چۈشتىن بۇرۇنقى يېرىم كۈنلۈك خىزمەت ۋە پائالىيەت جەريانىدا ئادەم خېلىلا چارچايدۇ، شۇڭا چۈشلۈك تاماقتىن كېيىن، مۇۋاپىق ئۇخلاشقا ئادەتلەنسە، چۈشتىن كېيىنكى خىزمەتنى تېخىمۇ ياخشى ئىشلىگىلى بولىدۇ.
ياز كۈنلىرى ئادەم ئۆزىنى ھارغىن ھېس قىلىدۇ، چۈنكى يازدا كۈندۈزى پائالىيەت كۆپرەك بولىدۇ، كەچ يېتىپ، سەھەر تۇرۇش، كۆڭۈل ئېچىش سورۇنلىرىغا بېرىش، خىزمەت جىددىيلىكى قاتارلىقلار تۈپەيلىدىن ئادەم ئۇيقۇغا قانمايدۇ، ئۇنىڭدىن باشقا، يازنىڭ ھاۋاسى ئىسسىق بولغانلىقتىن، چۈشتە بەدەن بوشاپ، قان تومۇرلار كېڭىيىدۇ، چوڭ مېڭىنىڭ قانغا بولغان ئېھتىياجى ئېشىپ، چۈشتە ئادەمنى ھارغىنلىق ۋە ئۇيقۇ باسىدۇ.
تېببىي ئىلىمدا كۆرسىتىلىشىچە، يازدىكى پىژغىرىم ئىسسىق تالنىڭ زەئىپلىشىشىنى كەلتۈرۈپ چىقىرىدىكەن، تال زەئىپلەشسە، ئاشقازاننىڭ ھەزىم قىلىش ئىقتىدارى ئاجىزلاپ كېتىدىكەن، شۇڭا ھارغىنلىقنى تۈگىتىش ئۈچۈن، چۈشتە ئازراق ئۇخلىۋېلىش كېرەك ئىكەن.
چۈشلۈك ئۇيقۇ كۆزنىڭ بىردەملىك ئاچچىقىنى چىقىرىپلا قالماستىن، بەلكى چوڭ مېڭىگە قان يەتكۈزۈشتە مۇھىم رول ئويناپ، چوڭ مېڭىنىڭ ساغلاملىقىنى ئاشۇرىدۇ، جىددىيلىك ۋە ھارغىنلىقنى تۈگىتىدۇ، ئادەم ئورگانىزمىدىكى بارلىق ئەزالارنىڭ فىزىيولوگىيەلىك پائالىيەتلىرىنى ياخشىلاپ، بەدەننىڭ ئىمۇنىتېت كۈچىنى ئاشۇرىدۇ. ئەمما چۈشتە ئۇخلاش ئىلمىي بولۇشى كېرەك.
ئادەتتە چۈشتە ئۇخلاشتىن بۇرۇن ئوزۇقلىنىشقا دىققەت قىلىش، يەنى ياغلىق يېمەكلىكلەرنى ئىستېمال قىلماسلىق، ھەددىدىن زىيادە تويۇپ كەتمەسلىك كېرەك. چۈنكى ياغلىق يېمەكلىكلەر قاننىڭ يېپىشىشچانلىقىنى ئاشۇرۇپ، قان قېتىش كېسىلىنى كەلتۈرۈپ چىقىرىدۇ، ھەددىدىن زىيادە كۆپ يېيىش ئاشقازاننىڭ ھەزىم قىلىش يۈكىنى ئېغىرلاشتۇرۇپ، چۈشلۈك ئۇيقۇنىڭ سۈپىتىگە تەسىر يەتكۈزىدۇ.
چۈشتە ئۇخلىغاندا ياستۇق قويۇپ ئۇخلاش، كارىۋاتتا ئوڭدىسىغا تۈز يېتىپ، ئۆزىنى ئازادە تۇتۇپ ئۇخلاش كېرەك. مۇشۇنداق قىلغاندا يۈرەكنىڭ بېسىمىنى ئازايتقىلى، خورەك تارتىشنىڭ ئالدىنى ئالغىلى ھەمدە ئاشقازان ۋە ئۈچەينىڭ ھەزىم قىلىش ئىقتىدارىنى ئاشۇرغىلى بولىدۇ.
چۈشتىكى ئۇخلاش ۋاقتىنى شۇ كۈندىكى يېرىم كۈنلۈك پائالىيەت ئەھۋالىغا قاراپ مۇۋاپىق ئورۇنلاشتۇرۇش كېرەك، چۈشتىكى ئۇيقۇ ئادەتتە يېرىم سائەتتىن ئېشىپ كەتمەسلىكى كېرەك، چۈشتە بەك كۆپ ئۇخلىسا، ئويغانغاندىن كېيىن باش ئېغىرلىشىپ، ئىش خۇشياقماس بولۇپ قالىدۇ. ئۇنىڭدىن باشقا، چۈشتە ئۇخلاپ ئويغانغاندىن كېيىن، ئېغىر ھەرىكەت قىلماسلىق كېرەك.
ئادەم ئۇخلىغاندا مۇسكۇللار بوشىشىپ، قان - تومۇرلار كېڭىيىدۇ، شۇڭا كارىدور، دەرەخ سايىسى، چىملىق، زەيكەش ۋە شامال ئېغىزى قاتارلىق جايلاردا ئۇخلاپ قېلىشتىن ساقلىنىش، ھاۋا تەڭشىگۈچ ۋە شامالدۇرغۇچلارنى ئوچۇق قويۇپ ئۇخلىماسلىق كېرەك.
مەنبەسى:جۇڭگو ئۇيغۇرچە رادىيو تورى

