'' ئۆلۈپ تىرىلگەن'' كىشىلەرنىڭ سىرلىق دۇنيادىكى ساياھىتى

سۈرخان · ۋاقتى: 2015-7-23 19:03:30

   ئۆلۈم گىرداۋىدىن قايتقان مىڭلىغان كىشىلەر ئادەمنىڭ ئىشەنگۈسى كەلمەيدىغان ئاجايىپ سىرلىق ئۆلۈم ساياھىتى قىلغان. بۇ خىل ئەھۋال ھازىر ئىلمى ھالدا ''ئۆلۈمگە يېقىنلىشىش ھادىسىسى'' دىيىلىدۇ. بۇ خىل ھادىسە دائىم ھەرخىل ۋەقەگە ئۇچرىغان كىشىلەر، ئوپراتسىيە ئۈستىدىكى كىشىلەردە كۆرىلىدۇ. ئۇلار بەدىنىدىن چىقىپ ۋەقە يۈز بەرگەن جايدا بوشلۇقتا بولىۋاتقان ئىشلارنى كۆزىتىپ تۇرىدۇ. بىراق ئۆز ئاۋازىنى ھېچكىمگە ئاڭلىتالمايدۇ....مەيلى بۇ كىشىلەرقايسى ئىرقتا، قايسى ئېتىقاتتا بولسۇن ياكى ئاتىست بولسۇن سەرگۈزەشتلىرىدە بەك كۆپ ئوخشاشلىقلار بار ...كۆپلىگەن ئالىملار، تەتقىقاتچىلار، دوختۇرلار بۇ سىرلىق ھادىسە ئۈستىدە ئىزدىنىپ بەزىلىرى بۇ پەقەت كىشىنىڭ مىڭە پوستلاق قەۋىتىنىڭ غىدىقلىنىشى نەتىجىسىدە شەكىللەنگەن خىيالى تۇيغۇلاردىن ئىبارەت دەپ يەكۈنلىگەن. بەزى ئالىملار، دوختۇرلار بولسا كىشىنىڭ يۈرىكى توختاپ 15 سىكۇنتتىن كىيىن مىڭە ھەرىكىتى توختايدۇ شۇڭا بۇ كىشىلەرنىڭ يۈرىكى توختاپ بولغاندىن كىيىن ئېڭىنىڭ ئۇيغاق ھالەتتە تۇرىشىنى چۈشەندۈرگىلى بولمايدۇ. ئۆلۈمدىن كىيىن بىر ھايات باركەن دىگەن كۆز قاراشقا كەلگەن.

