باشقۇرۇش ئەسكەرىتمىسى :

بۇ يازمىنى شىرىن بېلىق گۆشى تەييارلىندىغان قورىمىلار دىن بۇ سەھىپىگە يۆتكەپ كەلدى(2011-07-21)

    
     تۆكۈۋېتىلگەن تاماقلار


        يەڭلار ، ئىچىڭلار ، ئىسراپ قىلماڭلار .
               ـــ « قۇرئان كەرىم » دىن

                             پەسىللەرنىڭ كەينىدە بىز ،
                            ئىشتىھايىمىز ھەمىشە شامال .
                            كېلەر-كېتەر ، كېتەر –كېلەر ،
                           زېمىندىكى مامكاپ كىشىلەر .
                          پارقىرار سەھەرنىڭ ئاشقازىنى ،
                          كوركىرار چۈش ۋاقتى ئېچىپ ئاغزىنى .
                         يۇلتۇزى ئاچ قالغان يۇڭلۇق گۇگۇم
                         ئىككى يالماپ يۇتار بارچىنى .
                         يەپ ئىچىمىز ئەسەبىيلەرچە
                        قورسىقىمىز كۆرۈنمەس ھەتتا
                       يوغىنايمىز لەھەڭدەك ئاستا .
                      بەدبۇيىمىز قاپلار جاھاننى
                      بىر كۈنلەردە كىرسەك تۇپراققا .
                      ھەشەمەتلىك رېستۇرانلاردا
                      ھەشەمەتلىك يەپ ئىچىمىز .
                      يېگەنسېرى بىز باشقا مەخلۇق ،
                     يېگەنسېرى قۇرۇق ئىچىمىز .
                     ئېچىلىدۇ تاقاق ئىشىكلەر
                    نەپسىمىزنىڭ شىرى ھۆركىرەپ .
                    بىر كۈنى ئەي غاپىل كىشىلەر
                   بۇ تويماس گال تويار توپا يەپ .

                   بىر كۈنى كەچ
                   تۈگىدى زىياپەت                                                                                                                                                                                         ئۈستەللەردە تاۋاق-تاۋاق ئاش –
قورۇمىلار قالدى نىھايەت .
تۆكۈلگەندە تۆپە-تۆپىلەپ
ئەۋرەز يولى گۈرۈچ ، نىجاسەت .
مىسكىنلەر بار تالادا ئاچلىق ،
يىغلار ھۈنەر ، يىغلىدى ئاشلىق ،
قىزىل يۈزلەر بولماس خىجالەت .
نېمەت بىلەن مېھنەت جاۋابسىز ،
توختىغاندەك بىزدە ئىبادەت ،
بوسۇغىغا كەپتۇ قىيامەت .

مەن بىر شائىر سەھرانىڭ ئوغلى
شېئىرلىرىم كەلگەن زاغرىدىن .
ئىچ-باغرىم قان ، قۇلاقلىرىم پاڭ
بىر نان تاپسا چالغان ناغرىدىن .
ئاڭلىغان مەن مەدداھ ئاغزىدىن :
يەتتە ئورۇق باشاق دولقۇنلاپ
چىقىپ كەپتۇ نىل دەرياسىدىن .
ۋە يالماپتۇ بىرلا قىلىپ ھاپ
يەتتە سېمىز باشاقنى بىردىن .
قەھەتچىلىك يامراپتۇ ئاندىن ،
باشلانغانچە شەھرى كەنئاندىن
جفن شولىسى ئۆچۈپتۇ جاندىن
يەر يۈزىدە يەتتە يىلغىچە ...
ئەزىز خەلقىم ، ئاچ بىز تېخىچە
تەگكەن بىلەن ئاغزىمىز ئاشقا ،
كۆزىمىز ئاچ ، روھىمىز بەك ئاچ
تەگمىگىيدى بېشىمىز تاشقا .
كۆككە باقساق غېرىب ۋە تىمتاس
يەر يۈرىكى يېرىلدى تالاي .
ئۈستىمىزدە ۋالىلداق لىباس ،
ئىچىمىزدە قۇپقۇرۇق ساراي .
ئالتۇن كۈزدە دەل-دەرەخلەر باي ،
باشلىرىغا كىيەر ئالتۇن تاج .
قايتارمىز كۈز غازىڭى چىراي
تويلاردىن بىز ئېغىر ، نائىلاج .
كەتسە مېھمان يۇلتۇزدەك تاراپ
دۆ-دۆۋە تۆكۈلەر مەزە .
خارتىلدىشىپ ھولاقنى يالاپ
چاھارپايلار قىلىدۇ مەززە .

چۆچۈرىلەر مۇت ساناقلىقتەك
تۇيۇلىدۇ ماڭا ھەر بىر كۈن .
ئېغىز ئاچتۇق تۆت ئاياقلىقتەك ،
ھايات ھەزىم بولۇۋاتقان گۈل .

2005-يىل 7-ئاۋغۇسىت

بۇ ئىسراپخورلۇق ئۈچۈن ھامىنى بىر كۈن بەدەل تۆلىنىدۇ.