بازار ۋە مەن

قىزىپ كەتتى چارشەنبە بازار،
قەلبىمدىكى كۈيۈك ئوتىدەك.
شۇنچە قايناق ئادەم دېڭىزى،
سەزمەكتىمەن ئۆزۈم يالغۇزدەك.

سالام بېردۇ كىمدۇر بىرلىرى،
ناتۇنۇشتەك بىلىنەر ئەمما.
ئىزلىسەممۇ كۆڭۈل كۆزۈمدىن،
چېلىقمايدۇ شۇ تۇنۇش سىما.

سودا-سېتىق قىزىغان ماكان،
بازارغىلا ئايلانغان دۇنيا.
مەن تېخىچە خىيال ئىلكىدە،
يۈتۈرگەندەك ئۆزۈمنى گويا.

نەملىنىدۇ توپىلىق يوللار،
تەرلەر ئېقىپ ئىسسىق تەپتىدىن.
يۈرۈكۈمنى مۇجۇيدۇ تەشۋىش،
ياتسىرايدۇ ۋىسال ئەكسىدىن.

باققال توۋلار مىۋىسىن داڭلاپ،
مارۈژنىچى قولىدا سالقىن.
ئىسىمىڭنى توۋلۇغىم كەلدى،
بىتاقەتمەن تېزراق كەلگىن.