   بىرىنجى گۇۋاھچى : 45 سىكۇنتلۇق چەكسىزلىك
   نىكول دىغون، ئايال ، فىرانسوز. ئۆلۈمگە يېقىنلىشىش ھادىسىسىنى باشتىن كەچۈرگەن ۋاقتى 26 ياش.
26 ياش ۋاقتىمدا، ئەڭ كىچىك بالامنى يەڭگىپ ئۈچ ھەپتىدىن كىيىن ئېغىر قاناش سەۋەبلىك جىددى ئوپىراتسىيە قىلىندىم. ئوپىراتسىيە باشلانغاندىمۇ ياكى ئاخىرلىشاي دىگەندىمۇ بىلمەيمەن ئۆزەمنىڭ ئوپىراتسىيە ئۆيىدىكى بوشلۇقتا ئۆزەمگە قاراپ تۇرغانلىقىمنى بايقىدىم. ھەممە جاينى ئېنىق كۆرەلەيتتىم . ئوپراتسىيە كارۋىتىدا ئېغىز-بۇرنۇمغا نەيچە سانجىلغان ھالەتتە يېتىپتىمەن. ئاھ قىز ! نىمانچە سەتلىشىپ كەتتىڭ! دىدىم. دوختۇر شۇ چاغدا تېز! قان ! دەپ ۋارقىرىدى. سېستىرا يۈگىرەپ چىقىپ قان ئەكىردى، كەينىدىن يەنە بىرنى ئەكىردى. دوختۇر يەنە:  ئۇ بولالمايۋاتىدۇ دىدى. شۇ چاغدا ساقلاش ئۆيىدىكى ئېرىمغا ئەنسىرىمە، ئوپراتسىيە ئوڭۇشلۇق بولىدۇ دىگىنىم ئىسىمگە كەلدى. ئېرىمنى ئويلىشىم بىلەن تەڭ تامدىن ئۆتۈپ تەسەۋۋۇر قىلغۇسىز بىر سۈرئەتتە ساقلاش ئۆيىدە پەيدا بولدۇم. ئۇ خىل ھالدا بىز ئۆزىمىزدىن نىمە بولىۋاتىدۇ دىگەن سۇئالنى سوراشقىمۇ ئۈلگۈرمەيدىكەنمىز ، خۇددى ئىشلار شۇنچىلىك تەبىئىدەك . ئېرىمنى ، قېينى ئاتامنى كۆردۈم. ئۇلارغا گەپ قىلاتتىم، ئەتراپىدا چۆگىلەيتتىم ، قولۇمنى پۇلاڭلىتاتتىم بىراق ئۇلارنىڭ مېنى كۆرەلمەيۋاتقىنىنى چۈشەندىم. قولۇمنى ئۇلارنىڭ مۈرىسىگە قويغىنىمدا قولۇم يەنە بىر تەرەپكە ئۆتۈپ كەتتى.  ئاندىن قېينىئانامنىڭ بالىلىرىمغا قاراپ ئۆيدە قالغىنىنى ئىسىمگە ئالدىم. دوختۇرخانىدىن چىقماي، يول ماڭماي تۇرۇپلا ئۆيدە پەيدا بولدۇم. بالىلىرىمنىڭ تاماق يەۋاتقانلىقىنى كۆردۈم. ئاندىن ئۆزۈمنى ئاتا- ئانامنىڭ ئۆيىدە كۆردۈم، ئانام دادامغا: ۋايجان، قىزىم نىمە بولۇپ كەتكەندۇ! دىسە ، دادام تېز بولۇڭلار تېز ماڭايلى دەۋاتقان ئىدى. كىيىن ، ساقايغاندىن كىيىن دادام ئانام مۇشۇ دىئالوگلارنىڭ راستلىقىنى تەستىقلىدى. كەينىدىن ئۆزەمنى چەكسىز بىر بوشلۇق، جىمجىتلىقتا ھېس قىلدىم، شۇ چاغدا ئۆزەمنى رەسمى ئۆلگەن ئوخشايمەن دەپ ئويلىدىم. يىراقتىن بىر نۇر كۆرۈندى، شۇ نۇرغا يېقىنلاشتىم. نۇرنىڭ شەكلىنى بىر تونىلدەك ھېس قىلدىم. نۇرنىڭ ئىچىگە كىرگەن ۋاقتىم پۈتۈن ھاياتىمدىكى ئەڭ گۈزەل پەيتلەر ئىدى. نۇرنىڭ ئىچىدە چەكسىز مېھىر-مۇھەببەتنى ھېس قىلدىم، چەكسىز تېنچلىقنى ھېس قىلدىم ھەمدە مۇشۇ نۇرنىڭ ئىچىدە مەڭگۈلۈك قالىمەن دەپ چۈشەندىم. بىر نەچچە مەخلۇقاتلارنى كۆردۈم. ئاندىن تەسۋىرلىگۈسىز گۈزەل بىر باغقا كىردىم. باغدىكى ئوت-چۆپلەرنىڭ مولىكۇلىلىرىغىچە كۆرەلىدىم، ئۇ يەردىكى گۈللەر مەن دۇنيادا كۆرگەن رەڭلەردىن باشقا رەڭلەردىمۇ ئېچىلغان ئىدى. ئاۋازلارنىڭ رەڭگى، رەڭلەرنىڭ ئاۋازلىرى بار ئىدى...بۇيەردىكى  گۈزەللىكلەرنىڭ ھەممىسى شۇنچىلىك گارمونىيىلىك ئىدى. ئاندىن يەتتە ئايلىق ۋاقتىدا ئۆلۈپ كەتكەن ئۇكامنى كۆردۈم بىراق مېنىڭ كۆرگىنىم نۇرغا چۆمۈلگەن بىر ياش-ئۆسمۈر ئىدى.
   ھەممە ھەممە بىرلا ۋاقىتتا ، بىر چەكسىزلىكنىڭ ئىچىدە يۈز بىرىۋاتاتتى. ئاندىن ئەتراپىمدىكى چەكسىز كائىنات بىر كىشىنىڭ ياكى باشقا بىر مەخلۇقاتنىڭ شەكلىگە كەلگەندەك بولدى ئاندىن ماڭا : سەن قانداق سۆيدۈڭ ؟ باشقىلار ئۈچۈن نىمە قىلدىڭ ؟  دىدى. مەن مۇشۇ گەپلەرنى ئاڭلاۋاتقاندا مەن پۈتكۈل ئىنسانىيەتنى، تارىخىنى ، ئىنسانلارنىڭ ئازابلىرىنى كۆرگەندەك بولدۇم. ئاندىن 26 ياشتىن باشلاپ بوۋاق ۋاقتىمغىچە بولغان ھاياتىمنى كۆردۈم. ھاياتىمدىكى ھەر بىر ئىش، ھەر بىر ھېسياتنى ئېنىق ھېس قىلىشقا باشلىدىم. بالىلىرىم، تويۇم، ياش قىز ۋاقىتلىرىم، بالىلىق ۋاقتىم، مۈشۈكۈم...بىرلا ۋاقىتتا مەن ھەم ئۆزەم ھەم باشقىلار ئىدىم . يامانلىقلىرىمنى كۆرگەندە مەن يامانلىق قىلغان كىشىنى ھېس قىلاتتىم. ياخشى ئىشلىرىمنى كۆرگەندە مەن قىلغان ياخشىلىق قايتۇرۇلۇپ ئۆزەمدە  ھېس قىلاتتىم....
قۇتقۇزىۋېلىنغاندىن كىيىن مەن يۈرىكىمنىڭ 45 سىكۇنت توختاپ ئۆلۈم ھالىتىگە كىرىپ قالغىنىمدىن خەۋەر تاپتىم.  بىراق مۇشۇ 45 سىكۇنتتا مەن چەكسىزلىكنى ھېس قىلدىم. ئاشۇ چەكسىزلىككە سېلىشتۇرغاندا مېنىڭ ھازىرقى ھاياتىم ھېچنىمە ئەمەس ئىدى، شۇ چەكسىزلىكتىن قايتىپ كەلگۈم يوق ئىدى.. ئاشۇ چەكسىزلىكتىكى مۇھەببەت، مېھىر، تېنچلىقنى تىل بىلەن تەسۋىرلىگىلى بولمايدۇ... سىزگە دىسەم ئۆلۈم مەۋجۇت ئەمەس، ھاياتلىق چەكسىز ...
مېنىڭ كۆرگەنلىرىم چۈش ئەمەس....