ئۇخلاشقا ۋاقىت يەتمىسە قانداق قىلارمىز؟

توغرا دەيسىز خوشامەت

ئادەتكە ئايلاندۇرسا ياخشى ئىش،

مەنمۇ  كۇندە  چۈشتە  ئۇخلاۋاتاتتىم  ،  بۈگۈن  ئەمدىلا  ئۇخلاي  دىسەم  بىرسى  تېلفون  قىلىپ  45 مىنۇت  سۆزلىشىپ  ، چۈشتىكى  ئۇيقۇمنىڭ  بىر  سائىتىنى  قازا  قىلىۋەتتى.................تېمىڭىزغا  كۆپ  رەھمەت  
ئوزۇقلۇق  شۇناسلار  ساغلاملىقنىڭ  تۆت  پۇتى  بار دەيدۇ  ئۇ :  مۇۋاپىق  ئوزۇقلىنىش  ،  يېتەرلىك  ئۇيقا  ،  نورمال  پىسخىكا  ،  مۇۋاپىق  ھەرىكەت  !  ئادەم كۈنىگە   كەم  دىگەندە  8  سائەت  ئۇخلاشقا  كاپالەتلىك  قىلىشى  زۆرۈر !

مەنمۇ چۈشلۈك ئۇيقۇنى بەك مۇھىم دەپ ئويلايمەن

مەنمۇ چۇشتە ئۇخلىيالماي مەن شۇ قاچانمۇ ئۇخلاشقا ۋاقىت چىقار ھە .

مەن ھەر كۈنى ئۇخلاي دەپ ياتساممۇ،پۇل ئىسىمگە كەلسىلا تۇرۇپ كېتىمەن قاراڭ ! توۋا-بۇ نىمە ئىشتۇ؟

مەنمۇ چۈشلۈك ئۇيقۇنى بەك مۇھىم دەيمەن،لېكىن ئادەم ئالدىراش بۇلۇپ ئۇخلاشقا ۋاقىت چىقارماق بەك تەس ئېكەن؟

مەنمۇ چۈشلۈك ئۇيقۇنى بەك مۇھىم دەپ ئويلايمەن