نۇرغۇن كىشىلەر ئورۇندۇقتا ئولتۇرغاندا پۇتىنى ئالماپ ئولتۇرۇشقا ئادەتلىنىپ قالىدۇ، پۇتىنى ئالماپ ئولتۇرسا ئۆزىنى ناھايىتى راھەت ھېس قىلىدۇ. ئەمما مۇتەخەسىسلەر شۇنى ئەسكەرتىدۇكى، پۇتىنى ئالماپ ئولتۇرۇش نۇرغۇن كېسەللىكلەرنى كەلتۈرۈپ چىقىرىش مۇمكىن.
  
       بىرىنچى، پۇت قىسمىدىكى ۋېنا تومۇرىنىڭ ئەگرى – بۈگرى ئۆسۈپ قېلىشىنى كەلتۈرۈپ چىقىرىشى ياكى قان نوكچىسى كەپلىشىپ قېلىش كېسىلىنى كەلتۈرۈپ چىقىرىش مۇمكىن. بېيجىڭ دوختۇرخانىسى يۈرەك ئىچكى كېسەللىكلەر بۆلۈمىنىڭ مۇئاۋىن مۇدىرى ليۇ دېپىڭ مۇخبىرنىڭ زىيارىتىنى قوبۇل قىلغاندا مۇنداق دېدى: پۇتنى ئالماپ ئولتۇرغاندا، تېگىدىكى پۇتنىڭ تىزى بېسىمغا ئۇچرايدۇ. بۇنىڭ بىلەن بۇ پۇتنىڭ قان ئايلىنىشى توسقۇنلۇققا ئۇچرايدۇ. ئىككى پۇت ئۇزۇن مەزگىل مىنگىشىپ تۇرۇش ھالىتىنى ساقلىسا، ئاسانلا قولىشىپ قالىدۇ، ئەگەر قان ئايلىنىش مۇشۇنداق توسقۇنلۇققا ئۇچراۋەرسە، پۇت قىسمىدىكى ۋېنا تومۇرلىرىنىڭ ئەگرى – بۈگرى ئۆسۈپ قېلىشى ياكى قان نوكچىسى كەپلىشىپ قېلىش كېسىلىنى كەلتۈرۈپ چىقىرىش مۇمكىن. "بولۇپمۇ يۇقىرى قان بېسىمى، دېئابىت، يۈرەك كېسەللىكلىرىگە گىرىپتار بولغان ياشانغانلار ئۇزۇن مۇددەت پۇتىنى ئالماپ ئولتۇرسا كېسەللىك ئەھۋالىنى تېخىمۇ ئېغىرلاشتۇرۇۋېتىشى مۇمكىن."
ليۇ مۇدىر مۇنداق تەكلىپ بەردى: پۇت مۇسكۇللىرى ئۇيۇشقاندەك ياكى ئاغرىغاندەك ھېس قىلغان ھامان دەرھال پۇتنى ئۇزۇن سۇنۇپ، ئىككى قول بىلەن قايتا – قايتا ئۇۋۇلاپ بېرىش ياكى يېنىك شاپىلاقلاپ بېرىش ئارقىلىق چارچاشنى تۈگىتىپ، قان ئايلىنىشنىڭ راۋانلىقىنى ئەسلىگە كەلتۈرۈش كېرەك.
      