كىينكى قېتىم ئامرىكىلىق نېرۋا تاشقى كىسەللىكلىرى دوختۇرى ئالىكساندىر ئېبېننىڭ ئۆلۈمگە يېقىنلىشىش سەرگۈزەشتىسىنى تونۇشتۇرىمىز.

سەردار. · ۋاقتى: 2015-7-23 20:42:28

مەن تېخى كىنو-پىنو تەسىراتى ئوخشايدۇ دەپتىمەن

ئىقلىم · ۋاقتى: 2015-7-23 21:33:02

ئەجەپ بىشىم پىقىراپ كەتتى،سوراق سۇئاللاردىن ئاسانلا قۇتۇلغاندەك تۇيغۇ بىرىپ قويدىكەن ئادەمگە، لىكىن ئۇ ھەقىقى ئۆلمىدىدە ئۆلگەن بولسا ئۇنداق ئاسان ئىش ئەمەسلىكىنى بىلەتتى

سۈرخان · ۋاقتى: 2015-7-24 10:51:56

ئىككىنجى گۇۋاھچى : ئۇ يەر چىن ، بۇ ئالەم چۈشكە ئوخشايدۇ
ئالىكساندىر ئېبېن ، ئەر، ئامرىكىلىق، ئۆلۈمگە يېقىنلىشىش ھادىسىسىنى باشتىن كەچۈرگەن ۋاقتى: 2008 – يىلى

