بىكەت تەۋسىيسى

 يېتىلىۋاتقان ياش مۇزىكا ئىجادىيەتچىسى، ئۆزگىچە ئاۋازى، ئۆزگىچە ناخشا ئېيتىش ئۇسلۇبى بىلەن ياشلار قەلبىگە زوق بېرىۋاتقان ئۈمىدلىك ياش رېھىمجان ئابدۇقېيۇم 1990- يىلى 10- ئاينىڭ 1- كۈنى ئەزىزانە دىيار قەشقەردە دۇنياغا كەلگەن. ئۇ باشلانغۇچ ۋە ئوتتۇرا مەكتەپنى ئۆز يۇرتىدا تاماملىغان، 2009-يىلى شىنجاڭ مائارىپ ئىنستىتۇتى مۇزىكا فاكۇلتېتىغا قوبۇل قىلىنىپ، 2013- يىلى ئەلا نەتىجە بىلەن پۈتتۈرگەن. ئۇنىڭ ئىجادىيىتى تولۇق ئوتتۇرا مەكتەپ ۋاقتىدىلا باشلانغان بولۇپ، ”ئۇنتالىغان بولسام“ ناملىق ئۆز ئىجادىيىتى بىلەن سەنئەت ئاسمىنىدا ئۆزىنىڭ لىرىكىسنى ياڭراتقان، ئۇ يەنە 2009- يىلى ”ئالداپسەن مېنى“ ناملىق ئىجادىي ناخشىسى ئارقىلىق ياشلارنىڭ قوللىشىغا ئېرىشكەن. ئۇنىڭ ئەستايىدىللىق، مەسئۇليەتچانلىق بىلەن تىرىشىشى ئارقىلىق ”سۆيگۈ دېگەن شۇنداق بولامدۇ؟“، ”بارغۇم بار“ قاتارلىق ئىجادىي ئاھاڭلىرى ھەم خەلق ئاھاڭلىرى خەلق ئاممىسىنڭ ئېتىراپ قىلىشىغا ئېرىشكەن. ئۇنىڭ ”ئانام يوق“، ”بۇنى قانداق مۇھەببەت دەيسەن“، ”مەھەللەمدە بىر قىز بار“ قاتارلىق ناخشىلىرى تېخىمۇ يارقىن نۇقتا ھېسابلىنىدۇ، ئۇنىڭ يەنە پات يېقىندا يېڭى ئىجادىيەت، يېڭى تېما مەزمۇنلاردىن تەركىب تاپقان پىلاستىنكىسى بازارغا سېلىنماقچى، ئۈمىد ئەل بىلەن كۆكلەيدۇ ھەم راۋاج تاپىدۇ، ئۇ داۋاملىق تىرىشىش ئارقىلىق ئەل قەلبىگە ياققان، ئەلمۇ سۆيگەن، سەنئەت بېغىغا لايىق بىر ئۈنى ئۆچمەس بۇلبۇل بولغۇسى.