تېمپېراتۇرا ئۆزگىرىشى قارىماققا كۈندىلىك تۇرمۇش، ئۆگىنىش ۋە خىزمەتلىرىمىزگە ھېچقانچە چوڭ تەسىر كۆرسەتمەيدىغاندەك تۇيۇلىدۇ. بىراق، تېمپېراتۇرا ئۆزگىرىشىنىڭ يەر شارى كىلىماتى ۋە دۇنيا ئىقتىسادىغا غايەت زور تەسىر كۆرسىتىدىغانلىقىنى ئويلاپ باققانمۇ سىز؟ ناۋادا بۇنى ئويلاپ باقمىغان بولسىڭىز تۆۋندىكى بىر سېلسىيە گىرادۇسنىڭ قانچە پۇلغا يارايدىغانلىقى توغرىسىدىكى مەزمۇنلارغا دىققەت قىلىڭ.

ئادەتتە، ھاۋارايى مەلۇماتىدا دېيىلىدىغان ھاۋا تېمپېراتۇرىسى يەر يۈزىدىن 1.5 مېتىر ئېگىزلىكتىكى، بىۋاسىتە كۈن نۇرى چۈشمىگەن ئورۇندا ئۆلچەنگەن ھاۋا تېمپېراتۇرىسىنى كۆرسىتىدۇ. مۇھىت تېمپېراتۇرىسىنىڭ بىر سېلسىيە گىرادۇس ئۆزگىرىشى كۈندىلىك تۇرمۇش، ئۆگىنىش ۋە خىزمەتلىرىمىزگە ھېچقانچە چوڭ تەسىر كۆرسەتمەيدۇ، بىراق، يەر شارى كىلىماتىغا ۋە دۇنيا ئىقتىسادىغا غايەت زور تەسىر كۆرسىتىدۇ.

ئامېرىكا مېتېرىئولوگىيە ئالىملىرىنىڭ قارىشىچە، ئىقتىسادىي ئۈنۈم تېمپېراتۇرانىڭ ئۆزگىرىشىگە ئەگىشىپ ئۆزگىرىپ تۇرىدىكەن. يەر شارىنىڭ ئوتتۇرىچە تېمپېراتۇرىسى بىر سېلسىيە گىرادۇس ئۆزگەرسە، دۇنيانىڭ ئىشلەپچىقىرىش قىممىتى 7 مىليارد ئامېرىكا دوللىرى تۆۋەنلەپ كېتىدىكەن. ھاۋا تېمپېراتۇرىسىدىكى بىر سېلسىيە گىرادۇس ئۆزگىرىشنىڭ دۇنيا يېزا ئىگىلىكى، ئىشلەپچىقىرىشىغا كۆرسىتىدىغان تەسىرى تېخىمۇ زور ئىكەن. مۆلچەرلىنىشىچە، دېھقانچىلىق رايونلىرىنىڭ تېمپېراتۇرىسى بىر سېلسىيە گىرادۇس تۆۋەنلىسە، زىرائەتلەرنىڭ ئۆسۈش مەزگىلى بىر ھەپتە كەينىگە سۈرۈلۈپ كېتىدىكەن. ئامېرىكىلىق ئالىم دارچىنىڭ قارىشىچە، ناۋادا يەر شارىنىڭ ھاۋا تېمپېراتۇرىسى 20–ئەسىرنىڭ 70–يىللىرىدىكى ھاۋا تېمپېراتۇرىسىدىن بىر سېلسىيە گىرادۇس تۆۋەنلىسە، يەر شارىنىڭ %65 رايونىدا شالدىن بولىدىغان زىيان 956 مىليون ئامېرىكا دوللىرىغا يېتىدىكەن، دۇنيا پاختا مەھسۇلاتىنىڭ كېمىيىشىدىن بولىدىغان زىيان 2 مىليارد 200 مىليون ئامېرىكا دوللىرىغا، ئورمان مەھسۇلاتلىرىنىڭ زىيىنىمۇ 1 مىليارد 380 مىليون ئامېرىكا دوللىرىغا يېتىدىكەن.
ئېلىمىز مېتېرىئولوگىيە ئالىملىرىنىڭ تەتقىقات نەتىجىلىرىگە قارىغاندا، جەنۇبىي جۇڭگودا زىرائەتلەرنىڭ پىشىش مەزگىلىنىڭ ھەر بىر باسقۇچ ئۆزگىرىشىدە، ھوسۇل مىقدارىنىڭ ئۆزگىرىشى تەخمىنەن %10 بولىدىكەن، يەنى مۇھىت تېمپېراتۇرىسى بىر سېلسىيە گىرادۇس ئۆرلىسە ياكى تۆۋەنلىسە، ئاشلىق مەھسۇلاتى %10 ئەتراپىدا ئاشىدىكەن ياكى كېمىيىدىكەن. مەسىلەن: مەملىكىتىمىزنىڭ ئاشلىق بازىسى بولغان شەرقىي شىمال رايونىدا، ئەگەر شۇ يىللىق ھاۋارايىدا «سالقىن ياز» ئەھۋالى كۆرۈلسە ئاشلىق مەھسۇلاتى 10 مىليارد كىلوگىرامدىن 15 مىليارد كىلوگىرامغىچە، كېمىيىپ كېتىدىكەن. ئەكسىچە «ئىسسىق ياز»لىق ھاۋارايى كۆرۈلسە، يۇقىرىقىدەك ئاشلىقنى كۆپ ئالغىلى بولىدىكەن.