   ئالىكساندىر دوختۇر ئۆيىدىن دوختۇرخانىغا ئېلىپ بېرىلغۇچىلىك بولغان ئىشلارنى ئۇنتۇپ كەتكەن، دەسلەپتە ئىسىگە كەلگىنى ھوشسىز ھالەتتە كۆرگەنلىرى.
  قاراڭغۇلۇقتا - كۆرگىلى بولىدىغان بىر خىل قاراڭغۇلۇقتا خۇددى سازلىققا پېتىپ كەتكەن بىر خىل ھېسياتتا، خۇددى قان تومۇرلاردەك ياكى يىلتىزلاردەك نەسىلەر ئەتراپىمنى ئورىۋالغان ئىدى. پەقەتلا مېخانىكىلىق، تەكرار تەكرار بىر چىدىغۇسىز ئاۋازنى ئاڭلاۋاتاتتىم. بۇخىرە، تۇتۇق دۇنياغا چۆكۈپ كىتىۋاتاتتىم. سىزىمىم بار ئىدى بىراق ئىگىسىز، خاتىرىسىز بىر خىل غەلىتە سىزىم ئىدى. ئاستا-ئاستا باشقا بىر نەرسە –چىرمىلاشقان  ئاق، ئالتۇنرەك نۇر پەيدا بولۇشقا باشلىدى. بۇ نۇرغا مەن ئەزەلدىن ئاڭلاپ باقمىغان، ئاجايىپ گۈزەل، ئەڭ مۇرەككەپ بىرخىل مىلودىيە تەڭكەش بولغان ئىدى. بۇ نۇر ماڭا يېقىنلىشىپ بىر يېرىق پەيدا بولدى. مەن بۇ يوچۇقتىن ئۆتۈپ ئىنتايىن ئۆزگىچە بىر دۇنياغا ئۆرلىدىم. مەن ساياھەت قىلغان بۇ كائىنات مەن ئەزەلدىن چۈشۈمدە كۆرۈپ باقمىغان بىر يەر ئىدى.  يېنىمدا كۆزلىرى تىنىق كۆك، چىرايلىق بىر قىز مىليونلىغان كىپىنەكلەرنىڭ ئارىسىدا مېھرى بىلەن كۈلۈمسىرەۋاتاتتى. ئۇ ماڭا سۆزسىز ھالدا : سەن مەڭگۈلۈك سۆيۈلدۈڭ، بۇ يەردە يامانلىق يوق، قورققۇدەك ھېچنىمە يوق دىدى.
ئالىكساندىر دوختۇر ئۇ يەردە  ھالرەڭگە كىرگەن ئاق بۇلۇتلارنى، سۈپسۈزۈك مەخلۇقاتلارنى، گۈللەرنى، بالىلارنى ، بۇ ئالەمدە كۆرگىلى بولمايدىغان ئاجايىپ تەسەۋۋۇر قىلغۇسىز گۈزەللىكلەرنى  كۆرگەنلىكىنى ئېيتىدۇ.
مەن ئۆزەم نېرۋا بۆلىمى تاشقى كىسەل دوختۇرى بولغانلىقىم ئۈچۈن بۇ ھادىسىنى باشتىن كەچۈرگەندىن كىيىن ئەڭ باشتا بۇنى نېرولوگىيىلىك بىر جەريان بولىشى ، ئۆزەمنىڭ تۇيغۇم بولىشى مۇمكىن دەپ ئويلاپ باشتىن كەچۈرگەنلىرىمنى مىڭىگە باغلىنىشلىق بىر ھادىسە ، بولۇپمۇ ئۆتكۈر خاراكتىرلىق باكتىرىيە مەنبەلىك مىڭە پەردە ياللۇغىغا باغلىنىشلىق بىر ھادىسە دەپ نېرۋا ئىلمى ژۇرنىلىدا چۈشەندۈرمەكچى بولدۇم. كىسەل بولۇپ ئېغىرھوشسىزلانغاندا پەيدا بولغان ھەمدە مېنىڭ روھى دۇنيايمغا تەسىر قىلغان بۇ ھادىسىنى چۈشەندۈرىشىم كىرەك ئىدى. ئەسلى تەتقىقاتچى ھەمدە ماتىرىيالىست بولغانلىقىم ئۈچۈن ئەگەر ئۆزەمنىڭ بىمارى بۇنداق ئەھۋالغا ئۇچرىغان بولسا چوقۇم ئۇنىڭغا پەن نۇقتىسىدىن چىقىپ چۈشەندۈرگەن بولاتتىم.
