نۇر بەكرى ئەيدىزنىڭ ئالدىنى ئېلىش – داۋالاش خىزمىتىنىڭ بىرىنچى سېپىگە بېرىپ، ئەيدىز بىمارلىرىنى يوقلىدى
     ۋاڭ شىنخۇڭ، رېن پېيلۇ خەۋىرى : 1 – دېكابىر 23 – قېتىملىق دۇنيا ئەيدىز كۈنى. شىنجاڭ ئۇيغۇر ئاپتونوم رايونلۇق پارتكومنىڭ مۇئاۋىن شۇجىسى، شىنجاڭ ئۇيغۇر ئاپتونوم رايوننىڭ رەئىسى نۇر بەكرى ئەيدىزنىڭ ئالدىنى ئېلىش – داۋالاش خىزمىتىنىڭ بىرىنچى سېپىگە بېرىپ، ئەيدىز بىمارلىرىنى يوقلاپ، ئەيدىزنىڭ ئالدىنى ئېلىش – داۋالاش خىزمىتى ئەھۋالىنى ئىگىلەپ، ئەيدىزنىڭ ئالدىنى ئېلىش – داۋالاش بىرىنچى سېپىدە كۈرەش قىلىۋاتقان تېببىي خادىملار ۋە پىدائىيلاردىن سەمىمىي ھال سورىدى. ئۇ مۇنداق دېدى: پۈتكۈل جەمئىيەت ئەيدىزنىڭ ئالدىنى ئېلىش – داۋالاش خىزمىتىگە پائال كۆڭۈل بۆلۈپ ۋە قاتنىشىپ، ئەيدىز بىمارلىرىدا بۇ نىجىس كېسەلگە قارشى كۈرەش قىلىش ئىشەنچىسى تۇرغۇزۇپ، ئۇلارنى تۇرمۇشقا دادىل يۈزلىنىشكە يېتەكلەپ، ئۇلارغا سوتسىيالىستىك چوڭ ئائىلىنىڭ ئىللىقلىقىنى ھېس قىلدۇرۇشى كېرەك.

    نۇر بەكرى ئاپتونوم رايوننىڭ مۇئاۋىن رەئىسى تىلىۋالدى ئابدۇرېشىت قاتارلىقلارنىڭ ھەمراھلىقىدا بۇلاقتاغ رايونلۇق ئەيدىزنىڭ ئۇنىۋېرسال ئالدىنى ئېلىش – داۋالاش ئورنىغا كەلدى. ئۇ پاكىز شپىرىس ئالماشتۇرۇش مەركىزىدە مۇنداق دېدى: بۇ يىلقى ئەيدىز كۈنىنىڭ ئاساسىي تېمىسى يەنىلا ‹‹ئەيدىزنىڭ يامرىشىنى توسۇش، ۋەدىگە ئەمەل قىلىش››، ھەر دەرىجىلىك ھۆكۈمەت، شۇنداقلا داۋالاش، ساقلىق ساقلاش تارماقلىرى كۆپ خىل تەدبىرنى تەڭ قوللىنىپ، ئارىلىشىش تەدبىرىنى كۈچەيتىپ، ھۆكۈمەتنىڭ ۋەدىسىنى ياخشى ئادا قىلىشى كېرەك.

    نۇر بەكرى ۋىرۇسقا قارشى داۋالاش ئۆيىدە پىدائىي زەينۇرەگە مۇنداق دېدى: ‹‹سىلەر بىمارلار بىلەن تېببىي خادىملار ئارىسىدىكى كۆۋرۈك، ھۆكۈمەتنىڭ ئەيدىز بىمارلىرىغا بولغان غەمخورلۇقى ۋە ئۇلارنى قۇتقۇزۇش، داۋالاش تەدبىرلىرى ئاساسەن سىلەر ئارقىلىق ئەمەلىيلىشىدۇ. سىلەرنىڭ ئەيدىز بىمارلىرىغا داۋاملىق ھەقىقىي مېھرىبانلىق يەتكۈزۈپ، ئەيدىزنىڭ ئالدىنى ئېلىش – تىزگىنلەش ساۋاتلىرىنى چوڭقۇر تەشۋىق قىلىپ، پۈتكۈل جەمئىيەتنىڭ ئەيدىزنىڭ ئالدىنى ئېلىش – داۋالاش ئىشلىرىنى ئىلگىرى سۈرۈشتە تېخىمۇ چوڭ رول ئوينىشىڭلارنى ئۈمىد قىلىمەن››.

