بالىڭىز KFC نىڭ توخۇ گۆشىنى يەيمەن دەپ غەلۋە قىلمايدىغاندۇ؟ ئۈرۈمچىدە KFC دە ئولتۇرغان
ئۇيغۇرلارنىڭ كۆپلىكىدىن ھەيران قالغانتىم. شۇنچىۋالا جىق ھالال تاماقخانىلار تۇرسا، چوقۇم ھارام
نەرسىنى ئىزدەپ بېرىپ يېيىشنىڭ نېمە ھاجىتى باردۇ؟
بۈگۈن KFC گە بارمايمۇ ئوخشىتىپ تەييارلانغان توخۇ پاچىقى ياكى توخۇ قانىتىنى ئۆيىمىزدىلا تەييارلاپ
يەيلى. بۇ يەردە مەن توخۇ پاچىقى، توخۇ قانىتى ۋە پوكىنى قاتارلىق قىسىملىرىنىڭ بىر نەچچە خىل تەييارلاش
ئۇسۇلىنى تونۇشتۇرماقچى. بولكا ئۇۋاقلىق توخۇ گۆشى پەقەت ئۇنىڭ ئىچىدىكى بىر خىلى.
لازىملىق خۇرۇچلار: توخۇ گۆشى، ئۆزىڭىز خالىغان قىسمىدىن خالىغىنىڭىزچە مىقداردا.
بولكا ئۇۋىقى: بىر پىيالە
بىر پىيالە ئۇن
ئىككى دانە تۇخۇم
تەملەندۈرۈش ئۈچۈن قارىمۇچ ۋە تۇز
بىر ئاش قوشۇق سۈت
قوشۇمچە: بۇ خىل توخۇ گۆشىگە توخۇنىڭ قانىتىنى ئىشلەتسىڭىز دېگەندەك تەملىك بولمايدۇ، پاچاق ۋە
توخۇنىڭ پوكىنى ئەڭ مۇۋاپىق كېلىدۇ. ئەگەر پاچاقنى ئىشلەتمەكچى بولسىڭىز پاچاقنى ئاۋۋال سۇدا چالا
پىشۇرىۋېلىپ ئىشلىتىڭ. ئەگەر پوكاننى ئىشلەتمەكچى بولسىڭىز ئامال بار تېرىسىنى پاكىز، سۆڭىكىنى
ئېلىۋىتەلىشىڭىزچە ئېلىۋېتىڭ، بۇنىڭدا بىر قەدەر ساغلام بولغان پىشۇرۇش ئۇسۇلى بولىدۇ.
بولكا ئۇۋىقىنى قانداق تەييارلايمىز: قېتىپ قالغان بولكىدىن بىر پارچىنى ئەگەر ئۆيىڭىزدە يېمەكلىككە
ئىش قوشقۇچ (Food processer خەنزۇچىسى 食品加工机 دېگەندەك نەرسە بولسا شۇنىڭغا
تەييارلىسىڭىزمۇ، ئەگەر ئۇ بولمىسا ھاۋانچىدا سوقۇپ تەييارلىسىڭىزمۇ بولىدۇ. چوقۇم ئۇششاق بولۇشى
كېرەك، بولمىسا توخۇغا ياخشى يېپىشمايدۇ. يۇقاردىكى رەسىمدىكىسى مەن ئاخشام تەييارلىغان بولكا
ئۇۋىقى، ھەردائىم چوڭ بىر قاچا قىلىۋېلىپ ئېلىپ قويىمەن، قۇرۇپ قاتقان بولكىنى ئۇۋاپ ئېلىپ قويسىڭىز
بۇزۇلۇپ قالمايدۇ.
تەييارلاش ئۇسۇلى:
توخۇ گۆشىنى پاكىز يۇيۇپ، بىر قاچىغا ئېلىپ قويىمىز. تۇخۇمنى چېقىپ ئىچىگە بىر قوشۇق سۈتنى قۇيىمىز.