مىڭە پەردىسى ياللۇغلانغاندىن باشلاپلا نەچچە سائەتنىڭ ئىچىدە مېنىڭ پۈتۈن مىڭە فۇنكىسىيەلىرىم ئەڭ تۆۋەن چەككە چۈشۈپ كەتكەن، ياللۇغ غول مىڭىگە تارالغان، كۆزلىرىم چېچىلغان، ئانتىبىئوتىكلارغىمۇ بەدىنىم ئىنكاس بىلدۈرمىگەن ئىدى. ئادەتتە بۇنداق ئېغىر ھالەتتە ئۈچ كۈندىن كىيىن بىمار يا ئۆلۈپ كىتىدىغان يا كۆزىنى ئاچىدىغان بولغاچقا دوختۇرلىرىم ئالتىنجى كۈنى ياشاش پۇرسىتىم ئىككى-ئۈچ پىرسەنتكە چۈشكەندە ئانتىبىئوتىكلارنى توختۇتۇشنى ئاندىن مېنى ئۆسۈملۈك ئادەم قاتارىدا كۆزىتىشنى مۇزاكىرىلىششكە باشلىغان ئىدى. يەتتىنجى كۈنى ئەتىگەندە ھوشۇمغا كىلىشكە باشلىغىنىمدا باشقىلارنىڭ قانچىلىك چۆچۈپ ، ھەيران قالغىنىنى بىلىشكە بولىدۇ. مۇناسىۋەتلىك ئېلمېنتلاردىن مېنىڭ ئۆلۈمگە يېقىنلىشىش ھادىسىسىنى باشتىن كەچۈرگەن ۋاقتىم بولۇپمۇ بىرىنجى ۋە بەشىنجى كۈنى يەنى ئەڭ قاتتىق ھوشسىزلانغان، تەكشۈرۈش دوكلاتلىرىدا ھېچقانداق ھېس-سىزىم، ئاڭ يوق دەپ دىئاگنوز قويۇلغان چاغدا يۈز بەرگەن ئىدى. بۇ چاغدا ئاڭ-سىزىم، كۆرۈش سەزگۈسى، ئاڭلاش سەزگۈلىرىگە، چۈشىنىش، تىل، تەپەككۈرلەرگە مۇناسىۋەتلىك مىڭە پوستلاق قەۋىتىمدە ھېچقانداق فۇنكىسىيە قالمىغان ئىدى،  ئەتراپىمىزدا يۈز بىرىۋاتقان ئىشلارنى بىلىش ئۈچۈن ، ھېس قىلىش ئۈچۈن مىڭە پوستلاق قەۋىتىمىزنىڭ بىر بۆلىكى بولسىمۇ نورمال فۇنكىسىيەدە بولىشى كىرەك بىراق مېنىڭ مىڭە پوستلاق قەۋىتىم ئاساسەم كاردىن چىققان ھالەتتە يەتتە كۈن جەريانىدا باشتىن كەچۈرگەنلىرىم شۇنچىلىك چىن . ئالتە ھەپتىدە يىگىرمە مىڭ خەتلىك خاتىرە يېزىش جەريانىدا  تىلىم، ئەسلىمىلىرىم ، تۇرمۇش بىلىملىرىم، تەبىئى پەن بىلىملىرىم، كەسپى بىلىملىرىم ھەممىنى قايتا تېپىۋالدىم ، مۆجىزە كەبى ھېچقانداق ئاسارەت قالمىغان ھالدا ساقايدىم.  بىز بىلەن بىللە كەلگەن بىر بۆلىكىمىز بار، يىللاردىن مەن بىر ئاۋاز بىلەن ياشاپ كىلىۋاتىمەن .  بۇ ئاۋاز بىز بىلەن بىللە مەۋجۇد بولۇپ تۇرىدۇ بىراق ئۇ بىزنىڭ ئاڭ-سىزىمىمىز ئەمەس. تۇيغۇلىرىمىز بىلەن بىرلىشىش ئۈچۈن،  بىر نەسىنى سوراش ئۈچۈن، دىققەت ئۈچۈن بىز كاللىمىزدىكى مۇشۇ ئاۋازغا مۇراجىئەت قىلىمىز. بىزدىكى ھەممە سىزىملار ئەڭ ئاخىرى پەقەت بىرلا چوڭقۇر سىزىشكە ئايلىنىدىكەن.
مەن كۆرگەن ئۇ قۇۋۋەتلىك، نۇرلۇق ئالەم بۇ ھاياتتىن كۆپ چىن. بۇ ھاياتىمىز چۈشكىلا ئوخشايدۇ. ئۇ ئالەمدە كۈچلۈك مەۋجۇتلۇقنى ھېس قىلالايمىز.