     ئىككىنچى، ئەرلەرنىڭ كۆپىيىش ئەزالىرىنىڭ ساقلىقىغا تەسىر كۆرسىتىدۇ. "پۇتنى ئالماپ ئولتۇرۇشقا ئادەتلىنىپ قالسا، كۆپىيىش ئەزالىرىنىڭ ساقلىقىغا پايدىسىز." بېيجىڭ شيېخې دوختۇرخانىسى سۈيدۈك ئاجرىتىپ چىقىرىش تاشقى كېسەللىكلەر بۆلۈمىنىڭ مۇدىرى لى خۇڭجۈن مۇنداق دېدى: پۇتنى ئالماپ ئولتۇرغاندا، ئىككى پۇتنىڭ ئارىلىقى ئەڭ يېقىن ھالەتتە تۇرىدۇ، بۇ يوتىنىڭ ئىكى قىسمى ۋە كۆپىيىش ئەزالىرى ئەتراپىنىڭ تېمپراتۇرىسىنى ئۆرلىتىۋېتىدۇ. ئەرلەرگە نىسبەتەن ئېيىتقاندا، بۇنداق يۇقىرى تېمپىراتۇرا ئۇرۇقنى زىيانغا ئۇچرىتىدۇ، بۇ خىل ئەھۋال ئۇزۇن مۇددەت داۋاملاشسا، ئەرلەرنىڭ كۆپىيىش ئىقتىدارىغا تەسىر يېتىشى مۇمكىن. شۇڭا لى مۇدىر مۇنداق تەكلىپ بەردى: پۇتنى ئالماپ ئولتۇرۇش ۋاقتى ئەڭ ياخشىسى 10 مىنۇتتىن ئېشىپ كەتمەسلىكى لازىم، پۇتنى ئالماپ ئولتۇرغاندا يوتىنىڭ ئىچكى قىسمى تەر لەش سېزىمى كۆرۈلگەن ھامان يەرلىك ئورۇننىڭ ھاۋاسىنى ئالماشتۇرۇپ، ئىسسىقلىقنى سىرتقا تارقىتىش كېرەك.
    
      ئۈچىنچى، ئومۇرتقىنىڭ شەكلى ئۆزگىرىپ كېتىش ۋە ئومۇرتقا ئاغرىشنى كەلتۈرۈپ چىقىرىدۇ. بېيجىڭ دوختۇرخانىسى سۆڭەك كېسەللىكلىرى بۆلۈمىنىڭ دوختۇرى گاۋ شىنشېڭ مۇنداق دېدى: نورمال ھالەتتە ئادەم بەدىنى ئومۇرتقىسى يان تەرەپتىن قارىغاندا “Ｓ”شەكلىدە كۆرۈنىدۇ، پۇتنى ئالماپ ئولتۇرغاندا، ئاسانلا دۈمچەك بولۇپ قالىدۇ، ۋاقىتنىڭ ئۆتۈشى بىلەن ئومۇرتقىنىڭ شەكلى “Ｃ”شەكلىگە ئۆزگىرىپ، بەل ئومۇرتقىسى ۋە كۆكرەك ئومۇرتقىلىرىنىڭ تەكشىسىزلىكىنى كەلتۈرۈپ چىقىرىدۇ. بۇ خىل ئەھۋال ئۇزۇن مۇددەت داۋاملاشسا، ئومۇرتقا نېرۋىلىرى بېسىلىپ، ئومۇرتقا ئاغرىقىنى كەلتۈرۈپ چىقىرىدۇ.
    
      بۇنىڭدىن باشقا مۇتەخەسىسلەر يەنە مۇنداق تەكلىپلەرنى بەردى: ئۇزۇن مۇددەت ئولتۇرىدىغانلار ئەڭ توغرا بولغان ئولتۇرۇش ھالىتىنى ساقلىشى كېرەك، ئۇزۇن ۋاقىت پۇتىنى ئالماپ ئولتۇرۇشتىن ساقلىنىشى كېرەك. ئەگەر پۇتىنى ئالماپ ئولتۇرماسلىققا ۋاقتىنچە كۆنەلمىسە، پۇتنى ئالماپ ئولتۇرۇش ۋاقتى بەك ئۇزۇن بولۇپ كەتمەسلىكى كېرەك. بىر نەچچە مىنۇتتا بىر قېتىم ئولتۇرۇش شەكلىنى ئۆزگەرتىشى ياكى بىر سائەت ئەتراپىدا ئولتۇرغاندىن كېيىن، ئورنىدىن تۇرۇپ مۇسكۇللارنى ھەرىكەتلەندۈرۈپ بېرىشى كېرەك.
مەنبە:80 خالتا تورى

بىزگە بەك  پايدىلىق  تىيمىكەن ،  رەھمەت  سىزگە  

رەخمەت

مەن تولا شۇنداق ئولتۇراتتىم . لىكىن بۇنداق بۇ ئىشنىڭ بۇنداق يامان ئاقىۋەت ئېلىپ كىلىدىغانلىقنى بىلمەيدىكەن مەن .
ئەمدى بىلۋالدىم . رەخمەت سىزگە .