىپ ئاچلايسەن،

ئاۋارىسەن ئەجرىسىز بەختىڭگە يول ئاچالماي،

چاتاق چىقسا دۆڭگەيسەن، قالساڭ بەدەر قاچالماي.





پال سالدۇرۇپ ئەقلىڭگە، مەستخۇش بولۇپ يۈرىسەن،

خىيالىڭدا دۇنيانى چىمچىلاقتا چۆرۈيسەن،

سۇلماس چىنار بولساڭمۇ، سۇسىز قالساڭ قۇرۇيسەن،

بولساڭ پانۇس، قانداقچە ياغ قۇيمىساڭ يورۇيسەن ؟!

شامال چىقسا قاياققا، سەن شۇ ياققا توزۇيسەن،

ئۆچۈرىسەن يانغاننى، ئۆزۈڭ تۈتەپ يانالماي،

ئېگىز شاخنى چاتايسەن، مېۋىسىنى قاقالماي.





يۈرىكىڭنى چاقىدۇ ساختا شۆھرەت غەملىرى،

شۆھرەت ئىزدەپ تېشىلدى ئايىغىڭنىڭ چەملىرى،

سەن يالىغان تاۋاقنىڭ ئۇپراپ كەتتى تەگلىرى،

ۋۇجۇدۇڭدا قۇترايدۇ ھىيلە-مىكىر پەملىرى،

بۇ كېسەلگە دوختۇرنىڭ كار قىلمايدۇ ئەملىرى،

ياراتمايسەن ئۆستەڭنى، بىرەر ئېرىق چاپالماي،

نىشانلايسەن مەرگەننى، مەرگەن كەبى ئاتالماي.





غاجىلايسەن تىنىمسىز ئارقىسىدىن ھەممىنى،

ياكى غاجاش سەن ئۈچۈن بەك مېزىلىك تەممىدى؟

غالجىر ئىتمۇ سېنىڭدىن ئۆگىنىشنى پەملىدى،

قىلىقىڭغا جامائەت لەنەت-نەپرەت ئەيلىدى،

غەيۋەت جىننىس رىكورتى سېنى ئىزدەپ كەلمىدى،

خۇي-پەيلىڭنى بۇرادەر، قالدىم تولۇق يازالماي،

مۆجىزىنى سەندىكى قالدىم تولۇق قازالماي.



كاينىات  مۇنبىرى

ياخشى يېزىلىپتۇ.  مەن تېخى رەسىم ئوخشايدۇ دەپتىمەن.

ھە راسىت  باشقۇرغۇچى  .
مەن ھەپتە ئىلگىرى 2 قېتىم تىما يوللىسام  يا ئۆزى يوق، ياكى سۆزى. 
  تىمام نەگە كەتتى.

تىما تەستىقلىغاندىن كىيىن چىقىدۇ.

تېمىڭىز  يوللانماي قالغان  ئوخشايدۇ ،  بىز  قانداق  تېما  بولسا  تەستىقلاپ  مۇنبەرگە  يوللايمىز  !