كىلەر قېتىملىق گۇۋاھچى رون رېگان : دوزاخ ! دوزاخنى كۆردۈم !

razzak · ۋاقتى: 2015-7-24 10:53:49

ئاخىرنى تىزراق يوللىسىڭىز بولاتتى ، قىزىقىپ قىلىۋاتىمەن .

زۇليار330 · ۋاقتى: 2015-7-25 19:06:13

داۋامىنى يوللىمايسىزغۇ،تازا قىزىق يەرلىرىگە كەلگەندە...

فارۇخ · ۋاقتى: 2015-7-26 22:57:42

داۋامى دون رىگان دىگەن كۆك كۆزنىڭ كۆرگىنىنى ئاڭلاپ باقايلى

سۈرخان · ۋاقتى: 2015-7-28 22:18:01

ئۈچىنجى گۇۋاھچى : دوزاخ ! دوزاخنى كۆردۈم !
رون رېگان ، ئەر، ئامرىكان ، ئۆلۈمگە يېقىنلىشىش ھادىسىسىنى باشتىن كەچۈرگەن ۋاقتى : 20 يىل بۇرۇن
پىرافېسور مورىىس راۋلىنسنىڭ سۆزلىرى : مەن ئاتىست ئىدىم. بىر بىمارىمنى جىددى قۇتقۇزىۋاتقاندا مەن ئۇنىڭ ئۆلۈمگە يېقىنلىشىش ھادىسىسىنى باشتىن كەچۈرىۋاتقىنىنى بىلدىم. بىمارىمنىڭ كۆزلىرى بىر ئاجايىپ كېرىلىپ ، پۈتۈن چاچلىرى تىك تۇرۇپ كەتكەن ئىدى. مەن ئەزەلدىن ئۇنچىلىك قورقۇپ كەتكەن بىمارنى كۆرۈپ باقمىغان ئىدى. مەن يەنە بۆلۈمدە باشقا بىر نەرسىنىڭ بارلىقىنى ئېنىق ھېس قىلدىم، مەن دوختۇر بۇ يەرنىڭ مەسئۇلى دەيتتىميۇ، خۈدۈكسىرەۋاتقان ئىدىم.
زور كۆپچىلىك ئەھۋاللاردا جىددى قۇتقۇزۇشقا كىرگەن كىشىلەر قۇتقۇزىۋېلىنىدۇ.
ئامرىكىدا  11 مىليون كىشى ''ئۆلىۋاتقاندا''  نۇر تونىلىنى كۆرگەنلىكىنى ئېيتقان. ئۆلۈمگە يېقىنلىشىش ھادىسىسىنى باشتىن كەچۈرگەن كىشىلەرنىڭ زور كۆپ سانلىقى دوزاخنى كۆرگەن ھەم جىم –جىت ھالدا بۇ دەھشەتلىك مەنزىرىلەرنى ئۇنتۇپ كىتىشنى تاللىغان. ئۇلارنىڭ ئىچىدىكى ئىنتايىن ئاز ساندىكى كىشىلەرلا ئۆزىنىڭ كۆرگەنلىرىنى ئېيتىشقان . قايسى بىرەيلەننىڭ ئۆز ھاياتىنىڭ مەغلۇبىيەت بىلەن نەتىجىلەنگەنلىكىنى باشقىلارغا ئىقرار قىلغۇسى كەلسۇن ؟ ھەتتا ئاتا-ئانىمىزغىمۇ، ئائىلىمىزدىكىلەرگىمۇ ئېيتمايمىز. بىر نەچچەيلەنلا مۇشۇ سەۋەب بىلەن يۈرىكىنى تىڭشاپ باقىدۇ، باشقىلار بۇ خاتىرىلارنى كۆڭلىگە كۆمۈپ ، ئۆزىنى ئازابلىشىغا كۆنىدۇ.