(بۇنى قىلمىساقمۇ ھېچقىسى يوق، مەن بىر قانچە خىل رېتسىپنى سىناپ باقتىم، مۇشۇ ياخشى بولىدىكەن،
تۇخۇمنىڭ يېپىشىشچانلىقى يۇقىرى بولىدىكەن). بولكا ئۇۋىقىغا ئۆزىمىزنىڭ ياقتۇرۇشىمىزچە قارىمۇچ ۋە
تۇزنى ئارىلاشتۇرىمىز. بىر چوڭقۇرراق تەخسىگە ئۇننى، بىر قاچىغا تۇخۇمنى، بىر تەخسىگە بولكا ئۇۋىقىنى
قويۇپ تەييارلاپ قويىمىز.
لېسنىڭ ئاستىغا پارقىراق قەغەز ياكى مايلىق قەغەز سېلىپ قويساق ياخشى.
دوخۇپكىنى 175 گرادۇسقا توغرىلاپ قىزىتىپ قويىمىز.
تەييارلانغان توخۇدىن بىر پارچىنى ئاۋۋال ئۇن بار تەخسىگە سالىمىز، ئۆرۈلدۈرۈپ ھەممە تەرىپىگە ئۇن تولۇق
يېپىشقاندىن كېيىن قىسقۇچ ياكى ۋىلكا بىلەن ئېلىپ تۇخۇم بار قاچىغا سالىمىز، ھەممە تەرىپىگە تۇخۇمنى
تەكشى يېپىشتۇرغاندىن كېيىن بولكا ئۇۋىقى بار قاچىغا سالىمىز، بولكا ئۇۋىقىمۇ تەكشى يېپىشقاندىن كېيىن
ئېلىپ لېسقا سالىمىز.
ھەممە تۇخۇ پارچىلىرىنى مۇشۇنداق تەييارلايمىز.
ئاندىن دوخۇپكىغا سېلىپ، 6-7 مىنۇتتىن كېيىن ئېلىپ ئۆرۈپ يەنە 6-7 مىنۇت قويساق پىشىدۇ.
دىققەت: پىشقان-پىشمىغانلىقىنى بىلىشىتە، ئەگەر سىزدە يېمەكلىكنىڭ ئىچكى قىسمىنى ئۆلچەيدىغان
تېرمومىتىر بولسا، توخۇ گۆشىنىڭ ئىچكى تېمپىراتۇرىسى 100 گرادۇسقا يەتكەن بولسا، ئەگەر ئۇ نەرسە
بولمىسا، توخۇ گۆشىنىڭ شورپىلىرى چىقىشتىن توختاپ، لېسقا ئاققان شورپىسى قۇرۇپ قالغان بولسا
پىشىپتۇ دەپ ئالسىڭىزبولىدۇ. پىشىش ۋاقتى گۆشنىڭ چوڭ-كىچىكلىكىگە، دوخۇپكىغا باغلىق، مېنىڭ
دوخۇپكام بەك چوڭ، شۇڭا ئۇزۇندىراق پىشىدۇ.
ئىستېمال قىلىنىشى:
مۇشۇ پېتى ياكى سالاد بىلەن قوشۇپ، ئازراق پەمىدۇر قىيامى تەگكۈزۈپ يېسىڭىزمۇ بولىدۇ. ياكى توخۇ گۆشىنى
ياپىلاقلاپ پىشۇرۇپ ھامبۇرگ توقىچى ياساپ يېسىڭىزمۇ بولىدۇ. بېلىق گۆشىنىمۇ مۇشۇ خىل ئۇسۇل بىلەن
پىشۇرسىڭىز بولىدۇ.
ئەسكەرتىش: ئادەتتە تېز تاماقخانىلاردا ياغدا پىشۇرىدۇ. لېكىن ياغدا پىشۇرۇلغان يېمەكلىكلەر ساغلام يېمەكلىكلەر
ئەمەس
. شۇڭا ئەڭ ياخشىسى مەن تونۇشتۇرغان ئۇسۇلدا پىشۇرۇڭ، تەمىدە ئۆزگىرىش بولمايدۇ.
تېمامنى داۋاملىق يازىمەن، قىزىقىدىغانلار سىناپ بېقىپ تەجرىبەڭلارنى سۆزلەپ بېرەرسىلەر.
| تەۋسىيە
| ئىزدەش رايۇنى
| مۇلازىمەتلىرىمىز
| بانكا
| مىدال مەركىرى