    نۇر بەكرى ئاپتونوم رايونلۇق يۇقۇملۇق كېسەللەر دوختۇرخانىسىنىڭ كېسەلخانىسىدا ئەيدىز بىمارلىرىنى سەمىمىي يوقلىدى، ئۇلار بىلەن قول سىقىشىپ كۆرۈشتى ھەم ئۇلارغا گۈل ۋە قۇۋۋەت يېمەكلىرى سوۋغا قىلدى. ئۇ ئەيدىز بىمارلىرىنى ئىشەنچىسىنى چىڭىتىپ، داۋالاشنى ئۈزۈپ قويماسلىققا رىغبەتلەندۈرۈپ: ‹‹سىلەرنىڭ پارتىيە ۋە ھۆكۈمەتنىڭ غەمخورلۇقى، جەمئىيەتنىڭ قىزغىن ياردىمىدە، كېسەل ئۈستىدىن غالىب كېلىپ، تېخىمۇ ياخشى تۇرمۇشقا ئېرىشىدىغانلىقىڭلارغا ئىشىنىمەن››، دېدى.

    نۇر بەكرى ئەيدىز بىمارلىرىغا خالىس ياردەم قىلىۋاتقان، سەمىمىي غەمخورلۇق قىلىۋاتقان تېببىي خادىملارغا گۈل سوۋغا قىلدى ھەم ئۇلارغا: ‹‹سىلەردىكى مەسئۇلىيەت ۋە بېسىم ئېغىر، ئەيدىزنىڭ ئالدىنى ئېلىش، ئەيدىز بىمارلىرىنى داۋالاش، قۇتقۇزۇش ۋە ئۇلارغا ياردەم بېرىش خىزمىتىدە تەڭداشسىز مۇھىم رول ئوينىغىنىڭلارغا رەھمەت››، دېدى.

    نۇر بەكرى ئاپتونوم رايونلۇق يۇقۇملۇق كېسەللىكلەر دوختۇرخانىسىنىڭ ئەيدىز بىمارلىرىنى كىلىنىكىلىق قۇتقۇزۇش ۋە داۋالاش ئەھۋالى توغرىسىدىكى دوكلاتىنى ئاڭلىغاندىن كېيىن مۇنداق دېدى: ھەر دەرىجىلىك ھۆكۈمەت، شۇنداقلا سەھىيە تارماقلىرى مەركەز ۋە ئاپتونوم رايوننىڭ ئەيدىزنىڭ ئالدىنى ئېلىش – داۋالاش خىزمىتىگە ئائىت ئورۇنلاشتۇرمىسىنى ئەستايىدىل ئەمەلىيلەشتۈرۈپ، مەسئۇلىيىتىنى ھەقىقىي ئادا قىلىپ، ئالدىنى ئېلىش – تىزگىنلەش نىشانىنى، سىياسەت، تەدبىرلىرىنى، مەسئۇلىيەت، ۋەزىپىسىنى ئەمەلىيلەشتۈرۈپ، ئەيدىزنىڭ ئالدىنى ئېلىش – داۋالاش خىزمىتىنى ئۈزلۈكسىز كۈچەيتىپ، ئەيدىزنىڭ تارقىلىشى ۋە يامرىشىنى قەتئىي توسۇشى كېرەك.

بولسا ھەممە جايلاردا ئەيدىز دېگەن نېمە؟ قانداق ئالدىنى ئېلىش كېرەك؟ قانداق يۇقىدۇ؟ قانداق تەكشۈرتۈش كېرەك؟ ئەيدىزگە گىرىپتار بولغاندا قانداق قىلىش كېرەك؟ ئەيدىز بىمارلىرىغا قانداق مۇئامىلىدە بولۇش كېرەك دېگەن مەسىلىلەر توغرىسىدا ھەر بىر كەنىتلەرگىچە تەشۋىقات ئېلىپ بېرىلغان بولسا ياخشى بولاتتى، بەلكىم بىر قىسىم چەت رايونلاردا بۇ نىجىس كېسەل نۇرغۇن ئائىلىلەرگىچە تاراپ بولدى، بۇنى ئۇلار بىلمەي يۈرۈيدۇ، بولۇپمۇ جەنۇبىي شىنجاڭدا..........

قاچان بۇ يوقلىغىلى بىزنىڭ مۇنبەرگە ئەمدى كەپتۇدە 2 - ئايدىلا يوقلاپ بولغان

رەھمەت