توققۇز ياش ۋاقىتلىرىم، تاغدا ياشايتتۇق. دادام دىندار ئەمەس ئەكىسچە بىر ھاراقكەش، زومىگەر كىشى ئىدى. قاچانلا بولسا ۋارقىراپ-جارقىرايتتى، بىزنى ئۇراتتى. بىركۈنى مەكتەپنىڭ يولىدا بىر خانىم ماڭا كىچىك قوزىچاقنى سوۋغا قىلدى. قوزىچىقىم بىلەن تېزلا ئايرىلغۇسىز بولۇپ كەتكەن ئىدۇق. بىركۈنى ئۆيگە قايتىپ دادامنىڭ قوزامنى ئۆلتۈرىۋەتكەنلىكىنى كۆردۈم. ئورمانلىققا بېرىپ تازا ھۆكىرىدىم، ئارانلا توققۇز يېشىمدا پۈتۈن يۈرىكىم بۇ دۇنياغا بولغان نەپرەت ۋە ئاچچىق بىلەن تولغان ئىدى. 12 يېشىمدىن باشلاپ لۈكچەكلىك ھاياتىم باشلاندى. 15 يېشىمدا ئوغۇرلىغان ماشىنا بىلەن نەچچە ئادەمنى  سوقۇپ ئۆلتۈرۈپ قويۇش سەۋەبىدىن تەربىيلەش مەركىزىگە قامالدىم. 17 يېشىمدا توي قىلدىم، ئۇزۇن ئۆتمەيلا ئايالىم  تايىقىمغا، زەھەر چىكىشمگە، ھاراقكەشلىكىمگە چىدىيالماي مېنى تاشلاپ كەتتى. موتوتسىكىتلار زوراۋانلىق ئەترىتىگە قوشۇلدۇم. بىر كۈنى ئۆزەمنى تۈرمىدە كۆردۈم. قاتىللىق گۇماندارى بولۇپ تۇتۇلغان ئىدىم لېكىن ئالدىنقى كۈنى بەك كۆپ زەھەر چىكىۋەتكەچكە ھېچنىمە ئىسىمدە قالمىغان ئىدى . سوتقا ئېلىپ بېرىلىش جەريانىدا قېچىپ  بۇرۇنقى ئايالىمنىڭ ئۆيىگە يوشۇرۇندۇم. بىر نەچچە كۈندىن كىيىن زەھەر چىكىپ باشقىلار بىلەن ئۇرۇشۇپ قېلىپ سۇنۇق بوتۇلكا بىلەن بىلىكىم ۋە يوتامنىڭ ئارتىرىيە چوڭ تومۇرىنى كىسىۋەتتى . نەچچە مىنۇتتىن كىيىن قۇتقۇزۇش خادىمى يىتىپ كەلدى ۋە ماڭا بىر قارىۋېتىپ :
- تەڭرىگە ئىشىنەمسىز ؟ دىدى.
- ئۇ نىمىدىگەن گەپ ؟
- قانداقلا بولمىسۇن ئۇنىڭغا گەپ قىلىۋېلىڭ، ئەھۋالىڭىز بەك تەس..
ئۆلگۈر! دەپ بولۇپلا  ئوتنىڭ ئىچىدە تۇرغىنىمنى كۆردۈم. قۇتقۇزۇش ماشىنىسى پارتلاپ كەتكەن ئوخشايدۇ دەپتىمەن چۈنكى بۇرنۇمغا قويۇق ئىس-تۈتەك پۇراۋاتاتتى. قىيا-چىيا ئاۋازلار چىقىۋاتاتتى. بىردەمدە ئوتنىڭ ئۈستىدىن ئۇچۇپ ئۆتۈپ ئەتراپى تىك يارلىق بىركۆلنىڭ ئۈستىگە بېرىپ قالدىم . كۆل كۆيىۋاتاتتى، كۆلنىڭ ئىچىدە ئادەملەر قورقۇنۇشلۇق چىقىرايتتى، كۆيىۋاتاتتى، يۇلقۇناتتى. تۇيۇقسىز ئۇلارنىڭ چىرايى يېقىنلاشتى. بۇ ئادەملەرنىڭ بەزىلىرىنى تونۇيتتۇم. بىرسى زەھەر چىكىپ ئۆلگەن، بىرسى ھاراق ئىچىپ ئۆلگەن، بىرسى قورال ئوغۇرلاش جەريانىدا مۇشتلىشىپ ئۆلگەن ئىدى. ھەممىسى ئىسمىمنى توۋلاۋاتاتتى. كەلمە! بۇ يەرگە كەلمە ! ئۇلارنىڭ ئاۋازىنى ئاڭلاۋاتاتتىم ، تۈتۈننىڭ پۇرىقىدا نەپەسلىنىۋاتاتتىم بىراق ھېچنىمىنى چۈشەنمىگەن ئىدىم. شۇنچە يىللار لۈكچەكلىك بىلەن ياشاپ باشقىلار بىلەن مۇشتلاشقاندىمۇ، خەقلەر ماڭا ئوق چىقارغاندىمۇ قورقۇپ باقمىغان ئىدىم . ھوشۇمغا كەلگەندىن كىيىن ھەپتىلەرچە شۇ كۆرۈنۈشلەر كۆز ئالدىمدىن كەتمىدى. دوختۇرخانىدىن چىقىپ زەھەر چىكىپ مەست يۈردۈم لېكىن ھېچنىمىگە پايدىسى بولمىدى، چىراقنى ئۆچۈرۈشۈم بىلەن ئاشۇ قورقۇنچلۇق كۆرۈنۈشلەر كۆزۈمگە قايتا كۆرىنەتتى. ئايالىمنىڭ زورى بىلەن چېركاۋغا باردىم. پوپ دوزاخ توغۇرسىدىكى مەزمۇنلارنى ئوقۇغاندا بىلدىمكى ، تەسۋىرلەر مېنىڭ  كۆرگىنىمنىڭ ئۆزى ئىدى. ئاھ تەڭرىم، ئەگەر راستىنلا مەۋجۇت بولساڭ مېنىڭغا ئىچىڭ ئاغرىسۇن يا مېنى ئۆلتۈر يا مېنىڭ روھىمنى ساقايت، مېنىڭ چىدىغۇچىلىقىم قالمىدى دىدىم. كەينىدىن كەلكۈندەك بىر يىغلاش بىلەن تەڭ توققۇز يېشىمدىن باشلانغان پۈتۈن نەپرەت، ئاچچىق ھەممىسى ئىچىمدىن چىقىپ كەتكەندەك بولدى...