ئىقتىسادشۇناسلارنىڭ بايقىشىچە، تومۇز ئىسسىق كىشىلەرنىڭ ئىستېمال قىزغىنلىقىنى قوزغايدىكەن، ئەگەر يازدىكى ئوتتۇرىچە تېمپېراتۇرا بىر سېلسىيە گىرادۇس ئۆرلىسە، يۇقىرى تېمپېراتۇرىلىق كۈنلەرنىڭ سانى كۆپىيىپ، ھاۋا تەڭشىگۈچ، شامالدۇرغۇچ، يەلپۈگۈچ، سوغۇق ئىچىملىك قاتارلىقلارنىڭ سېتىلىش مىقدارى ھەسسىلەپ ئاشىدىكەن. گېرمانىيە جىنايى ئىشلار رازۋېدكا مۇتەخەسسىسلىرىنىڭ بايقىشىچە، ھەر يىلى 3–ئايدىن باشلاپ جىنايەت ئۆتكۈزۈش نىسبىتى تېز ئۆرلەپ، 7–، 8–ئايلاردا يۇقىرى پەللىگە چىقىپ، 9–ئايدىن باشلاپ تۆۋەنلەيدىكەن. تېمپېراتۇرا بىر سېلسىيە گىرادۇس ئۆرلىسە، جىنايەت ئۆتكۈزۈش نىسبىتى %15 ئۆرلەيدىكەن.

ھاۋا تېمپېراتۇرىسىنىڭ ئۆزگىرىشى كىشىلەرنىڭ سالامەتلىكىگىمۇ تەسىر كۆرسىتىدىكەن. مەسىلەن: شاڭخەي شەھىرىدە تومۇز ئىسسىق كۈنلىرىدە كېچىنىڭ تېمپېراتۇرىسى بىر سېلسىيە گىرادۇس ئۆرلىسە، ئۆلۈپ كېتىدىغانلار ئادەتتىكى چاغلاردىكىدىن كۆپىيىدىكەن.
مەنبەسى:جۇڭگو ئۇيغۇرچە رادىيو تورى

رەھمەت

تىمپىراتورا ياخشى بولمىسا مائاشمۇ ئۆسمەمدۇ-نىمە؟

يەرشارى ئاللا بۇرۇن ۋايران بولۇشىنىڭ يولىغا كىرىپ بولغان. تۇرلۇك ئاپاتلەر بۇنىڭ دەلىلى!!
ئاللاھ ئىمانىمىنى ساغلام قىلغىن!