كىلەر قېتىمقىسى ئاخىرقى گۇۋاھچى زۇبەيرە : ئاپا، مەن ئۆلمىدىم !

ئۇيغۇر05 · ۋاقتى: 2015-8-2 02:22:09

داۋامىغا تەشنا بولىۋاتىمىز . يەنە قانداق ھېكايىلەر چىقاركىن . توغرىسىنى بىلگۈچى ئاللاھ

فارۇخ · ۋاقتى: 2015-8-10 00:20:06

بولەۋا ساقىلاۋىرامدا ئادەم ، ھە دىگىزىپ قوياپ ماۋۇنىڭ شاڭيەن چىكىپ ئوتۇراپ كەتكىنىنى

داۋامىنى دەرە بولە

فارۇخ · ۋاقتى: 2015-10-2 22:35:15

داۋامىچۇ

barchuq · ۋاقتى: 2015-11-15 17:11:02

داۋامىنى يوللاڭلا تەققەززا بوپكەتتۇق ؟

QENDEL159 · ۋاقتى: 2015-11-15 20:14:30

سۈرخان يوللىغان ۋاقتى 2015-7-28 22:18
ئۈچىنجى گۇۋاھچى : دوزاخ ! دوزاخنى كۆردۈم !
رون رېگان ، ئ ...

داۋامىنى يوللىسىڭىز بولاتتى.

سۈرخان · ۋاقتى: 2015-11-16 16:25:34

ئۆلۈمنى باشتىن كەچۈرگەن ئۇ قىز بىلەن ئالاقىلىشىش مۇمكىن بولمىغانلىقتىن تېمىنىڭ داۋامى يېزىلمىدى

barchuq · ۋاقتى: 2015-11-17 12:38:57

داۋامىنى كورسەك بۇلاتتى.

		ساقلاش	پارول قايتۇرىۋېلىش
پارول			تىزىملىتىش